ပလိၵ်ႈမၢၼ်ႈ ဝဵင်းမူႇၸေႊ တီႉၺွပ်းၵူၼ်းၼႄၵၢင်ၸႂ်ၵေႃႉၼိုင်ႈ ၵႂႃႇၵုမ်းၶင်ႁႅမ်တၢႆသေ ၶိုၼ်းဢဝ်ၶၢပ်ႈတူဝ်တၢႆ သူင်ႇပၼ်တီႈႁိူၼ်း

ပလိၵ်ႈမၢၼ်ႈ ဝဵင်းမူႇၸေႊ တီႉၺွပ်းၵူၼ်းၼႄၵၢင်ၸႂ်ၵေႃႉၼိုင်ႈ ၵႂႃႇၵုမ်းၶင်သေ ၸႂ်ႉလၢႆးႁုၵ်းႁၢႆႉ ပေႃႉထုပ်ႉႁႅမ်တၢႆယဝ်ႉ ၶိုၼ်းဢဝ်ၶၢပ်ႈတူဝ်တၢႆ သူင်ႇပၼ်တီႈႁိူၼ်း။

မိူဝ်ႈဝၼ်းထီႉ 28 February 2021 ၼၼ်ႉ ပလိၵ်ႈမၢၼ်ႈ ဝဵင်းမူႇၸေႊ တီႉၺွပ်းၵူၼ်းၼႄၵၢင်ၸႂ် ဢၼ်သၢၼ်ၶတ်းတပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈ ၵေႃႉၼိုင်ႈ ၵႂႃႇၵုမ်းၶင်သေ ၸႂ်ႉလၢႆးႁုၵ်းႁၢႆႉ ပေႃႉထုပ်ႉႁႅမ်တၢႆယဝ်ႉ ထိုင်မႃး ဝၼ်းထီႉ 5 March 2021 ၶိုၼ်းဢဝ်ၶၢပ်ႈတူဝ်တၢႆမၼ်းၸၢႆး သူင်ႇပၼ်တီႈႁိူၼ်း ၼႆယဝ်ႉ။

ၽူႈၸၢႆးၵေႃႉဢၼ်ထုၵ်ႇပလိၵ်ႈမၢၼ်ႈ ဝဵင်းမူႇၸေႊ တီႉၺွပ်းၵုမ်းၶင် ႁႅမ်တၢႆယဝ်ႉ ၶိုၼ်းဢဝ်ၶၢပ်ႈတူဝ်တၢႆ သူင်ႇပၼ်တီႈႁိူၼ်းၼႆႉ ၸိုဝ်ႈႁွင်ႉတဵင်းလုၼ်ႇ ၽူႈၸၢႆး ဢႃႇယုမွၵ်ႈ 43 ပီႊ ပဵၼ်ၵူၼ်းၸႃႇတိ ပွၵ်ႉႁူဝ်မွၼ် ဝဵင်းမူႇၸေႊ ဝႃႈၼႆ။

ၵူၼ်းၼႂ်းၼႃႈႁိူၼ်းတဵင်းလုၼ်ႇ လၢတ်ႈၼႄတီႈသိုဝ်ႇၶၢဝ်ႇဝႃႈ တဵင်းလုၼ်ႇၼႆႉ မိူဝ်ႈပလိၵ်ႈမၢၼ်ႈ တီႉၺွပ်းၵႂႃႇၼၼ်ႉ ဢမ်ႇမီးႁွႆးမၢတ်ႇၸဵပ်းသင် ၵူၺ်းၵႃႈ ၽိူဝ်ႇပလိၵ်ႈမၢၼ်ႈ ၶိုၼ်းဢဝ်ၶၢပ်ႈတူဝ်တၢႆမၼ်းၸၢႆး မႃးသူင်ႇတီႈႁိူၼ်း လႆႈႁၼ်ၸွမ်းၵွၵ်းႁူဝ် လႄႈ တူဝ် မၼ်းၸၢႆး မီးႁွႆးမၢတ်ႇၸဵပ်း ထုၵ်ႇပေႃႉထုပ်ႉပေႃးတဵမ်ၵႂႃႇမူတ်း ၼႆယဝ်ႉ။  

တဵင်းလုၼ်ႇၼႆႉ  မိူဝ်ႈဝၼ်းထီႉ 28 February 2021 မၼ်းၸၢႆး ၶဝ်ႈပႃးၼႂ်းလွင်ႈၼႄၵၢင်ၸႂ်သၢၼ်ၶတ်း တပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈ တီႈဝဵင်းမူႇၸေႊသေ ၽွင်းၼႄၵၢင်ၸႂ်လူၺ်ႈလၢႆးၵတ်းယဵၼ် သၢၼ်ၶတ်းတပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈ တီႈႁိမ်းလၢၼ်ႇမၢၼ်ႈဝဵင်းၼၼ်ႉ မီးပလိၵ်ႈမၢၼ်ႈ 4 ၵေႃႉ ၼုင်ႈၶူဝ်းၵူၼ်းႁိူၼ်း ၶီႇၵႃးလမ်းၼိုင်ႈ ၶဝ်ႈၼႂ်းၵႄႈ ၵူၼ်းၼႄၵၢင်ၸႂ်သေ ပွႆႇမၢၵ်ႇ ယိုဝ်းၵွင်ႈ ယႃႉပၢင်ၼႄၵၢင်ၸႂ် လႄႈ မၢပ်ႇၼႄးဝႃႈ ၵူၼ်းၼႄၵၢင်ၸႂ်ၶဝ် ပႃးၶိူင်ႈယိပ်းၼႆသေ တီႉၺွပ်း တဵင်းလုၼ်ႇ ႁူမ်ႈပႃးတင်း ၵူၼ်းၼႄၵၢင်ၸႂ်ၵႂႃႇၵမ်ႈၽွင်ႈ ဝႃႈၼႆ၊ ၵူၼ်းၼႄၵၢင်ၸႂ်ၼႆႉ ၼႄၵၢင်ၸႂ်လူၺ်ႈလၢႆးၵတ်းယဵၼ်ၵူၺ်း ဢမ်ႇပႃးၶိူင်ႈယိပ်းသင်လႄႈ ၵူၼ်းၼႂ်းၼႃႈႁိူၼ်း ၵူၼ်းဢၼ်ထုၵ်ႇပလိၵ်ႈမၢၼ်ႈ တီႉၺွပ်းၼၼ်ႉ ၵႂႃႇတုၵ်းယွၼ်း ႁႂ်ႈပွႆႇပၼ်ၶိုၼ်းၼႆသေတႃႉ ပလိၵ်ႈမၢၼ်ႈသမ်ႉ ဢမ်ႇပွႆႇပၼ်၊ ထိုင်မႃး ဝၼ်းထီႉ 5 March 2021 ၸင်ႇဢဝ်ၶၢပ်ႈတူဝ်တၢႆ တဵင်းလုၼ်ႇ မႃးသူင်ႇပၼ်တီႈႁိူၼ်း ဝႃႈၼႆ။

ၵူၼ်းမိူင်း ဝဵင်းမူႇၸေႊတႄႉ ထတ်းသၢင်ဝႃႈ လွင်ႈပလိၵ်ႈမၢၼ်ႈ တီႉၺွပ်းၵူၼ်းၼႄၵၢင်ၸႂ် ၵႂႃႇၵုမ်းၶင်သေ ႁႅမ်တၢႆၼႆႉ ၶဝ်ႈႁဵတ်းၼႄႁႂ်ႈၵူၼ်းမိူင်းၵူဝ် လႄႈ ၼင်ႇႁိုဝ် ပေႃးတေဢမ်ႇႁတ်း ၼႄၵၢင်ၸႂ်သၢၼ်ၶတ်း တပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈ ဝႃႈၼႆ။

တေႃႇထိုင်ယၢမ်းလဵဝ် ၵူၼ်းမိူင်းဝဵင်းမူႇၸေႊ ဢၼ်ၼႄၵၢင်ၸႂ်သၢၼ်ၶတ်း တပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈသေ ထုၵ်ႇပလိၵ်ႈမၢၼ်ႈ တီႉၺွပ်း မီး 4 ၵေႃႉယဝ်ႉ ဝႃႈၼႆ။

တင်ႈတႄႇ ဝၼ်းထီႉ 1 February 2021 ဝၢႆးတပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈယဝ်ႉ ယွၼ်ႉဢမ်ႇၶႂ်ႈယူႇတႂ်ႈ ပိူင်ဢုပ်ႉပိူင်ႇသိုၵ်းလႄႈ ၵူၼ်းမိူင်းၵူႈၸၼ်ႉထၢၼ်ႈ တူဝ်ႈတင်းမိူင်းႁူမ်ႈတုမ် ၼႄၵၢင်ၸႂ်လူၺ်ႈလၢႆးၵတ်းယဵၼ်သေ သၢၼ်ၶတ်းတပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈယူႇယဝ်ႉ။

သိုၵ်းမၢၼ်ႈ လႄႈ ပလိၵ်ႈမၢၼ်ႈသမ်ႉ ၸႂ်ႉတိုဝ်းၵွင်ႈဢၼ်တႄႉ၊ ၵႅတ်ႉသ်ၼမ်ႉတႃ၊ ၶွၼ်ႉ၊ ၵႃးသိတ်းၼမ်ႉ လႄႈ ၶိူင်ႈယိပ်းၵွင်ႈၵၢင်ႇ လၢႆလၢႆသႅၼ်း ၶတ်းၸႂ်ယႃႉ ပၢင်ၼႄၵၢင်ၸႂ်သေဢမ်ႇၵႃး တင်ႈၸႂ်ယိုဝ်းၵွင်ႈသႂ်ႇ ၵူၼ်းၼႄၵၢင်ၸႂ်သေ တီႉၺွပ်းၵူၼ်းၼႄၵၢင်ၸႂ်ယူႇ ဢမ်ႇထၢတ်ႇဢမ်ႇဝၢႆး ၼႆယဝ်ႉ။  

တႄႇၸဵမ်မိူဝ်ႈ ဝၼ်းထီႉ 1 February 2021 ဝၼ်းဢၼ်တပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈ လူင်ပွင်ၸိုင်ႈၼၼ်ႉ ၵူၼ်းမိူင်းဢွၼ်ၵၼ် ဢွၵ်ႇမႃးၼႄၵၢင်ၸႂ်သေ လႆႈထုၵ်ႇၶွင်ႇသီႇသိုၵ်းမၢၼ်ႈ ပိုတ်းယိုဝ်းၶႃႈတၢႆ ဢမ်ႇယွမ်း 60 ပၢႆ လႄႈ မီးၵူၼ်းမိူင်းမၢတ်ႇၸဵပ်းၼပ်ႉႁူဝ်ႁဵင် ဝႃႈၼႆ။

သွင်သၢမ်ဝၼ်းၼႆႉ သိုၵ်းမၢၼ်ႈ တင်း ပလိၵ်ႈမၢၼ်ႈ ၶဝ်ႈဢဝ်တီႈယူႇ ၼႂ်းဝၢင်းၸၼ်ႉၸွမ် ဢိၵ်ႇ ႁူင်းယႃ ၸႄႈဝဵင်းၵမ်ႉၼမ်ၼမ် ၼႂ်းမိူင်းႁူမ်ႈတုမ်လႄႈ ၵူၼ်းမိူင်းၵေႃႈ ၼႄၵၢင်ၸႂ်သၢၼ်ၶတ်း ႁေႃႈလိုပ်ႈယူႇ ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း