တႃႇတေပိုတ်ႇၽုၺ်ႇၶိုၼ်းၶူဝ်ၶၢမ်ႈလႅၼ်လိၼ် မႄႈသၢႆ−တႃႈၶီႈလဵၵ်း ၼၼ်ႉ ၽူႈမီးပုၼ်ႈၽွၼ်းတီႈတႃႈၶီႈလဵပ်း ၸတ်းႁဵတ်းပၢင်ၵုမ်

မိူဝ်ႈဝၼ်းထီႉ 16 January 2023 (လိူၼ်ၵမ်လွင်ႈ11 ၶမ်ႈ ပီႊတႆး 2117 ၼီႈ) ၼၼ်ႉ ၼင်ႇႁိုဝ်တေပိုတ်ႇၽုၺ်ႇလႆႈၶိုၼ်း ၶူဝ်ၶၢမ်ႈလႅၼ်လိၼ် မၢႆ (1) မႄႈသၢႆ−တႃႈၶီႈလဵၵ်း ၼႆသေ ၽူႈမီးပုၼ်ႈၽွၼ်း ၽၢႆႇၵဵဝ်ႇၶွင်ႈလၢႆလၢႆၽၢႆႇ ၼႂ်းၸႄႈတွၼ်ႈတႃႈၶီႈလဵၵ်း ၸတ်းႁဵတ်းပၢင်ၵုမ် ဢုပ်ႇဢူဝ်းၵၢၼ်ၵႂႃႇ တီႈဝဵင်းတႃႈၶီႈလဵၵ်း ၼႆယဝ်ႉ။

ၼႂ်းပၢင်ၵုမ်ၼၼ်ႉ ၽူႈၵွၼ်းၸႄႈတွၼ်ႈတႃႈၶီႈလဵၵ်း ဢူးမျိၼ်ႉၼၢႆႇ ဢွၼ်ႁူဝ်ၼမ်းၼႃႈသေ မီးၽူႈၵဵဝ်ႇၶွင်ႈ မိူၼ်ၼင်ႇ ၽၢႆႇပလိၵ်ႈမၢၼ်ႈ၊ ၽၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း၊ ၽၢႆႇဢုပ်ႉပိူင်ႇၸႄႈဝဵင်းတႃႈၶီႈလဵၵ်း၊ ၽၢႆႇပၢႆးယူႇလီ၊ ၽၢႆႇတေႃႉသူင်ႇၼိူဝ်လိၼ်၊ ၽၢႆႇၶွၼ်ႇ၊ ၽၢႆႇပၢႆးမၢၵ်ႈမီး၊ ၽၢႆႇလိူမ်ႈလႆႇမူတ်းသႂ်၊ ၽၢႆႇႁူင်းသဝ်းလႄႈလွင်ႈဢွၵ်ႇၶၢဝ်းတၢင်း ဢိၵ်ႇ ႁွင်ႈၵၢၼ်ၽၢႆႇၼႂ်းမိူင်း ၸိူဝ်းၼႆႉ ၶိုၼ်ႈႁွတ်ႈၶဝ်ႈႁူမ်ႈဢုပ်ႇဢူဝ်းၵႂႃႇ ဝႃႈၼႆ။

ၼႂ်းပၢင်ၵုမ်ၼၼ်ႉ လႆႈဢုပ်ႇဢူဝ်းၵၼ်ၵႂႃႇဝႃႈ ယွၼ်ႉလွင်ႈၽႄႈလၢမ်း COVID-19 သေ လႆႈပိၵ်ႉဢိုတ်းၶူဝ်ၶၢမ်ႈလႅၼ်လိၼ် မၢႆ (1) မႄႈသၢႆ−တႃႈၶီႈလဵၵ်း ဝႆႉၼႆႉ မီးမႃး 3 ပီႊပၢႆ ယဝ်ႉလႄႈ ၵွပ်ႈပိူဝ်ႈၼၼ် ႁႂ်ႈၽၢႆႇၵဵဝ်ႇၶွင်ႈၵူႈၽၢႆႇၽၢႆႇ ႁဵတ်းလိူမ်ႈလႆႇမူတ်းသႂ် တီႈၽႂ်ႁဵင်းမၼ်း လႄႈ ၼႂ်းလုမ်းတီႈႁဵတ်းၵၢၼ်ၵေႃႈ ႁႂ်ႈႁၢင်ႈႁႅၼ်းတူဝ်ႈတၼ်းဝႆႉ ၵူႈလွင်ႈ ၼႆယူႇယဝ်ႉ။

ဢိင်ၼိူဝ်ၶၢဝ်ႇလိုဝ်းၽၢႆႇမိူင်းထႆး ဢွၵ်ႇမႃးဝႃႈ ၼႂ်းဝၼ်းထီႉ 22 January 2023 ၼႆႉ ၶူဝ်ၶၢမ်ႈလႅၼ်လိၼ် မၢႆ (1) မႄႈသၢႆ−တႃႈၶီႈလဵၵ်း တေပိုတ်ႇၽုၺ်ႇၶိုၼ်းယဝ်ႉ ၼႆၼၼ်ႉ ၽၢႆႇတၢင်းတႃႈၶီႈလဵၵ်းတႄႉဝႃႈ တႃႇတေပိုတ်ႇၽုၺ်ႇၶိုၼ်းၶူဝ်ၶၢမ်ႈ လႅၼ်လိၼ်ၼၼ်ႉ တိုၵ်ႉယူႇၼႂ်းၶၵ်ႉတွၼ်ႈၵၢၼ်ဢုပ်ႇဢူဝ်းငူပ်ႉငီႉၵၼ်ၵူၺ်းဝႃႈၼႆ။

ၽူႈမီးပုၼ်ႈၽွၼ်းၵေႃႉၼိုင်ႈလၢတ်ႈဝႃႈ တေပိုတ်ႇၽုၺ်ႇလႆႈၶိုၼ်းဝၼ်းလႂ် ၼႆၼၼ်ႉတႄႉ ဢမ်ႇပႆႇၸၢင်ႈလၢတ်ႈလႆႈ ၵူၺ်းၵႃႈ လၢတ်ႈလႆႈဝႃႈ ၸမ်တေပိုတ်ႇၽုၺ်ႇၶိုၼ်းယဝ်ႉ ၼႆၼၼ်ႉၵူၺ်း ဝႃႈၼႆ။

ၼင်ႇႁိုဝ်တေပိုတ်ႇၽုၺ်ႇလႆႈၶိုၼ်း ၶူဝ်ၶၢမ်ႈလႅၼ်လိၼ် မၢႆ (1) မႄႈသၢႆ−တႃႈၶီႈလဵၵ်း ၼၼ်ႉ တိုၵ်ႉဢုပ်ႇဢူဝ်းၵၼ် ၵဵဝ်ႇလွင်ႈလူတ်းယွၼ်ႇလွင်ႈၵုမ်းၵမ် တၢင်းပဵၼ် COVID-19 လႄႈ ၶေႃႈတိုဝ်းၵမ်တႃႇၶဝ်ႈဢွၵ်ႇလႅၼ်လိၼ် ၼႆယူႇယဝ်ႉ။

တႆးလွတ်ႈလႅဝ်း