ထူပ်းႁၼ်ၶၢပ်ႈတူဝ်တၢႆၵူၼ်းၸၢႆးၵေႃႉၼိုင်ႈ လႄႈ လၢမ်းၶၢတ်ႈဝႃႈတၢႆယွၼ်ႉလဝ်ႈ

ၵူၼ်းမိူင်းၼႂ်းပိုၼ်ႉတီႈၵႂႃႇသွမ်ႈၼႃးသေ လႆႈထူပ်းႁၼ်ၶၢပ်ႈတူဝ်တၢႆ ၵူၼ်းၸၢႆးၵေႃႉၼိုင်ႈ တီႈထဵင်ၼႃး ဝၢၼ်ႈႁူဝ်ၸၢင်ႉ ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၼႆယဝ်ႉ။

မိူဝ်ႈဝၼ်းထီႉ 31 July 2022 ယၢမ်းၵၢင်ဝၼ်းၼၼ်ႉ ၵူၼ်းမိူင်းၵႂႃႇသွမ်ႈၼႃးသေ ၵႂႃႇထူပ်းႁၼ်ၵူၼ်းၸၢႆးၵေႃႉၼိုင်ႈ ဢၼ်မီးဢႃႇယုမွၵ်ႈ 32 ပီႊ ၼွၼ်းဢူပ်ႇပူပ်ႇသေ တၢႆဝႆႉယူႇၼႂ်းလွၵ်းၼႃး ႁိမ်းထဵင်မၼ်းၼၼ်ႉၵမ်းလဵဝ် ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ − ၶၢပ်ႈတူဝ်မၼ်းၸၢႆးၼၼ်ႉ ၸုမ်းပရႁိတ ဝဵင်းၼမ်ႉလၼ်ႈၵႂႃႇၸွႆႈဢဝ်ဢွၵ်ႇၶႃႈ၊ ပီႈၼွင်ႉမၼ်းၵေႃႈႁွတ်ႈၵႂႃႇ ဢွင်ႈတီႈၼၼ်ႉယူႇ၊ ၸိုဝ်ႈၵေႃႉဢၼ်တၢႆၼၼ်ႉတႄႉ ဢမ်ႇတွင်းယဝ်ႉ၊ ပေႃးထွမ်ႇတူၺ်း ၶဝ်ဢုပ်ႇၵၼ်တႄႉ မၼ်းယူႇၵေႃႉလဵဝ်တီႈထဵင်ၼႃးသေ တေၵိၼ်လဝ်ႈမဝ်းႁႅင်းၼႃႇ ဢမ်ႇထိင်းတူဝ်လႆႈ လႄႈ ဢဝ်လူမ်ႉတူၵ်းၵႂႃႇ ၼႂ်းလွၵ်းၼႃး သမ်ႉဢမ်ႇမီးႁႅင်း လုၵ်ႉၶိုၼ်းၸိူင်ႉၼၼ်ဝႆႉ − ၼႆယူႇယဝ်ႉ။

ၶၢပ်ႈတူဝ်မၼ်းၸၢႆးၼၼ်ႉ ၸုမ်းပရႁိတ လႄႈ ပေႃႈမႄႈပီႈၼွင်ႉမၼ်း လႆႈၸွႆႈၵၼ်သေ လုမ်းလႃးၽဝ်ပၼ်ၶၢပ်ႈတူဝ် ယဝ်ႉတူဝ်ႈလီငၢမ်း ဝႃႈၼႆ။

တႆးလွတ်ႈလႅဝ်း

ၶႅပ်းႁၢင်ႈ − နမ့်လန်လူငယ် ပရဟိတအဖွဲ့