ပၢင်တိုၵ်းၼႂ်းၸႄႈဝဵင်းတီးတဵင်ႇ ၽၢႆႇသိုၵ်းမၢၼ်ႈ တၢႆ 15 ၵေႃႉ

မိူဝ်ႈဝၼ်းထီႉ 21 January 2022 (လိူၼ်ၵမ်လွင်ႈ 5  ၶမ်ႈ ပီႊတႆး 2116 ၼီႈ) ယၢမ်းၵၢင်ၼႂ်  ၸုမ်းသိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း ပဵၼ်ပၢင်တိုၵ်းၵၼ် တီႈၼႂ်းၸႄႈဝဵင်းတီးတဵင်ႇ မိူင်းၶျၢင်းသေ ၽၢႆႇသိုၵ်းမၢၼ်ႈ လူႉတၢႆ 15 ၵေႃႉ ၼႆယဝ်ႉ။

မိူဝ်ႈယၢမ်းၵၢင်ၼႂ်ၸဝ်ႈမိူင်းပႆႇလႅင်း မွၵ်ႈ 02:00 မူင်းၼၼ်ႉ တပ်ႉၽွမ်ႉႁူမ်ႈ ၸုမ်းၵႅတ်ႇၶႄၵူၼ်းမိူင်း 9 ၸုမ်းႁူမ်ႈၵၼ်သေ ၶဝ်ႈတိုၵ်းၸုမ်းသိုၵ်းမၢၼ်ႈ ဢၼ်ၶဝ်ႈမႃးတင်ႈပၢင်သဝ်းၸူဝ်ႈၵႅပ်ႉဝႆႉ တီႈဝၢၼ်ႈႁိၼ်းသၼ်ႇ ၸႄႈဝဵင်း တီးတဵင်ႇလႄႈ ၽၢႆႇသိုၵ်းမၢၼ်ႈ လူႉတၢႆ 15 ၵေႃႉ၊ ဢိၵ်ႇမၢတ်ႇၸဵပ်းတင်းၼမ် ဝႃႈၼႆ။

ၸုမ်းသိုၵ်းမၢၼ်ႈၶဝ် လုၵ်ႉတၢင်းဝဵင်းၵလေးသေ ၶိုၼ်ႈမႃးၸွမ်းသဵၼ်ႈတၢင်း ဢၼ်ၵပ်းသိုပ်ႇၵၼ်တင်း မိူင်းၶျၢင်း၊ ၶဝ်ႈမႃးတင်ႈပၢင်သဝ်းၸူဝ်ႈၵႅပ်ႉဝႆႉ တီႈဝၢၼ်ႈႁိၼ်းသၼ်ႇလႄႈ လႆႈထုၵ်ႇ တပ်ႉၽွမ်ႉႁူမ်ႈ ၸုမ်းၵႅတ်ႇၶႄၵူၼ်းမိူင်း CDM-Syin ၊ PDF Zoland ၊ CAN ၊ Kalay PDF3 ၊ Kalay PDF8 ၊ Kalay PDF9 ၊ PDA ၊ Zongan Army လႄႈ CDF-KKG2 ႁူမ်ႈၵၼ်သေ ၶဝ်ႈတိုၵ်းၼႆယဝ်ႉ။

ၼႂ်းပၢင်တိုၵ်းၼၼ်ႉ ၵူၼ်းသိုၵ်းၼႂ်းတပ်ႉၵႅတ်ႇၶႄၵူၼ်းမိူင်း 2 ၵေႃႉ ထုၵ်ႇမၢၵ်ႇၵွင်ႈတိူဝ်ႉမႅၼ်ႈလႄႈ လႆႈတၢင်းမၢတ်ႇၸဵပ်းဝႆႉ ၼႆယဝ်ႉ။

မိူဝ်ႈဝၼ်းထီႉ 17 January 2022 ၼၼ်ႉၵေႃႈ ၵႃးသိုၵ်းမၢၼ်ႈ 5 လမ်း ဢၼ်လုၵ်ႉတၢင်း ဝဵင်းတီးတဵင်ႇ သေမႃးၼၼ်ႉ လႆႈထုၵ်ႇတင်း ၸုမ်းၵႅတ်ႇၶႄၵူၼ်းမိူင်း  ၶဝ်ႈတိုၵ်းလႄႈ ၽၢႆႇသိုၵ်းမၢၼ်ႈ လူႉတၢႆ 10 ၵေႃႉ သေ မၢတ်ႇၸဵပ်းတင်းၼမ် မိူၼ်ၵၼ်ဝႃႈၼႆ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း