ပဵၼ်ၽေးသၽႃႇဝ လူမ်းလႅင်ႉၽတ်ႉႁႅင်းလႄႈ သုမ်ႉ – ႁိူၼ်းယေးၵူၼ်းမိူင်းလူႉၵွႆ 8 လင် တီႈသႅင်ၵႅဝ်ႉ

ၾူၼ်တူၵ်းလူမ်းလႅင်ႉၽတ်ႉႁၢဝ်ႈႁႅင်း ယၢမ်းၵၢင်ၶိုၼ်းသေ ႁဵတ်းႁႂ်ႈႁိူၼ်းယေးၵူၼ်းမိူင်းလူႉၵွႆ၊ လၵ်းသဝ်ၾႆးၾႃႉ လူမ်ႉၵူၼ်ႇပင်း ၾႆးၾႃႉမွတ်ႇတင်းၶိုၼ်း။

မိူဝ်ႈဝႃး ဝၼ်းထီႉ 8 July 2021 (ဝၼ်းလိူၼ်ၸဵတ်းလပ်း ပီႊတႆး 2115 ၼီႈ) ယၢမ်းၵၢင်ၶိုၼ်းမွၵ်ႈ 20:00 မူင်းၼၼ်ႉ ပဵၼ်ၽေးသၽႃႇဝ လူမ်းလႅင်ႉၽတ်ႉႁၢဝ်ႈႁႅင်း ၾူၼ်တူၵ်းပႃး တၢင်းႁိုင် 20 မိၼိတ်ႉ တီႈဝၢၼ်ႈသႅင်ၵႅဝ်ႉ ဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်းမႄး ၸိုင်ႈတႆးပွတ်းႁွင်ႇသေ မီးလွင်ႈတုမ်ႉတိူဝ်ႉသုမ်ႉ – ႁိူၼ်းယေးၵူၼ်းမိူင်းလူႉၵွႆဢမ်ႇယွမ်း 7-8 လင် ၼႆယဝ်ႉ။

ၸၢႆးထုၼ်းဢွင်ႇ ၵူၼ်းၼုမ်ႇ ဝၢၼ်ႈသႅင်ၵႅဝ်ႉ လၢတ်ႈတီႈတႆးလွတ်ႈလႅဝ်းဝႃႈ “ၶမ်ႈဝႃးၼႆႉ လူမ်ႉလႅင်ႉၽတ်ႉမႃးဢွၼ်တၢင်းၶႃႈဢေႃႈ ဝၢႆးၼၼ်ႉၵေႃႈ ၾူၼ်တူၵ်းပႃးၸွမ်း လူမ်းလႅင်ႉတႄႉ ဢမ်ႇပေႃးၽတ်ႉႁိုင်ၼင်ႇၵဝ်ႇၶႃႈ မွၵ်ႈ 15-20 မိၼိတ်ႉၼႆႉဢေႃႈ။ ၵူၺ်းလူမ်းႁႅင်းလႄႈ ႁဵတ်းႁႂ်ႈတူၼ်ႈမႆႉလူင် မႆႉၼၢင်းလွၼ်း  ဢၼ်မီးဢႃႇယု ႁူဝ်ပၢၵ်ႇပီၼၼ်ႉ လူမ်ႉၵူၼ်ႇသႂ်ႇသဵၼ်ႈတၢင်းဝႆႉၶႃႈဢေႃႈ၊ သဝ်ၾႆးၾႃႉၵေႃႈ ႁၵ်းၵႂႃႇ 4 သဝ် ၶမ်ႈဝႃးၼႆႉ ႁဝ်းၶႃႈဢမ်ႇမီးၾႆးၽႃႉၸႂ်ႉၶႃႈ၊ တင်းသုမ်ႉ တင်းႁိူၼ်းယေးၵူၼ်းမိူင်း လဵၵ်းမုင်းပိဝ် လူႉၵွႆၵမ်ႈၽွင်ႈ တေမီးယူႇမွၵ်ႈ 7-8 လင်ၼႆႉၶႃႈ တူၼ်ႈၶဝ်ႈၵၢပ်ႇၵူၼ်းမိူင်းတႄႉ လူမ်းၽတ်ႉလူမ်ႉၵွႆၼမ်ၼႃႇၶႃႈ ” ဝႃႈၼႆ။

“မိူဝ်ႈၼႆႉ ဝၼ်းထီႉ 9 July 2021 ယၢမ်းၵၢင်ၼႂ်ၼႆႉ ၽၢႆႇၾႆးၾႃႉၶဝ်ၵေႃႈ ၶဝ်ႈမႃးၵုမ်းလုမ်းလႃးၶိုၼ်း ယဝ်ႉၼင်ႇၵဝ်ႇၶႃႈ၊ ႁဝ်းၶႃႈၵူၼ်းဝၢၼ်ႈၵေႃႈ ဢွၼ်ၸွႆႈၵၼ်တတ်းလိူဝ်ႈမႆႉၼၢင်းလွၼ်း ဢၼ်ၵူၼ်ႇလူမ်ႉၼႆႉဢေႃႈ ၵူၼ်းတႄႉဢမ်ႇမီးလွင်ႈတုမ်ႉတိူဝ်ႉ မၢတ်ႇၸဵပ်းသင်ၶႃႈ” ၼႆယဝ်ႉ။

ၸၢႆးထုၼ်းဢွင်ႇ သိုပ်ႇလၢတ်ႈထႅင်ႈဝႃႈ ၼွၵ်ႈလိူဝ်သေ ၽေးသၽႃႇဝ ယွၼ်ႉၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းႁၢဝ်ႈႁႅင်း တီႈၼႂ်းမိူင်းတႆးပွတ်းႁွင်ႇသေ ထႅင်ႈၽၢႆႇၼိုင်ႈၵေႃႈ ႁဝ်းၶႃႈၵူၼ်းဝၢၼ်ႈ လႆႈဢွၼ်ၸွႆႈၵၼ် ၵႅတ်ႇၶႄႁႄႉၵင်ႈၸိူဝ်ႉမႅင်းပႃးၶႃႈဢေႃႈ ၸူဝ်ႈၽွင်းၼႆႉ ႁဝ်းၶႃႈ ဢမ်ႇပၼ်ၵူၼ်းၼႂ်းဝၢၼ်ႈဢွၵ်ႇၵႂႃႇတၢင်းၼွၵ်ႈ ၵူၼ်းတၢင်းၼွၵ်ႈၵေႃႈ ဢမ်ႇပႆႇၸၢင်ႈႁပ်ႉတွၼ်ႈၶဝ်ႈမႃး ၼႂ်းဝၢၼ်ႈလႆႈၶႃႈ ၼႆယဝ်ႉ။

တီႈၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်းၵေႃႈ ၵူတ်ႇထူပ်းႁၼ်လုၵ်ႈႁဵၼ်းၸၼ်ႉ 10 ၵေႃႉၼိုင်ႈ တိတ်းၸပ်းၸိူဝ်ႉမႅင်း COVID-19 ၼႆသေ မိူဝ်ႈၼႆႉဝၼ်းထီႉ 9 July 2021 လႆႈပိၵ်ႉဢိုတ်းၵၢတ်ႇ၊ ႁူင်းႁဵၼ်း တင်းမူတ်းၼႆယဝ်ႉ၊ ၵူၼ်းပၢႆႈၽေးပၢင်တိုၵ်း ၼႂ်းဝဵင်းၵေးသီးၵမ်ႈၽွင်ႈ ယွၼ်ႉၵူဝ်ၸိူဝ်ႉမႅင်းၽႄႈလၢမ်း ၵေႃႈပိူင်ၼိုင်ႈသေ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းၽွင်ႈယဝ်ႉ ဝႃႈၼႆ။

ၼႂ်းၶၢဝ်းတၢင်း 24 ၸူဝ်ႈမူင်း ၵူၼ်းတိတ်းၸပ်းၸိူဝ်ႉမႅင်း တီႈၼႂ်းမိူင်းႁူမ်ႈတုမ် တိူဝ်းၶိုၼ်ႈထႅင်ႈ 4,132 ၵေႃႉ ႁူမ်ႈတိတ်းၸပ်းၸိူဝ်ႉမႅင်းမီး 180,055 ၵေႃႉ၊ ၵူၼ်းလူႉသဵင်ႈတၢႆတိူဝ်းၶိုၼ်ႈထႅင်ႈ 51 ၵေႃႉ ႁူမ်ႈၵူၼ်းလူႉသဵင်ႈတၢႆမီး 3,621 ၵေႃႉ လႄႈ ၵူၼ်းဢၼ်ယူတ်းယႃၶႅၼ်းၶိုၼ်းမီး 142,309 ၵေႃႉ ၼႆယဝ်ႉ။

တႆးလွတ်ႈလႅဝ်း