ဝၢႆးပွႆးပၢင်ၶႅၵ်ႇတိုၵ်ႉယဝ်ႉပႆႇႁိုင်သင် ပဵၼ်ၽေးၾႃႉၽႃႇ မီးၵူၼ်းလူႉတၢႆ 16 ၵေႃႉ ၸဝ်ႈမၢဝ်ႇမၢတ်ႇၸဵပ်း

ပဵၼ်ၽေးသၽႃႇဝ ၾူၼ်တူၵ်းထပ်းၵၼ်လၢႆဝၼ်းယဝ်ႉသေ ယူႇယူႇၵေႃႈၾႃႉၽႃႇ ၼႂ်းပွႆးပၢင်ၶႅၵ်ႇ မီးၵူၼ်းလူႉသဵင်ႈတၢႆ 16 ၵေႃႉ လႄႈ ၸဝ်ႈမၢဝ်ႇ လႆႈတိူဝ်ႉမၢတ်ႇၸဵပ်းပႃး။

မိူဝ်ႈဝၼ်းထီႉ 4 August 2021 (လိူၼ်ပႅတ်ႇလွင်ႈ 12 ၶမ်ႈ ပီႊတႆး 2115 ၼီႈ) သိုဝ်ႇၶၢဝ်ႇ AFP ဢွၵ်ႇၼႄဝႆႉဝႃႈ ပဵၼ်ၽေးသၽႃႇဝ ၾႃႉၵိုင်ႉၵၢင်ႉၽႃႇသႂ်ႇ တီႈၼႂ်းပွႆးပၢင်ၶႅၵ်ႇတီႈၼိုင်ႈ ၼႂ်းဝဵင်းရၢတ်ႉသျုႉႁီး (Rajshahi) မိူင်းပင်းၵလႃးတိတ်ႉသ် ပွတ်းၸဵင်ႇႁွင်ႇဝၼ်းတူၵ်း ထိုင်တီႈမီး ၵူၼ်းလႆႈလူႉသဵင်ႈတၢႆၼမ်ထိုင် 16 ၵေႃႉ လႄႈ ၸဝ်ႈမၢဝ်ႇ လႆႈတိူဝ်ႉမၢတ်ႇၸဵပ်းပႃး ၼႆယဝ်ႉ။

ၽူႈမီးပုၼ်ႈၽွၼ်း ၼႂ်းပိုၼ်ႉတီႈ လၢတ်ႈဝႃႈ ယွၼ်ႉပဵၼ်ၽွင်းၶၢဝ်းႁိုဝ်ႉၵေႃႈ ပိူင်ၼိုင်ႈသေ ၾူၼ်ၵေႃႈတူၵ်းထပ်းၵၼ်လၢႆဝၼ်းယဝ်ႉလႄႈ ၸုမ်းၵူၼ်းၸိူဝ်းၼႆႉသမ်ႉ မႃးၵိၼ်လဵင်ႉၵၼ် ႁိမ်းၽင်ႇမႄႈၼမ်ႉ ဝၢႆးသေပၢင်ၶႅၵ်ႇယဝ်ႉတူဝ်ႈ ၵူၺ်းၵႃႈ ၸဝ်ႈသၢဝ်တႄႉ ဢမ်ႇၶဝ်ႈႁူမ်ႈၸွမ်း ၼႂ်းပၢင်ၵိၼ်လဵင်ႉ ပွၵ်ႈၵမ်းၼႆႉလႄႈ ဢမ်ႇလႆႈမီးလွင်ႈတုမ်ႉတိူဝ်ႉသင်ပႃးၸွမ်း ၼႆယဝ်ႉ။

ထႅင်ႈတွၼ်ႈၼိုင်ႈၵေႃႈ ယွၼ်ႉလူမ်းလႅင်ႉၽတ်ႉ ၾူၼ်တူၵ်းႁၢဝ်ႈႁႅင်း ၼႂ်းပိုၼ်ႉတီႈ ၶွၵ်ႉသ် ပႃႇသႃႉရ် (Cox’s Bazar) တီႈၼႂ်းမိူင်း ပင်းၵလႃးတိတ်ႉသ် ၶၢဝ်းတၢင်း 1 ဝူင်ႈယဝ်ႉသေ ႁဵတ်းႁႂ်ႈၼမ်ႉၼွင်းလူၵ်ႈ မီးၵူၼ်းမိူင်း ၼႂ်းပိုၼ်ႉတီႈ လႆႈလူႉသဵင်ႈတၢႆယဝ်ႉ 20 ၵေႃႉ ၼႂ်းၼၼ်ႉ တႃႇ 6 ၵေႃႉ ပဵၼ်ၵူၼ်းပၢႆႈၽေး ၵူၼ်းၶိူဝ်းရူဝ်ႇႁိၼ်ႇၵျုႇ ဢၼ်လုၵ်ႉတီႈရၶႅင်ႇ ပၢႆႈၽေးၵႂႃႇယူႇ ၼႂ်းမိူင်းပၵလႃးတိတ်ႉသ်ၼၼ်ႉ ဝႃႈၼႆ။

ဝၢႆးပွႆးပၢင်ၶႅၵ်ႇတိုၵ်ႉယဝ်ႉပႆႇႁိုင်သင် ပဵၼ်ၽေးၾႃႉၽႃႇ မီးၵူၼ်းလူႉတၢႆ 16 ၵေႃႉ ၸဝ်ႈမၢဝ်ႇမၢတ်ႇၸဵပ်း
AFP

တူဝ်ၼပ်ႉ ပဵၼ်တၢင်းၵၢၼ် ၵူၼ်းလူႉသဵင်ႈတၢႆ ယွၼ်ႉလႆႈထုၵ်ႇၾႃႉၽႃႇ တီႈၼႂ်းမိူင်း ပင်းၵလႃးတိတ်ႉသ် ၼိုင်ႈပီႊလႂ် ၼပ်ႉႁူဝ်ပၢၵ်ႇၵေႃႉ ဝႃႈၼႆ။ ၽူႈမီးပုၼ်ႈၽွၼ်းၵေႃႉၼိုင်ႈ လၢတ်ႈၼႄတီႈသိုဝ်ႇၶၢဝ်ႇဝႃႈ မိူဝ်ႈၼႂ်းပီႊ 2016 ၼၼ်ႉ ပီႊလဵဝ်ၵူၺ်း ၵူၼ်းမိူင်းလႆႈထုၵ်ႇၾႃႉၽႃႇ လူႉသဵင်ႈတၢႆၼမ်ထိုင် 200 ပၢႆ ၼႆယဝ်ႉ။

ယူႇတီႈ ၸုမ်းၽၢႆႇၵူတ်ႇထတ်းလွတ်ႈလႅဝ်းၶဝ် ၵဵပ်းႁွမ်ၶေႃႈမုၼ်းဝႆႉၼၼ်ႉတႄႉဝႃႈ ၼႂ်းပီႊ 2016 ၼၼ်ႉ မီးၵူၼ်းလူႉသဵင်ႈတၢႆ ယွၼ်ႉၾႃႉၽႃႇ 349 ၵေႃႉ ၼႆယဝ်ႉ။ ယူႇတီႈၽူႈလူင်ႉလႅၼ်ႇၶဝ်ၵေႃႈ ဢွၵ်ႇမႃးလၢတ်ႈဝႃႈ ပဵၼ်ယွၼ်ႉၵူၼ်းမိူင်း မီးလွင်ႈတီႇယႃႉထိူၼ်ႇၶိူဝ်းပႃႇမႆႉႁၢဝ်ႈႁႅင်း တႃႇတီႈလိၼ်ၽုၵ်ႇသွမ်ႈလႄႈ ႁဵတ်းႁႂ်ႈလႆႈႁပ်ႉၽွၼ်းယွၼ်ႈ မိူၼ်ၼင်ႇဢၼ်ပဵၼ်ယူႇယၢမ်းလဵဝ် ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း