ပၢင်ယိုၼ်ႈမွပ်ႈဝႂ်ယုၵ်ႉယွင်ႈ လုၵ်ႈႁဵၼ်းဢွင်ႇပူၼ်ႉၸၼ်ႉ ပီႊသွၼ်ႁဵၼ်း (2020-2021) ၸုပ်ႈ ( 3 ) တီႈငဝ်ႈၸိုင်ႈ လွႆတႆးလႅင်း

မိူဝ်ႈၼႆႉ ဝၼ်းထီႉ  18 January 2022  (လိူၼ်ၵမ်လွင်ႈ 2 ၶမ်ႈ ပီႊတႆး 2116 ၼီႈ) ယၢမ်းၵၢင်ၼႂ် 09:00 မူင်းၼၼ်ႉ ၸုမ်းပွင်ၵၢၼ်ပၢႆႈပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ​လႆႈၸတ်းႁဵတ်းပၢင်ယိုၼ်ႈမွပ်ႈဝႂ်ယုၵ်ႉယွင်ႈ လုၵ်ႈႁဵၼ်းဢွင်ႇပူၼ်ႉၸၼ်ႉ​ ၸၼ်ႉငဝ်ႈ၊ ၸၼ်ႉၵၢင်၊ ၸၼ်ႉသုင်​၊ လုၵ်ႈႁဵၼ်းၵတ်ႉၶႅၼ်ႇ ဢၼ်လႆႈသူးထီႉ 1-2-3 ​လႄႈ ယိုၼ်ႈမွပ်ႈဝႂ် သွၼ်ၵၢၼ်ပူၼ်ႉ ၼုမ်ႇႁၢၼ်ၸိုင်ႈမိူင်း ပီႊသွၼ်ႁဵၼ်း (2020-2021) ၸုပ်ႈ (3) ပီႊ (2022) တီႈႁူင်းႁဵၼ်းၸၼ်ႉသုင်သေ မီးႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး  ၸွမ်သိုၵ်းလူင် ယွတ်ႈသိုၵ်း၊ ၵႅမ်ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး၊ ၽူႈယႂ်ႇၵူၼ်းလူင်ၵူႈႁွင်ႈၵၢၼ် ဢိၵ်ႇ ပေႃႈမႄႈလုၵ်ႈႁဵၼ်း ၶဝ်ႈႁူမ်ႈပၼ်ႁႅင်းၵႂႃႇ ဝႃႈၼႆ။

ၼႂ်းပၢင်ယိုၼ်ႈမွပ်ႈဝႂ်ယုၵ်ႉယွင်ႈ လုၵ်ႈႁဵၼ်းဢွင်ႇပူၼ်ႉၸၼ်ႉၼၼ်ႉ ၽူႈၸတ်းၵၢၼ် ၸုမ်းပွင်ၵၢၼ်ပၢႆႈပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ၸၢႆးလၢၼ်တႆး မွၵ်ႇလၢတ်ႈၶေႃႈၵႂၢမ်း သပ်းလႅင်းၼႄ ၶေႃႈယိူင်းဢၢၼ်း လွင်ႈလႆႈၸတ်းႁဵတ်းပၢင်ယုၵ်ႉယွင်ႈပွၵ်ႈၼႆႉၵႂႃႇဝႃႈ (1) တႃႇယွင်ႈယေႃး တၢင်းၶတ်းၸႂ် လုၵ်ႈႁဵၼ်းၶဝ် လႄႈ ႁႂ်ႈမေႃႁူႉၵုင်ႇမုၼ် လွင်ႈၵၢၼ်ႁဵၼ်း ပၢႆးပၺ်ႇၺႃႇ၊ (2) တႃႇယွင်ႈယေႃး တၢင်းၶတ်းၸႂ်ၸုမ်းၶူးသွၼ် မေႃသွၼ် ၵူႈၼႃႈတီႈ ၸွမ်းလႅၼ်လိၼ် တႆး-ထႆး ဢၼ်ၶတ်းၸႂ်သွၼ်ႁဵၼ်းပၼ်လုၵ်ႈႁဵၼ်းမႃး ၶၢဝ်းတၢင်းႁိုင်၊ (3) တႃႇယွင်ႈယေႃး ပၼ်ႁႅင်းလၵ်းသုတ်ႇၵၢၼ်ႁဵၼ်းၵၢၼ်သွၼ်၊ (4) တႃႇပဵၼ်ႁႅင်းၸႂ် ပုၼ်ႈတႃႇလုၵ်ႈႁဵၼ်း ၸုမ်းၶူးသွၼ် မေႃသွၼ် ၵူႈၼႃႈတီႈ လႄႈ ၸွမ်းလႅၼ်လိၼ် ဝႃႈၼႆ။

ဝၢႆးသေၼၼ်ႉ ၽူႈၵွၼ်းႁူင်းႁဵၼ်း ၸၼ်ႉသုင် ၶူးၼၢင်းမူၺ်ၶိူဝ်း သပ်းလႅင်းၼႄ လွင်ႈၵၢၼ်ႁဵၼ်းၵၢၼ်သွၼ် လႄႈ လုၵ်ႈႁဵၼ်း ဢွင်ႇပူၼ်ႉၸၼ်ႉ ၵူႈၸၼ်ႉၸၼ်ႉ သေဢမ်ႇၵႃး ၵႅမ်ၽူႈၸတ်းၵၢၼ် ၸုမ်းပွင်ၵၢၼ်ပၢႆႈပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး ၶူးၸၢႆးၵွၼ်ဝၼ်း ၵေႃႈ လႆႈမွၵ်ႇလၢတ်ႈပၼ်တၢင်းႁူႉ ပၼ်ႁႅင်းၸႂ်လုၵ်ႈႁဵၼ်း ဢၼ်ပဵၼ်ၸုပ်ႈၼွင်ႉၸုပ်ႈလင် ႁႂ်ႈမီးတၢင်းၶတ်းၸႂ် ႁဵၼ်းသွၼ်လႄႈ ႁႂ်ႈလႆႈပဵၼ်ဢဵၼ်ႁႅင်းတႃႇမုၵ်ႉၸုမ်း ၸိူဝ်ႉၸၢတ်ႈ ဝၢၼ်ႈမိူင်းၵႂႃႇ ဝႃႈၼႆ။

လုၵ်ႈႁဵၼ်းဢၼ်ဢွင်ႇပူၼ်ႉ ၸၼ်ႉငဝ်ႈ၊ ၸၼ်ႉၵၢင်၊ ၸၼ်ႉသုင် ၼႂ်းပီႊသွၼ်ႁဵၼ်း (2020-2021) ၸုပ်ႈ (3) မီး 93 ၵေႃႉ ၼႂ်းၼၼ်ႉ လုၵ်ႈႁဵၼ်းၸၼ်ႉငဝ်ႈ ဢၼ်ဢွင်ႇပူၼ်ႉၸၼ်ႉ မီး  34 ၵေႃႉ၊ ၸၼ်ႉၵၢင် 24 ၵေႃႉ၊ ၸၼ်ႉသုင် 14 ၵေႃႉ ႁူမ်ႈ ပႃးလုၵ်ႈႁဵၼ်းၼုမ်ႇႁၢၼ်ၸိုင်ႈမိူင်း  20 ၵေႃႉ လႄႈ လုၵ်ႈႁဵၼ်းတၢင်းလတ်းထႅင်ႈ 25 ၵေႃႉ  ႁူမ်ႈတင်းမူတ်း မီး 93 ၵေႃႉ ဝႃႈၼႆ။

တီႈၼႂ်းပၢင်ယိုၼ်ႈမွပ်ႈဝႂ်ယုၵ်ႉယွင်ႈ လုၵ်ႈႁဵၼ်းဢွင်ႇပူၼ်ႉၸၼ်ႉ ပီႊသွၼ်ႁဵၼ်း (2020-2021) ၸုပ်ႈ (3)  ၼၼ်ႉ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းလူင် ယွတ်ႈသိုၵ်း လႄႈ ၵႅမ်ႁူဝ်ပဝ်ႈ (2) ၸွမ်ႁၢၼ် ၶိူဝ်းငိုၼ်း၊ ၽူႈၼမ်းသိုၵ်း ၸဝ်ႈသိုၵ်းလူင် ဢွင်ႇမျႃႉ လႆႈယိုၼ်ႈမွပ်ႈဢၢပ်ႈပၼ် ဝႂ်ဢွင်ႇပူၼ်ႉၸၼ်ႉၵႂႃႇ ဝႃႈၼႆ။

သိုပ်ႇသေၼၼ်ႉ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်းပၼ်တၢင်းႁူႉၵႂႃႇဝႃႈ (1) ႁႂ်ႈမေႃၼပ်ႉယမ် ၶၢဝ်းယၢမ်း၊ (2) လူဝ်ႇမေႃၼပ်ႉယမ်ပေႃႈမႄႈ ၶူးသွၼ် လႄႈ ဝၢၼ်ႈမိူင်းႁဝ်း၊ (3) ႁဝ်းလူဝ်ႇႁူႉၵႃႈၶၼ်တူဝ်ႁဝ်း၊ (4) ႁဝ်းလူဝ်ႇမီးယိူင်းမၢႆ  ၼႆသေ သူင်ႇသင်ႇ ၶေႃႈၵႂၢမ်းလူပ်းလင်ၵႂႃႇယဝ်ႉ လုၵ်ႈႁဵၼ်းတင်းသဵင်ႈ ႁူမ်ႈႁွင်ႉဢတိၵ်ႉထၢၼ်ႇ ပၼ်ၵႂၢမ်းမၼ်ႈ လႄႈ ထႆႇၶႅပ်းႁၢင်ႈပဵၼ်တီႈမၢႆတွင်းသေ ပၢင်ယိုၼ်ႈမွပ်ႈဝႂ်ယုၵ်ႉယွင်ႈ လုၵ်ႈႁဵၼ်းဢွင်ႇပူၼ်ႉၸၼ်ႉ ပီႊသွၼ်ႁဵၼ်း (2020-2021) ၸုပ်ႈ (3)   ပဵၼ်ဢၼ်ယဝ်ႉတူဝ်ႈလီငၢမ်းၵႂႃႇ ယူႇယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း