ပူႇတိၼ်ႇ သင်ႇႁူမ်ႈႁႅင်းသိုၵ်းယႂ်ႇလိူဝ်ပိူၼ်ႈ

ၸွမ်ၸိုင်ႈရၢတ်ႉသျႃး ဝလႃႇတီႇမီရ် ပူႇတိၼ်ႇ သင်ႇႁူမ်ႈႁႅင်းသိုၵ်းဢၼ်ယႂ်ႇလိူဝ်ပိူၼ်ႈ ပဵၼ်ပွၵ်ႈဢွၼ်တၢင်းသုတ်း ဝၢႆးသေသိုၵ်းလုမ်ႈၾႃႉပွၵ်ႈသွင်ယဝ်ႉတူဝ်ႈၼႆယူႇ။

ဝၢႆးသေသိုၵ်းလုမ်ႈၾႃႉပွၵ်ႈသွင်ယဝ်ႉတူဝ်ႈၵႂႃႇၼၼ်ႉ လႆႈဝႃႈပဵၼ်ပွၵ်ႈဢွၼ်တၢင်းသုတ်း ဢၼ်ၽူႈၼမ်းရၢတ်ႉသျႃး ဢွၵ်ႇမႃးပိုၼ်ၽၢဝ်ႇႁူမ်ႈဢဵၼ်ႁႅင်းၵူၼ်းသိုၵ်းၼမ်လိူဝ်ပိူၼ်ႈသေ ယင်းပၼ်ၾၢင်ႉထႅင်ႈဝႃႈ သင်ဝႃႈမိူင်းဝၼ်းတူၵ်း ယင်းတိုၵ်ႉလွၵ်ႇငိူတ်ႈ လူၺ်ႈလွင်ႈၼိဝ်းၶလီးယႃးၼၼ်ႉယူႇၸိုင် ရၢတ်ႉသျႃး တေတုမ်ႉတွပ်ႇၸူးၶိုၼ်း လူၺ်ႈၶိူင်ႈၵွင်ႈၵၢင်ႇ ဢၼ်မီးဢဵၼ်ႁႅင်းၼၼ်ႉတင်းမူတ်း ၼႆယဝ်ႉ။

ပူႇတိၼ်ႇသိုပ်ႇလၢတ်ႈထႅင်ႈဝႃႈ သင်ၽႅၼ်ႇလိၼ်ရၢတ်ႉသျႃးထုၵ်ႇပူၼ်ႉပႅၼ်ပေႃးၼႆၸိုင် ရၢတ်ႉသျႃး တေၸႂ်ႉၵူႈလွင်ႈၵူႈလၢႆးဢၼ်မီးတင်းမူတ်း တႃႇၵႅတ်ႇၶႄၵူၼ်းမိူင်းရၢတ်ႉသျႃး လႄႈ ၼႆႉၵေႃႈတေဢမ်ႇၸႂ်ႈ လွင်ႈဢၼ်လွၵ်ႇငိူတ်ႈႁႂ်ႈၵူဝ် ၵူၺ်းၵႃႈတေပဵၼ်လွင်ႈတေႉ ဝႃႈၼႆ။

ပူႇတိၼ်ႇယင်းၵၢဝ်ႇၼႄးပႃး မိူင်းဝၼ်းတူၵ်းဝႃႈ မီးၽႅၼ်တေႁဵတ်းႁၢႆႉရၢတ်ႉသျႃးၼႆသေ ႁဵတ်းႁႂ်ႈမၼ်းလႆႈသဵင်ၵမ်ႉထႅမ် ၵၢၼ်လူင်းသဵင်ၵၢင်ၸႂ်ၵူၼ်းမိူင်း တႃႇၶဝ်ႈႁူမ်ႈၸွမ်းရၢတ်ႉသျႃး ဢၼ်တေၸတ်းႁဵတ်းၶိုၼ်ႈမႃးၼႂ်းပိုၼ်ႉတီႈယူႇၶရဵၼ်း ပွတ်းတွၼ်ႈၽၢႆႇတႂ်ႈၵုမ်းၵမ်ရၢတ်ႉသျႃး ၼၼ်ႉ ၼႆယဝ်ႉ။

ၽွင်းလူင်ၽၢႆႇၵႅတ်ႇၶႄရၢတ်ႉသျႃးၵေႃႈ ပိုတ်ႇလၢတ်ႈၼႄဝႃႈ ၵၢၼ်ႁူမ်ႈႁႅင်းသိုၵ်းပွၵ်ႈၼႆႉ မီးသိုၵ်းယူႇမွၵ်ႈ 3 သႅၼ်ၵေႃႉ တႃႇႁႂ်ႈပဵၼ်ၵႂႃႇၸွမ်းၼင်ႇၽႅၼ်ၵၢၼ်ၶွင် ၸွမ်ၸိုင်ႈပူႇတိၼ်ႇ ဢၼ်ၶႂ်ႈပူတ်းပွႆႇပၼ်ပွတ်းတွၼ်ႈ Donbas ပွတ်းဝၼ်းဢွၵ်ႇၶွင်ယူႇၶရဵၼ်းၼၼ်ႉ ႁႂ်ႈပေႃးလွတ်ႈလႅဝ်းမႃး၊ ၵွပ်ႈဝႃႈ ၵူၼ်းမိူင်းၵမ်ႈၼမ် ဢၼ်ယူႇသဝ်းၼႂ်းပွတ်းတွၼ်ႈ ၽၢႆႇတႂ်ႈၵၢၼ်ၵုမ်းၵမ်ၶွင်ရၢတ်ႉသျႃးၼၼ်ႉ ဢမ်ႇၶႂ်ႈယူႇတႂ်ႈၵၢၼ်ဢုပ်ႉပိူင်ႇယူႇၶရဵၼ်းၵႂႃႇထႅင်ႈယဝ်ႉ ၸွမ်းလူၺ်ႈပူႇတိၼ်ႇၼၼ်ႉၵေႃႈ ၵမ်ႉထႅမ်ၸွမ်းၵၢၼ်တႅပ်းတတ်းၶွင်ၵူၼ်းမိူင်း ဢၼ်ယူႇၼႂ်းပွတ်းတွၼ်ႈၼႆႉလႄႈ ၵၢၼ်လူင်းသဵင်ၵၢင်ၸႂ်ၼၼ်ႉၵေႃႈ မိူၼ်ပဵၼ်ၵၢၼ်သိူဝ်ႇတၢင်း ပၼ်ႁႂ်ႈရၢတ်ႉသျႃး ဢဝ်လႅၼ်လိၼ်ယူႇၶရဵၼ်းပဵၼ်တၢင်းၵၢၼ်ၵႂႃႇ 15% ယဝ်ႉဝႃႈၼႆ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း