ပလိၵ်ႈမၢၼ်ႈ တီႉၺွပ်းလႆႈ ယႃႈၽိၼ်ႇၽိူၵ်ႇ ၵႃႈၶၼ်ငိုၼ်းမၢၼ်ႈ သႅၼ်ပွင်း 3,200 ပၢႆ ၼႂ်းၸႄႈဝဵင်းၼွင်ၶဵဝ်

ပလိၵ်ႈမၢၼ်ႈ ၽၢႆႇၽဵဝ်ႈမူၺ်ႉ ယႃႈမဝ်းၵမ် CCDAC Myanmar ပိုၼ်ၽၢဝ်ႇၵႂႃႇဝႃႈ တီႉၺွပ်းလႆႈယႃႈၽိၼ်ႇၽိူၵ်ႇ 21.6 Kg ၵႃႈၶၼ်ငိုၼ်းမၢၼ်ႈ သႅၼ်ပွင်း 3,200 ပၢႆ ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၼႆယဝ်ႉ။

ၽၢႆႇၽဵဝ်ႈမူၺ်ႉ ယႃႈမဝ်းၵမ်မၢၼ်ႈ CCDAC MYANMAR ပိုၼ်ၽၢဝ်ႇဝႆႉဝႃႈ ၸွမ်းၼင်ႇလႆႈႁပ်ႉႁူႉၶၢဝ်ႇသေ မိူဝ်ႈဝၼ်းထီႉ 3 June 2022 ယၢမ်းဝၢႆးဝၼ်း 14:00 မူင်းၼၼ်ႉ ပလိၵ်ႈမၢၼ်ႈ လႆႈၵႂႃႇပႂ်ႉၵူတ်ႇထတ်း တီႈႁိမ်းလၢၼ်ႇတူဝ်းၵဵၵ်ႉ တၢင်းၶဝ်ႈဝဵင်းၼွင်ၶဵဝ် ၼိူဝ်သဵၼ်ႈတၢင်း လႃႈသဵဝ်ႈ-မၢၼ်းတလေး(ဝဵင်းလိူဝ်ႇ) သေ တီႉၺွပ်းလႆႈ ယႃႈၽိၼ်ႇၽိူၵ်ႇ 21.6 Kg(ၵီႇလူဝ်ႇၵရမ်ႇ) ၵႃႈၶၼ်ငိုၼ်းမၢၼ်ႈ သႅၼ်ပွင်း 3,200 ပၢႆ၊ တီႉၺွပ်းလႆႈပႃး ၵူၼ်းႁေႃႈၵႃးတေႃႉတၢင်ႇ ယႃႈၽိၼ်ႇၽိူၵ်ႇ ယႄးၵျေႃႇတူႇရ လႄႈ လူတ်ႉၵႃး (FUSO) 12 လေႃႉ ၼိုင်ႈလမ်း ဝႃႈၼႆ။

ၸွမ်းၼင်ႇၵူတ်ႇထတ်းၸႅတ်ႈတူၺ်းသေ လႆႈႁပ်ႉႁူႉဝႃႈ ယႃႈၽိၼ်ႇၽိူၵ်ႇၼႆႉ လုၵ်ႉတၢင်း ဝဵင်းသီႇပေႃႉ ၸိုင်ႈတႆးပွတ်းႁွင်ႇ တေတေႃႉတၢင်ႇၵႂႃႇတၢင်း ဝဵင်းမၢၼ်းတလေး(ဝဵင်းလိူဝ်ႇ) ဝႃႈၼႆ။

ၵူၼ်းတေႃႉတၢင်ႇ ယႃႈၽိၼ်ႇၽိူၵ်ႇ ဢၼ်တီႉၺွပ်းလႆႈၼႆႉ ၸွမ်းၼင်ႇမၢႆမီႈၸိုင်ႈမိူင်း မီးၼၼ်ႉ လႆႈဢဝ်တၢင်းၽိတ်းဝႆႉသေ လိူဝ်ၼၼ်ႉ တေသိုပ်ႇၸွပ်ႇထႅင်ႈ ၽူႈဢၼ် ၵဵဝ်ႇၶွင်ႈၸွမ်း ၼႂ်းၵၢၼ်တေႃႉတၢင်ႇ ယႃႈၽိၼ်ႇၽိူၵ်ႇပွၵ်ႈၼႆႉယူႇ ဝႃႈၼႆ။

တႆးလွတ်ႈလႅဝ်း