ပၢင်ၵုမ် PPST ယဝ်ႉတူဝ်ႈလီငၢမ်း

ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း လိၵ်ႈႁူမ်ႈမၢႆ NCA ၸတ်းႁဵတ်းပၢင်ၵုမ် ၸုမ်းၼႃႈၵၢၼ်ငမ်းယဵၼ် PPST တီႈၼႂ်းဝဵင်းၵဵင်းမႆႇ ၸိုင်ႈထႆး ၶၢဝ်းတၢင်း ႁိုင် 3 ဝၼ်း (2,3,4) သေ မီးၽူႈဢွၼ်ႁူဝ်ၽႂ်မၼ်း ၶိုၼ်ႈႁွတ်ႈဢုပ်ႇဢူဝ်းၵၼ် လႄႈ ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇ ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇ ၸုမ်းလူင်းလၢႆးမိုဝ်း NCA-S EAO ပႃးဝႆႉဝႃႈ လွင်ႈဢၼ် လူင်ပွင်ၸိုင်ႈမၢၼ်ႈ တေၵႂႃႇတေႃႇသူႈ ၵႄႈလိတ်ႈပၼ်ႁႃ ဢၼ်မိူင်းၵမ်ႇပီႇယႃႇ ပိုတ်ႇလွင်ႈဢဝ်တၢင်းၽိတ်း တီႈလုမ်းတႅပ်းတတ်းတြႃး ICJ ၼၼ်ႉ မၼ်းၼႄဝႃႈ လူင်ပွင်ၸိုင်ႈမၢၼ်ႈၵေႃႈ ႁပ်ႉဢဝ်ပုၼ်ႈၽွၼ်းယူႇ သေ ဢဝ်လွင်ႈမၢၼ်ႈမႅၼ်ႈၸိုဝ်ႈၸႂ်ႈ လႄႈ လွင်ႈၽဵင်ႇပဵင်း ဢွၵ်ႇၼႄ ၼႆယူႇယဝ်ႉ ၊ သင်မိူင်းႁူမ်ႈတုမ်မျၢၼ်ႇမႃႇ ႁဵတ်းသၢင်ႈလႆႈၸွမ်းၼင်ႇ ၶေႃႈမၼ်ႈၵႅၼ်ႇ ဢၼ်လႆႈလူင်းလၢႆးမိုဝ်းၸွမ်း ၵူႈမိူင်းမိူင်း လႄႈသင် ၊ သင်ၽေႃႇၼမ်ႉၽေႃႇတူဝ် ၼႄလႆႈ လွင်ႈၽွမ်ႉႁူမ်ႈၸိူဝ်ႉၸၢတ်ႈ လႄႈ လွင်ႈငမ်းယဵၼ် ၼႂ်းမိူင်းၼႆၸိုင် ၼႂ်းတူင်ႇဝူင်းၵူႈမိူင်းမိူင်းၼၼ်ႉ မိူင်းႁူမ်ႈတုမ်မျၢၼ်ႇမႃႇၵေႃႈ တေမီးၸိုဝ်ႈသဵင်မႃး ၼႆယူႇ။

ဝၢႆးပၢင်ၵုမ် PPST ယဝ်ႉတူဝ်ႈၼၼ်ႉ ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 2 ၶွင်ႇသီႇဢဝ်ၶိုၼ်းၸိုင်ႈတႆး RCSS လၢတ်ႈဝႃႈ “ၼႂ်းပၢင်ၵုမ်ၼႆႉ လႆႈဢုပ်ႇၵၼ် လွင်ႈတႃႇတေၶိုၼ်းမႄးပိူင်ၶွတ်ႇၽွတ်ႈ PPST, JMC, PPWT ၸိူဝ်းၼႆႉ ယွၼ်ႉဝႃႈ မိူဝ်ႈဢွၼ်တၢင်း ၸုမ်းလူင်းလၢႆးမိုဝ်း NCA မီး 8 ၸုမ်းၵူၺ်းလႄႈ မိူဝ်ႈလဵဝ်သမ်ႉ မီးမႃး 10 ၸုမ်းယဝ်ႉသေ ၼင်ႇႁိုဝ်ႁဝ်းၶႃႈ ပေႃးတေႁူမ်ႈၵၼ်ၵႂႃႇလႆႈတၢင်းၼႃႈၼၼ်ႉ တေၶႂ်ႈမႄးၽိူမ်ႉထႅမ် ထွၼ်ၸိူင်ႉႁိုဝ် ၸိူဝ်းၼႆႉယူႇ ၊ လႆႈဢုပ်ႇဢူဝ်းပႃး လွင်ႈပၢင်ၵုမ် JICM (ပၢင်ၵုမ်ၽူႈၼမ်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 10 ၸုမ်း လႄႈ ၸုမ်းလူင်ပွင်ၸိုင်ႈ) ၊ လွင်ႈပၢင်ၵုမ်လူင် 21 ႁူဝ်ပၢၵ်ႇပီႊ ပွၵ်ႈၵမ်း 4 လႄႈ ၶၵ်ႉၵၢၼ်ငမ်းယဵၼ် ဢၼ်တေၵႂႃႇတၢင်းၼႃႈၼႆႉ” လၢတ်ႈၼႄၼင်ႇၼႆ။

မိူဝ်ႈဝၼ်းထီႉ 10 October 2019 ၼၼ်ႉၵေႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း လိၵ်ႈႁူမ်ႈမၢႆ NCA ၸတ်းႁဵတ်းပၢင်ၵုမ် PPST တီႈၼႂ်းဝဵင်းၵဵင်းမႆႇ ၸိုင်ႈထႆးမိူၼ်ၵၼ်။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း