တႄႇၶဝ်ႈၼႂ်းလိူၼ် May 2022 မႃးၼႆႉၵူၺ်း ၾႆးမႆႈဝတ်ႉၵျွင်း လႄႈႁိူၼ်းၵူၼ်းမိူင်း 2 ဢွင်ႈတီႈယဝ်ႉ

တႄႇဢဝ်ၼႂ်းႁူဝ်လိူၼ် May 2022 မႃးတေႃႇထိုင် မိူဝ်ႈဝၼ်းထီႉ 8 May 2022 (လိူၼ်ႁူၵ်းမႂ်ႇ 9 ၶမ်ႈ ပီႊတႆး 2116 ၼီႈ) ၼႂ်းၶၢဝ်းတၢင်းလၢႆဝၼ်းၵူၺ်း ပဵၼ်ၽေးၾႆးလုၵ်ႉမႆႈ ဝတ်ႉၵျွင်း လႄႈ လင်ႁိူၼ်းၵူၼ်းမိူင်း မီးၵႂႃႇလၢႆလၢႆလင်ယဝ်ႉ ဝႃႈၼႆ။

မိူၼ်ၼင်ႇ မိူဝ်ႈၼႂ်းဝၼ်းထီႉ 5 May 2022 (လိူၼ်ႁူၵ်းမႂ်ႇ 6 ၶမ်ႈ ပီႊတႆး 2116 ၼီႈ) ယၢမ်းဝၢႆးဝၼ်း 14:00 မူင်းပၢႆၼၼ်ႉ ၾႆးမႆႈႁိူၼ်းယေးၵူၼ်းဝၢၼ်ႈ ဢၼ်မီးတီႈပွၵ်ႉၵၢင်ဝဵင်း (မြို့လယ်ရပ်ကွက်) ၸႄႈဝဵင်းသီႇပေႃႉ ၸႄႈတွၼ်ႈၵျွၵ်းမႄး ၸိုင်ႈတႆးပွတ်းႁွင်ႇ 2 လင် ၸပ်းၵၼ်သေ ၵဵဝ်ႇလူၺ်ႈလွင်ႈၾႆးမႆႈၼႆႉ ၵူၼ်းတႄႉဢမ်ႇမီးလွင်ႈမၢတ်ႇၸဵပ်းလူႉတၢႆသင် သေတႃႉ ၶူဝ်းၶွင်ၼႂ်းႁိူၼ်း‌ယေးတႄႉဢမ်ႇတၼ်းလႆႈသင် ၼႆယဝ်ႉ။

ၵဵဝ်ႇလူၺ်ႈလွင်ႈၾႆးလႆႈမႆႈႁိူၼ်းၵူၼ်းဝၢၼ်ႈၼႆႉ ၽူႈၶဝ်ႈၸုမ်း ပရႁိတသီႇပေႃႉ လၢတ်ႈဝႃႈ- “ၾႆးမႆႈႁိူၼ်းၵူၼ်းဝၢၼ်ႈ 2 လင်ၸပ်းၵၼ်ၶႃႈဢေႃႈ ႁိူၼ်း 2 လင်ၼၼ်ႉတႄႉ ယူႇၼႂ်းဝၢင်းလဵဝ်ၵၼ်ၶႃႈ ယွၼ်ႉၼၼ် ပေႃးမႆႈလင်ႈၼိုင်ႈၵေႃႈ တိုၼ်းလၢမ်းမႆႈပႃးၵၼ်ယဝ်ႉ။ ၾႆႈတႄႇမႆႈ ဝၢႆးဝၼ်း 14:00 မူင်းပၢႆ တေႃႇထိုင် မွၵ်ႈ 15:00 မူင်း ၾႆးၸင်ႇမွတ်ႇၵႂႃႇ၊ ၾႆးၼၼ်ႉမႆႈႁႅင်းၼႃႇၶႃႈ။ ၶူဝ်းၶွင်ႁိူၼ်းယေးတႄႉ ဢမ်ႇလႆႈသင် လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီးၶႃႈ။ ယဝ်ႉၵေႃႈ လွင်ႈလူႉသုမ်း တင်းမူတ်းမီးၵႃႈႁိုဝ် ပႆႇႁူႉၶႃႈ”- လၢတ်ႈၼင်ႇၼႆ။

ယွၼ်ႉသင်လႄႈ ၾႆးလႆႈမႆႈဢၼ်ဝႃႈၼၼ်ႉတႄႉ ၽႂ်ၵေႃႈပႆႇႁူႉ လွင်ႈတၢင်းငဝ်ႈႁၢၵ်ႈမၼ်း။ ႁိူၼ်းဢၼ်ၾႆးမႆႈၵႂႃႇ 2 လင်ၼၼ်ႉ တႃႇလင်ၼိုင်ႈ ပဵၼ်ႁိူၼ်း 2 ၸၼ်ႉသေ ၸၼ်ႉတႂ်ႈၵေႃႇဢုတ်ႇဝႆႉ ၸၼ်ႉၼိူဝ်သမ်ႉ ပဵၼ်မႆႉ၊ တႃႇထႅင်ႈလင်ၼိုင်ႈသမ်ႉ ပဵၼ်ႁိူၼ်းမႆႉၸၼ်ႉလဵဝ် ၼႆယဝ်ႉ။

ၵူၼ်းမိူင်းၼႂ်းသီႇပေႃႉၵေႃႉၼိုင်ႈလၢတ်ႈၼႄဝႃႈ “လွင်ႈၾႆးမႆႈၼႆႉ ယွၼ်ႉသင်လႄႈမႆႈ ဢၼ်ဝႃႈၼၼ်ႉ ႁဝ်းၶႃႈ ဢမ်ႇႁူႉၶႃႈ။ ႁိူၼ်းၼၼ်ႉသမ်ႉ မီးဝႆႉသလွင်း၊ တူႈယဵၼ် လႄႈ ထီႇဝီႇ ၸိူဝ်းၼႆႉၶႃႈဢေႃႈ။ ယဝ်ႉၵေႃႈ တီႈႁိမ်းၼၼ်ႉ ယင်းမီးဝႆႉထႅင်ႈ ႁူင်းႁဵၼ်းၸၼ်ႉဢွၼ် (မူကြိုကျောင်း) ၶႃႈ။ မိူဝ်ႈၾႆးမႆႈၼၼ်ႉ ၵူဝ်လၢမ်းမႆႈပႃးႁူင်းႁဵၼ်းၸၼ်ႉဢွၼ်ၼၼ်ႉၼႆသေ လႆႈငိၼ်းဝႃႈ ပေႃးလႆႈၼႅတ်ႈၶၢႆႉလုၵ်ႈဢွၼ်ႇဢွၵ်ႇၼႆၶႃႈဢေႃႈ ၵဵဝ်ႇလူၺ်ႈလွင်ႈၾႆးမႆႈၼႆႉသေ ယူႇတီႈၵူၼ်းဝၢၼ်ႈၼႂ်းပွၵ်ႉလႄႈ ၸုမ်းၽၢႆႇၶႄၾႆး ႁူမ်ႈၵၼ်သေ ၸွႆႈၶႄၾႆး မွတ်ႇၵႂႃႇ မိူဝ်ႈယၢမ်းဝၢႆးဝၼ်း 15:00 မူင်းပၢႆ” ၼႆယဝ်ႉ။

မိူဝ်ႈဝၼ်းထီႉ 08 May 2022 (လိူၼ်ႁူၵ်းမႂ်ႇ 9 ၶမ်ႈ ပီႊတႆး 2116 ၼီႈ) ၶၢဝ်းယၢမ်းၵၢင်ၼႂ်ၸဝ်ႉ 04:00 ၼႆႉၵေႃႈ ၾႆးမႆႈဝတ်ႉၵျွင်းၵၢင်တူင်ႈ ထုင်ႉယိူင်း ၸႄႈဝဵင်းလၢႆးၶႃႈ လႄႈမႆႈပႃးၸလွပ်ႈႁေႃသိၼ် 2 လင် ၵူၼ်းတႄႉဢမ်ႇတၼ်းပဵၼ်သင်သေတႃႉ ၶူဝ်းၶွင်ဢၼ်မီးၼႂ်းၵျွင်းၼၼ်ႉတႄႉ ဢမ်ႇတၼ်းလႆႈသင်သေဢိတ်း ဝႃႈၼႆ။

ၵဵဝ်ႇလဵဝ်ႈလွင်ႈၼႆႉသေ ၵူၼ်းၼႂ်းပိုၼ်ႉတီႈလၢတ်ႈၼႄဝႃႈ “ဢၼ်ၾႆးလႆႈမႆႈ ၼႆႉတႄႉ ယွၼ်ႉဝႃႈၾႆးသွတ်ႉသေ ၸင်ႇလႆႈပဵၼ်ၾႆးလုၵ်ႉမႆႈၵျွင်းဢေႃႈ ထၢင်ႇတေပဵၼ်ယွၼ်ႉသၢႆၾႆးၽင်ႉၵူၺ်းၶႃႈ။ ၶမ်ႈဝႃးသမ်ႉ ယွၼ်ႉၽူၼ်မႃးႁႃႇယႂ်ႇ လႄႈ ၾႆးၾႃႉဢမ်ႇမႃးသေ တီႈၵျွင်းသမ်ႉ ဢၢပ်ႈတေၸႂ်ႉၾႆးၵူင်းၼမ်ႉၼမ်သေ ဢမ်ႇသၢင်ႇထုၵ်ႇ ၾႆးသွတ်ႉလႄႈ ၸင်ႇလႆႈမႆႈၵျွင်းၵႂႃႇၶႃႈ” လၢတ်ႈၼႄၼင်ႇၼႆ။

ဝၢႆးသေသိုၵ်းမၢၼ်ႈၶဝ် ယိုၼ်းဢၢမ်းၼၢတ်ႈၼႆႉ ၾႆးၾႃႉၵေႃႈထုၵ်ႇတတ်းၶၢတ်ႇ လၢႆလၢႆပိုၼ်ႉတီႈ မၢင်တီႈၵေႃႈ ၾႆးၾႃႉမႃးယူႇသေတႃႉ ဢမ်ႇသူႈမႃးမၢၼ်ႇ၊ မႃးမႃးၶၢတ်ႇၶၢတ်ႇ၊ ၽွင်းၾႆးၾႃႉမႃးၶိုၼ်း ႁႅင်းၾႆးသမ်ႉပုင်ႈၶဝ်ႈႁႅင်း၊ ပေႃးပဵၼ်သၢႆၾႆးသဵၼ်ႈလဵၵ်ႉ ဢမ်ႇပေႉႁႅင်းၾႆးသေ ၾႆးၸၢင်ႈသျွတ်ႉမႆႈ၊ ထႅင်ႈလွင်ႈၼိုင်ႈၵေႃႈ ယွၼ်ႉၾႆးဢမ်ႇမႃးသေ ၵူၼ်းမိူင်းၶဝ်မၢင်ပိုၼ်ႉတီႈ လႆႈၸႂ်ႉၾႆးတဵၼ်း ၾႆးသူဝ်ႇလႃႇႁင်းၵူၺ်းလႄႈ ၵမ်းၵမ်းၺႃးၾႆးမႆႈဝတ်ႉ၊ မႆႈႁိူၼ်းၸိူဝ်းၼႆႉ ၼႆယဝ်ႉ။

တႆးလွတ်ႈလႅဝ်း

Photo Credit

Facebook

ၶၢဝ်ႇလိုၼ်းသုတ်း