ပၢင်ယိုၼ်ႈမွပ်ႈၸုမ်ႈၶူး ၶေႃးလိၵ်ႉသႃႇရိပုတ်ႉတ ပွၵ်ႈၵမ်း (6)

မိူဝ်ႈဝၼ်းထီႉ 22 May 2022 (လိူၼ်ႁူၵ်းလွင်ႈ 8 ၶမ်ႈ ပီႊတႆး 2116 ၼီႈ) ၶေႃးလိၵ်ႉသႃႇရိပုတ်ႉတ Sariputta College ၸတ်းႁဵတ်းပၢင်ယိုၼ်ႈမွပ်ႈၸုမ်ႈၶူး ၶေႃးလိၵ်ႉသႃႇရိပုတ်ႉတ ပွၵ်ႈၵမ်း (6) တီႈဝဵင်းမူႇၸေႊ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။

လုၵ်ႈႁဵၼ်းသင်ႇၶ လႄႈ လုၵ်ႈႁဵၼ်းၸၢႆး ဢၼ်ၶဝ်ႈမႃးႁပ်ႉဢဝ်ၸုမ်ႈၶူး တီႈပၢင် ယိုၼ်ႈမွပ်ႈၸုမ်ႈၶူး ၶေႃးလိၵ်ႉသႃႇရိပုတ်ႉတ ပွၵ်ႈၵမ်း (6) ၼႆႉ ပဵၼ်လုၵ်ႈႁဵၼ်း ဢၼ်ႁဵၼ်းယဝ်ႉ ၸၼ်ႉတီႇပလူဝ်ႇမႃႇ ပီႊ 2018 ၊ လုၵ်ႈႁဵၼ်း ဢၼ်ႁဵၼ်းယဝ်ႉ ၸၼ်ႉတီႇပလူဝ်ႇမႃႇ ပီႊ 2019 ၊ လုၵ်ႈႁဵၼ်း ဢၼ်ႁဵၼ်းယဝ်ႉ ၸၼ်ႉ B.A ပီႊ 2020 ၊ လုၵ်ႈႁဵၼ်း ဢၼ်ႁဵၼ်းယဝ်ႉ ၸၼ်ႉ B.A ပီႊ 2021 ႁူမ်ႈတင်းမူတ်း မီး (49) ၸဝ်ႈ/ၵေႃႉ ဝႃႈၼႆ။

သင်ႇၶၸဝ်ႈ ပႃးၼိုင်ႈ ဢၼ်လႆႈႁပ်ႉၸုမ်ႈၶူး တီႈပၢင်ယိုၼ်ႈမွပ်ႈၸုမ်ႈၶူး ၶေႃးလိၵ်ႉ သႃႇရိပုတ်ႉတ ပွၵ်ႈၵမ်း (6) ၼၼ်ႉ လဝ်ႈလၢတ်ႈၼႄဝႃႈ ဢၼ်လႆးမႃးၸတ်းႁဵတ်း ပၢင်ယိုၼ်ႈမွပ်ႈၸုမ်းၶူး ပီႊ 2022 ၼႆႉတႄႉၵေႃႈ ၵွပ်ႈပိူဝ်ႈ ပီႊ 2019-2020-2021 မႃးၼႆႉ ယွၼ်ႉငဝ်းလၢႆး ၸိူဝ်ႉမႅင်းတၢင်းပဵၼ်  COVID-19 လႄႈ လႆႈၵိုတ်းယင်ႉဝႆႉ ပၢင်ယိုၼ်ႈမွပ်ႈၸုမ်ႈၶူးသေ ၸင်ႇၶိုၼ်းမႃးႁူမ်ႈၵၼ် ၸတ်းႁဵတ်းလႆႈ ပီႊ 2022 ၼႆႉ၊ ယွၼ်ႉၼႆလႄႈ ၽူႈႁပ်ႉၸုမ်ႈၶူးၵေႃႈ ၸင်ႇမီးၼမ်၊ တေလႆႈဝႃႈ ပဵၼ်တီႈလီ ဢဝ်ၵုင်ႇမုၼ်တေႉတေႉ မၼ်းပဵၼ် College တႆးႁဝ်း သင်ႇၶၸဝ်ႈတႆး ၵူၼ်းတႆးႁဝ်းႁေ ႁဝ်းၵေႃႈမီးမႃးၽူႈဢွၼ်ႁူဝ် ၽႃႇသႃႇ သႃႇသၼႃႇ ၸိူဝ်ႉၶိူဝ်း ႁဝ်းၶႃႈၵေႃႈ ဝႃႈလႆႈၼၼ်ႉၶႃႈၼႃႇ၊ ၵွပ်ႈပိူဝ်ႈပၢႆးပၺ်ႇၺႃႇၼႆႉ လမ်ႇလွင်ႈတႃႇ ၵူႈတူင်ႇဝူင်း ၵူႈၽႃႇသႃႇ ၵူႈၸၢဝ်းၶိူဝ်း ၵူႈဝၢၼ်ႈမိူင်း လႄႈ တွၼ်ႈတႃႇတႆးႁဝ်းၼႆၵေႃႈ ပဵၼ်တီႈလီဢဝ်ၵုင်ႇမုၼ်တေႉတေႉ ဝႃႈၼႆ။

ၼႂ်းဝၼ်းၸတ်းႁဵတ်းပၢင်ယိုၼ်ႈမွပ်ႈၸုမ်ႈၶူး ၶေႃးလိၵ်ႉသႃႇရိပုတ်ႉတ ပွၵ်ႈၵမ်း (6) ၼႆႉၵူၺ်းၼင်ႇၵဝ်ႇ ယင်းမီးပႃး ပၢင်ယွင်ႈၵုင်ႇယေႃးမုၼ် ၸဝ်ႈဢၼ်ႁပ်ႉလႆႈ ၸုမ်ႈၶူး ၼွၵ်ႈမိူင်း (5) ၸဝ်ႈ မိူၼ်ၵၼ် ဝႃႈၼႆ။

တႆးလွတ်ႈလႅဝ်း