ပၢင်ၶိုၼ်ႈၵျွင်းလွင်းမွၵ်ႇ ဝၼ်းႁပ်ႉသၢင်းၵျၢၼ်ႇ ငဝ်ႈၸိုင်ႈ လွႆတႆးလႅင်း

မိူဝ်ႈၼႆႉဝၼ်းထီႉ 13 April 2023 (လိူၼ်ႁႃႈလွင်ႈ 9 ၶမ်ႈ ပီႊတႆး 2117 ၼီႈ) ယူႇတီႈၽူႈယႂ်ႇၵူၼ်းလူင် ၼႂ်းမုၵ်ႉၸုမ်းၶွင်ႇသီႇဢဝ်ၶိုၼ်းၸိုင်ႈတႆး (RCSS) လႄႈပေႃႈမႄႈၵူၼ်းမိူင်း ဢိၵ်ႇပႃး ၵူၼ်းသိုၵ်းဢၼ်ယူႇသၢင်ႈသဝ်းတီႈငဝ်ႈၸိုင်ႈ လွႆတႆးလႅင်း ဢွၼ်ၵၼ်ၶိုၼ်ႈၵျွင်းလွင်းမွၵ်ႇ ၼႂ်းဝၼ်းႁပ်ႉသၢင်းၵျၢၼ်ႇ (ပီႊၵဝ်ႇ) ဢွင်ႈတီႈဝတ်ႉလႅင်းႁၢၼ်တႆး ဝႃႈၼႆ။

ပၢင်ၶိုၼ်ႈၵျွင်းလွင်းမွၵ်ႇၼႆႉ ယူႇတီႈတၵႃႇသထႃးၶဝ် ဢဝ်တင်းၶဝ်ႈမုၼ်းၶဝ်ႈပွင်း၊ ၶိူင်ႈလူႇၶူဝ်းတၢၼ်းလၢႆၸိူဝ်ႉလၢႆပိူင် မႃးလူႇတၢၼ်း ယွၼ်းၽွၼ်းမင်ႇၵလႃႇ၊ ႁပ်ႉၶၢမ်ႇသိၼ်ႁႃႈ ၵႂႃႇပဵၼ်ၸုပ်ႈပဵၼ်ၸုပ်ႈ ၼႆယဝ်ႉ။

ပေႃးထိုင်မႃးၼႂ်းဝၼ်းႁပ်ႉသၢင်းၵျၢၼ်ႇ သူင်ႇသင်ႇပီႊၵဝ်ႇၼႆႉ ပီႈၼွင်ႉၵူၼ်းမိူင်း ၼႂ်းၸိုင်ႈတႆးႁဝ်းၶႃႈ ၵူႈတီႈၵူႈတၢင်းၵေႃႈ ၸွမ်းၼင်ႇၾိင်ႈထုင်းႁိၵ်ႈႁွႆးမီးဝႆႉၼၼ်ႉသေ တေဢွၼ်ၵၼ်ၶိုၼ်ႈၵျွင်းလွင်းမွၵ်ႇ ယွၼ်းၽွၼ်းမင်ႇၵလႃႇႁဵတ်းတၢင်းလီၵုသူဝ်ႇမိူၼ်ၵၼ်ၼႆယဝ်ႉ။

တႆးလွတ်ႈလႅဝ်း