ပၢင်ၵုမ် ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် (PPST) (13/2021) ၸတ်းႁဵတ်းတၢင်း Online

မိူဝ်ႈၼႆႉ ဝၼ်းထီႉ 11 March 2021 (လိူၼ်သၢမ်လွင်ႈ 13 ၶမ်ႈ ပီႊတႆး 2115 ၼီႈ) ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း လိၵ်ႈႁူမ်ႈမၢႆၵိုတ်းတိုၵ်း ၸိုင်ႈမိူင်းပတ်းပိုၼ်ႉ (NCA-S EAO) ၸတ်းႁဵတ်းပၢင်ၵုမ် Online Video Conference ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် (PPST) (13/2021) ဝႃႈၼႆ။

ပၢင်ၵုမ် ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် (PPST) (13/2021) ၼႆႉ တႄႇၸတ်းႁဵတ်း မိူဝ်ႈၼႆႉ ယၢမ်းၵၢင်ၼႂ်သေ တေၸတ်းႁဵတ်းၵႂႃႇ တေႃႇထိုင် မိူဝ်ႈၽုၵ်ႈ ဝၼ်းထီႉ 12 March 2021 ၶၢဝ်းတၢင်း 2 ဝၼ်း ဝႃႈၼႆ။

ပၢင်ၵုမ် ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် (PPST) (13/2021) ၼႆႉ မီးၽူႈၶဝ်ႈၸုမ်း PPST ၶဝ်ႈႁူမ်ႈဢုပ်ႇဢူဝ်းသေ  ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင် ယွတ်ႈသိုၵ်း ပဵၼ်ပႃးႁူဝ်ၼႃႈ ၸုမ်းဢွၼ်ႁူဝ်ၼႃႈၵၢၼ်ငမ်းယဵၼ် (PPST) ၸူဝ်ႈၶၢဝ်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵုမ်ၵႂႃႇ  ဝႃႈၼႆ။

ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵုမ်ၵႂႃႇဝႃႈ ၵူၼ်းမိူင်းၵူႈၸၼ်ႉထၢၼ်ႈ ႁွင်ႉပၢဝ်ႇဝႃႈ တေလႆႈတိုၵ်းမူၺ်ႉလွၵ်းပိူင် ၸဝ်ႈဢႃႇၼႃႇသိုၵ်းႁႂ်ႈမူတ်းႁၢႆ၊ တေလႆႈပူတ်းယႃႉ မၢႆမီႈပိူင်ငဝ်ႈပိုင်းမိူင်း 2008 ၊ သုၼ်ႇလႆႈတီႇမူဝ်ႇၶရေႇသီႇ၊ တေလႆႈၵေႃႇတင်ႈမိူင်းႁူမ်ႈတုမ် ၾႅတ်ႇတရႄႇ တီႇမူဝ်ႇၶရေႇသီႇ၊ ႁႂ်ႈပွႆႇပၼ် ၵူၼ်းဢၼ်ထုၵ်ႇတီႉၺွပ်းဝႆႉတင်းသဵင်ႈၼႆသေ ၼႄၵၢင်ၸႂ်လူၺ်ႈလၢႆးၵတ်းယဵၼ် သၢၼ်ၶတ်းတပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈၼၼ်ႉ ၶွင်ႇသီႇသိုၵ်းမၢၼ်ႈသမ်ႉ ၸႂ်ႉလၢႆးႁုၵ်းႁၢႆႉ ယႃႉပၢင်ၼႄၵၢင်ၸႂ်သေဢမ်ႇၵႃး တင်ႈၸႂ်ယိုဝ်းၵွင်ႈသႂ်ႇ ၵူၼ်းၼႄၵၢင်ၸႂ်လႄႈ ႁဵတ်းႁႂ်ႈၵူၼ်းမိူင်း ဢၼ်ဢမ်ႇမီးတၢင်းၽိတ်းသင် လႆႈလူႉသဵင်ႈတၢႆ တင်းၼမ်ၼၼ်ႉ ယိၼ်းမွင်ၸႂ်ၸွမ်းတႄႉတႄႉ ဝႃႈၼႆ။ 

လွင်ႈၶွင်ႇသီႇသိုၵ်းမၢၼ်ႈ ၸႂ်ႉဢဵၼ်ႁႅင်းတင်းၼမ်၊ ၸႂ်ႉၶိူင်ႈယိပ်းၵွင်ႈၵၢင်ႇ ၼႂ်းပၢင်တိုၵ်းၵူႈသႅၼ်းသေ ဢဝ်လၢႆးႁုၵ်းႁၢႆႉ ယႃႉပၢင်ၼႄၵၢင်ၸႂ် တင်ႈၸႂ်ပိုတ်းယိုဝ်း ၵူၼ်းၼႄၵၢင်ၸႂ် လႄႈ ၵူၼ်းတူင်ႉၼိုင်ၶဝ်ႈပႃးၼႂ်း Civil Disobedience Movement  ၼၼ်ႉ ယူႇတီႈ PPST သၢၼ်ၶတ်းႁၢဝ်ႈႁၢဝ်ႈႁႅင်းႁႅင်းယူႇယဝ်ႉ။  

လွင်ႈဢၼ်တပ်ႉသိုၵ်းမၢၼ်ႈ တင်း ပလိၵ်ႈမၢၼ်ႈ လမ်းတီႉၺွပ်း ၵူၼ်းဢၼ်တူင်ႉၼိုင်ၶဝ်ႈပႃးၼႂ်း Civil Disobedience Movement  လႄႈ ၵူၼ်းၼႄၵၢင်ၸႂ်သၢၼ်ၶတ်း တပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈ ၽွင်းယၢမ်းၵၢင်ၶမ်ႈၵၢင်ၶိုၼ်း လူၺ်ႈဢမ်ႇၸွမ်းတြႃးၼၼ်ႉ တုၵ်းယွၼ်းႁႂ်ႈၵိုတ်းယိုတ်း လၢႆးႁဵတ်းသၢင်ႈၸိူဝ်းၼၼ်ႉသေ  ႁႂ်ႈၶိုၼ်းပွႆႇပၼ် ၵူၼ်းဢၼ်ထုၵ်ႇတီႉၺွပ်းဝႆႉတင်းသဵင်ႈ လႄႈ လွင်ႈၵူၼ်းမိူင်း ၼႄၵၢင်ၸႂ်သၢၼ်ၶတ်း လူၺ်ႈလၢႆးၵတ်းယဵၼ်ၼၼ်ႉၵေႃႈ ယႃႇပေဢဝ်သဵၼ်ႈတၢင်း လၢႆးႁုၵ်းႁၢႆႉသေ ယႃႉပၢင်ၼႄၵၢင်ၸႂ်  ဝႃႈၼႆ။ 

ၵွပ်ႈပိူဝ်ႈႁဝ်းၶႃႈၸုၵ်းမၼ်ႈ ယူႇၽၢႆႇပေႃႈမႄႈၵူၼ်းမိူင်းလႄႈ ႁဝ်းၶႃႈတေႁူမ်ႈမိုဝ်းၸုမ်းဢၼ် ၸုၵ်းမၼ်ႈႁဵတ်းသၢင်ႈတႃႇ ပေႃႈမႄႈၵူၼ်းမိူင်းသေ ၼင်ႇႁိုဝ်ပိူင်ဢႃႇၼႃႇသိုၵ်း ပေႃးတေမူတ်းႁၢႆၵႂႃႇၼၼ်ႉ ယူႇတီႈ PPST တေသိုပ်ႇႁဵတ်းသၢင်ႈၵႂႃႇ ဝႃႈၼႆ။

ၶေႃႈတႅပ်းတတ်း PPST လွင်ႈဢၼ်ဝႃႈ ယၢမ်းၽွင်းတေႃႈလဵဝ် တေၵိုတ်းလိုဝ်ႈဝႆႉ လွင်ႈႁူပ်ႉထူပ်းဢုပ်ႇဢူဝ်းတၢင်းၵၢၼ်မိူင်း တင်း တပ်ႉသိုၵ်းမၢၼ်ႈယိုတ်းဢၢမ်းၼၢတ်ႈ ၼၼ်ႉၵေႃႈ တေသိုပ်ႇၸုၵ်းမၼ်ႈၵႂႃႇ ဝႃႈၼႆ။

ၼႂ်းပၢင်ၵုမ်ၼႆႉ ႁဝ်းၶႃႈတေဢုပ်ႇဢူဝ်းၵၼ်ၵႂႃႇ ၵဵဝ်ႇၵပ်းလွင်ႈယၢပ်ႇၽိုတ်ႇတၢင်းၵၢၼ်မိူင်း ဢၼ်ပဵၼ်ယူႇယၢမ်းလဵဝ် လႄႈ တၢင်ႇလၢတ်ႈၼႄ ဢုပ်ႇဢူဝ်းၵၼ်သေ တမ်းဝၢင်းၶၵ်ႉၵၢၼ်ငၢၼ်း ဢၼ်တေၵႂႃႇတၢင်းၼႃႈ ၼႆယဝ်ႉ။

တႆးလွတ်ႈလႅဝ်း

Photo – NCA-S EAO