ပီႈၼွင်ႉတႆးလႅင် ပိုၼ်ၽၢဝ်ႇသၢၼ်ၶတ်း လွင်ႈတေဢဝ် ၸႄႈဝဵင်းၶမ်းတီႈ လႄႈ ၸႄႈဝဵင်းႁူမ်ႈမၢၵ်ႇလၢင်း သႂ်ႇပႃးၼႂ်းၼႃႈလိၼ်ဢုပ်ႉပိူင်ႇၼႃႇၵ

မိူဝ်ႈဝၼ်းထီႉ 16 February 2020 ၸုမ်းတူင်ႇဝူင်းၵူၼ်း ပီႈၼွင်ႉတႆးလႅင် ဢွၵ်ႇလိၵ်ႈပိုၼ်ၽၢဝ်ႇသၢၼ်ၶတ်း ၶေႃႈတုၵ်းယွၼ်း လွင်ႈဢၼ်တေဢဝ် ၸႄႈဝဵင်းၶမ်းတီႈ လႄႈ ၸႄႈဝဵင်းႁူမ်ႈမၢၵ်ႇလၢင်း သႂ်ႇပႃးၼႂ်းၼႃႈလိၼ်ဢုပ်ႉပိူင်ႇၽွင်းငမ်း ၼႃႇၵ ၼၼ်ႉ ႁၢဝ်ႈႁၢဝ်ႈႁႅင်းႁႅင်း ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ မိူဝ်ႈဝၼ်းထီႉ 21-23 January 2020 ပူၼ်ႉမႃးၼၼ်ႉ တေႃႇဢွင်ႇသၢၼ်းသုၵျီႇ ၽူႈၵိူဝ်းၵုမ်ၸိုင်ႈမိူင်း ၵႂႃႇႁူပ်ႉထူပ်း ၵူၼ်းမိူင်း ၼႂ်းၸႄႈဝဵင်းလေႇသျီး၊ ပၼ်းမွၵ်ႉ၊ ပိၼ်ႇလႄႇပူး၊ ၼၢင်းယုၼ်း လႄႈ တမူး သေ ဢူးၵေႇသျီႇမူး ၵူၼ်းၸၢဝ်းၼႃႇၵ ဢၼ်ယူႇသဝ်းၼႂ်းၸႄႈဝဵင်းလေႇသျီး တုၵ်းယွၼ်းတေႃႇဢွင်ႇသၢၼ်းသုၵျီႇ ႁႂ်ႈဢဝ်ၸႄႈ ဝဵင်းၶမ်းတီႈ လႄႈ ၸႄႈဝဵင်း ႁူမ်ႈမၢၵ်ႇလၢင်း သႂ်ႇပႃးၼႂ်းၼႃႈလိၼ်ဢုပ်ႉပိူင်ႇၽွင်းငမ်းၼႃႇၵ ၼႆၼၼ်ႉ  ယွၼ်ႉဢမ်ႇငမ်ႇၵၼ်တင်း မၢႆမီႈပိူင်ငဝ်ႈပိုင်းမိူင်း သေဢမ်ႇၵႃး ၸၢင်ႈပဵၼ်မႃးပၼ်ႁႃ ၵၢၼ်မိူင်း ဢိၵ်ႇတင်း ပၼ်ႁႃတူင်ႇဝူင်းၵူၼ်း လႄႈ ၸုမ်းတူင်ႇဝူင်းၵူၼ်း ပီႈၼွင်ႉတႆးလႅင် ၸင်ႇဢွၵ်ႇလိၵ်ႈပိုၼ်ၽၢဝ်ႇ သၢၼ်ၶတ်းၵႂႃႇ ႁၢဝ်ႈႁၢဝ်ႈႁႅင်းႁႅင်း ဝႃႈၼႆ။

လွင်ႈဢၼ် ဢူးၵေႇသျီႇမူး ဢၼ်ပဵၼ်ၵူၼ်းၸၢဝ်းၼႃႇၵ တုၵ်းယွၼ်းၼႆႉ ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇ တွပ်ႇၵႄႈၵႂႃႇဝႃႈ ၼင်ႇႁိုဝ်ပေႃးတေပဵၼ် မိူင်းတီႇမူဝ်ႇၶရေႇသီႇ ဢၼ်ၸႅတ်ႈၸၢင်ႇ ၼၼ်ႉ လွင်ႈဢၼ်ထုၵ်ႇလီ လႅၵ်ႈလၢႆႈၵေႃႈ တေႁဵတ်းသၢင်ႈၵႂႃႇ ၼႆယဝ်ႉ။

လႆႈႁူႉဝႃႈ ၸႄႈဝဵင်းၶမ်းတီႈ လႄႈ ၸႄႈဝဵင်းႁူမ်ႈမၢၵ်ႇလၢင်းၼႆႉ ပဵၼ်ၸႄႈဝဵင်းဢၼ်ၸဝ်ႈၾႃႉတႆး ဢုပ်ႉပိူင်ႇၽွင်းငမ်းမႃး ပၢၼ်သိုပ်ႇပၢၼ် ဝႃႈၼႆ။

ၶေႃႈတုၵ်းယွၼ်း လွင်ႈဢၼ်တေဢဝ် ၸႄႈဝဵင်းၶမ်းတီႈ လႄႈ ၸႄႈဝဵင်းႁူမ်ႈမၢၵ်ႇလၢင်း သႂ်ႇၼႂ်းၼႃႈလိၼ် ၽွင်းငမ်း ၸၢဝ်းၶိူဝ်းၼႃႇၵၼႆႉ ငဝ်ႈငုၼ်း ၸုမ်းၵူၼ်းၼုမ်ႇတႆးလႅင်၊ ၵေႃႇမတီႇ ၵေႃလိၵ်ႈလၢႆး လႄႈ ၾိင်ႈငႄႈတႆး ဢိၵ်ႇတင်း ပႃႇတီႇၽွမ်ႉႁူမ်ႈတႆးလႅင် (SSP) ၵေႃႈ ဢွၵ်ႇလိၵ်ႈပိုၼ်ၽၢဝ်ႇသၢၼ်ၶတ်းၵႂႃႇ မိူၼ်ၵၼ်။

ဢူးယေႃးပတ်ႉသၢၼ်းဢွင်ႇ ၽူႈတၢင်ၼႃႈလုမ်းတြႃးမိူင်းႁူမ်ႈတုမ် လၢတ်ႈဝႃႈ ၸွမ်းၼင်ႇ မၢႆမီႈပိူင်ငဝ်ႈပိုင်းမိူင်း မတ်ႉတႃ 51 (ၵ) လႄႈ (ၶ) မီးၼၼ်ႉသေ သင်ဝႃႈ တေမၵ်းမၼ်ႈမူၼ်ႉမႄး ၼႃႈလိၼ်ဢုပ်ႉပိူင်ႇ ၽွင်းငမ်းၸိုင်ႈမိူင်း ပေႃးၼႆၸိုင် လူင်ပွင်ၸိုင်ႈ တေလႆႈတၢင်ႇထိုင် သၽႃးမိူင်းႁူမ်ႈတုမ်သေ ပေႃးသၽႃးမိူင်းႁူမ်ႈတုမ် ဢုပ်ႇဢူဝ်းၵၼ်တႅပ်းတတ်းမၵ်းမၼ်ႈယဝ်ႉၵွၼ်ႇ ၸင်ႇတေႁဵတ်းသၢင်ႈၵႂႃႇလႆႈ ၼႆယဝ်ႉ။

ဢူးၵျေႃႇထေးလုၼ်ႇ တႅၼ်းၽွင်းသၽႃးတိူင်း ၸႄႈဝဵင်းႁူမ်ႈမၢၵ်ႇလၢင်းတႄႉ လၢတ်ႈဝႃႈ ယၢမ်းၽွင်းတေႃႈလဵဝ်ၼႆႉ မႅၼ်ႈၽွင်းတိုၵ်ႉၵေႃႇသၢင်ႈ မိူင်းႁူမ်ႈတုမ် ၾႅတ်ႇတရႄႇယူႇလႄႈ ၵဵဝ်ႇလူၺ်ႈလွင်ႈတုၵ်းယွၼ်းၸိူင်ႉၼႆၼႆႉ ၸၢင်ႈပဵၼ်မႃးပၼ်ႁႃ ၼႂ်းၵႄႈၵၢင်ၸၢဝ်းၶိူဝ်းၼင်ႇၵၼ် သေဢမ်ႇၵႃး ၵၢၼ်ၽွမ်ႉႁူမ်ႈၵေႃႈ ၸၢင်ႈလူႉလႅဝ် ဝႃႈၼႆ။

ၵူဝ်ႇဢွင်ႇသၢၼ်း ၵူၼ်းၼႂ်းပိုၼ်ႉတီႈ ၸႄႈဝဵင်းၶမ်းတီႈ ၵေႃႉၼိုင်ႈၵေႃႈလၢတ်ႈဝႃႈ ၸႄႈဝဵင်းၶမ်ႈတီႈၼႆႉ ဢမ်ႇၸႂ်ႈၵူၼ်း ၸၢဝ်းၶိူဝ်းဢၼ်လဵဝ် ယူႇသဝ်းဝႆႉလႄႈ လွင်ႈတုၵ်းယွၼ်းၸိူင်ႉၼႆၼႆႉ ၸၢင်ႈႁဵတ်းႁႂ်ႈ ၵၢၼ်ၽွမ်ႉႁူမ်ႈ ၼႂ်းၵႄႈၵၢင် ၸၢဝ်းၶိူဝ်းၼင်ႇၵၼ် တႅၵ်ႇယၢႆႈ ဝႃႈၼႆ။

ၸႄႈဝဵင်းၶမ်းတီႈ လႄႈ ၸႄႈဝဵင်းႁူမ်ႈမၢၵ်ႇလၢင်းၼႆႉ မီးၸၢဝ်းၶိူဝ်း တႆး၊ ယၢင်း၊ ယၢင်းလႅင်၊ ၶၢင်၊ ၶျၢင်း၊ မၢၼ်ႈ၊ လီႇသူး ဢိၵ်ႇတင်း ရၶႅင်ႇ ယူႇသဝ်းဝႆႉသေ ၼႂ်းၸႄႈဝဵင်း ႁူမ်ႈမၢၵ်ႇလၢင်းတႄႉ ႁူဝ်ၼပ်ႉၵူၼ်း မီး 200,000 ပၢႆ (သွင်သႅၼ်ပၢႆ)၊ ႁူဝ်ၼပ်ႉၵူၼ်း ပီႈၼွင်ႉတႆးလႅင် မီး 160,000 ပၢႆ (ၼိုင်ႈသႅၼ်ႁူၵ်းမိုၼ်ႇပၢႆ)၊ ႁူဝ်ၼပ်ႉၵူၼ်းၸၢဝ်းၶိူဝ်း ၼႃႇၵသမ်ႉ မီးမွၵ်ႈ 1,600 (ႁဵင်ႁူၵ်းပၢၵ်ႇ)ၵူၺ်း ၼႆယဝ်ႉ။

ၶေႃႈမုၼ်း – RFA
တႆးလွတ်ႈလႅဝ်း