ပၢႆႇတႅၼ်ႇ ၽွမ်ႉသူင်ႇသိုၵ်းၶဝ်ႈၵႅတ်ႇၶႄထႆႇဝၼ်ႇ သင်ထုၵ်ႇပူၼ်ႉပႅၼ်

ၸွမ်ၸိုင်ႈဢမေႇရိၵၢၼ်ႇ ၵျူဝ်း ပၢႆႇတႅၼ်ႇ လၢတ်ႈ တေသူင်ႇႁႅင်းသိုၵ်းၶဝ်ႈထႆႇဝၼ်ႇ တႃႇၵႅတ်ႇၶႄၵၢၼ်ထုၵ်ႇၶဝ်ႈမႃးပူၼ်ႉပႅၼ် လႄႈ ၽၢႆႇတၢင်းၶႄႇၵေႃႈ တူၺ်းႁၼ်ဝႃႈ ပဵၼ်လွင်ႈဢၼ်ၽိတ်းတေႃႇ ပိူင်ၵၢၼ်ဢုပ်ႉပိူင်ႇ ဢၼ်မီးၼိူဝ်ထႆႇဝၼ်ႇၼၼ်ႉ ႁၢဝ်ႈႁႅင်း ၼႆယူႇ။

မိူဝ်ႈဝၼ်းထီႉ 18 September 2022  ၵျူဝ်း ပၢႆႇတႅၼ်ႇ ပိုတ်ႇလၢတ်ႈၼႄတီႈ သိုဝ်ႇ CBS ဝႃႈ  ပေႃးဝႃႈထုၵ်ႇၶႄႇၶဝ်ႈပူၼ်ႉပႅၼ်ထႆႇဝၼ်ႇၸိုင် တပ်ႉသိုၵ်းဢမေႇရိၵၢၼ်ႇ ၽွမ်ႉတူဝ်ႈတၼ်းတႃႇသူင်ႇသိုၵ်းၶဝ်ႈၸွႆႈထႅမ်ထႆႇဝၼ်ႇၵႂႃႇ ဝႃႈၼႆ။

လွင်ႈၼႆႉ ၵျူဝ်း ပၢႆႇတႅၼ်ႇ လႆႈတွပ်ႇၵႂႃႇ မိူဝ်ႈသိုဝ်ႇၶၢဝ်ႇထၢမ်ဝႃႈ ဢမေႇရိၵၢၼ်ႇ ၸွင်ႇတေၸၢင်ႈသူင်ႇဢဵၼ်ႁႅင်းသိုၵ်း ၵႂႃႇၸွႆႈထႆႇဝၼ်ႇႁိုဝ် ၼႆလႄႈ ၸင်ႇလႆႈတွပ်ႇၵႂႃႇၸိူင်ႉၼၼ် ဝႃႈၼႆ။

လွင်ႈဢၼ် ပၢႆႇတႅၼ်ႇ တွပ်ႇၵႂၢမ်းထၢမ်ၼႆႉ လၢတ်ႈလႆႈဝႃႈ ပဵၼ်လွင်ႈဢၼ် ပိုၼ်ၽၢဝ်ႇၸႅင်ႈလႅင်း ၼႂ်းၵၢၼ်ၵမ်ႉထႅမ်ထႆႇဝၼ်ႇ ထိုင်ပၼ်ႁႃလွင်ႈၶဵင်ႈၶႅင်ၵၼ် ၵႄႈၵၢင်ထႆႇဝၼ်ႇလႄႈၶႄႇ။ ၸွမ်းလူၺ်ႈ ၽၢႆႇတၢင်းဢမေႇရိၵၢၼ်ႇၼၼ်ႉ မီးပိူင်ၵၢၼ်ဢမ်ႇၸႅင်ႈလႅင်းလႄႈ ဢမေႇရိၵၢၼ်ႇၵေႃႈ ယင်းဢမ်ႇယၢမ်ႈဢွၵ်ႇမႃး ပိုၼ်ၽၢဝ်ႇႁႂ်ႈၸႅင်ႈလႅင်းထိုင် လွင်ႈဢၼ်ဝႃႈ တေသူင်ႇသိုၵ်းၶဝ်ႈၵႂႃႇၸွႆႈထႅမ် ထႆႇဝၼ်ႇ သင်ၸိူဝ်ႉဝႃႈမီးလွင်ႈၶဝ်ႈတိုၵ်းထႆႇဝၼ်ႇမႃးၼႆၼၼ်ႉယဝ်ႉ။

ၸိူင်ႉႁိုဝ်ၵေႃႈလီ ၽူႈတၢင်လၢတ်ႈတီႈႁိူၼ်းႁေႃၶၢဝ်ၵေႃႈ ဢွၵ်ႇမႃးလၢတ်ႈဝႃႈ ပႅၵ်ႉသမ်ႉ ၸွမ်ၸိုင်ႈ ၵျူဝ်း ပၢႆႇတႅၼ်ႇ ဢွၵ်ႇမႃးပိုၼ်ၽၢဝ်ႇ ၽွမ်ႉတူဝ်ႈတၼ်း တႃႇသူင်ႇဢဵၼ်ႁႅင်းသိုၵ်း ၵႂႃႇၸွႆႈထႅမ်ထႆႇဝၼ်ႇၼႆသေတႃႉ ၵူၺ်းၵႃႈ ပိူင်ၵၢၼ်ဢၼ် ဢမေႇရိၵၢၼ်ႇ မီးၼိူဝ်ထႆႇဝၼ်ႇၼၼ်ႉၵေႃႈ ယင်းဢမ်ႇမီးလွင်ႈလႅၵ်ႈလၢႆႈ၊ လိူဝ်ၼၼ်ႉ ယင်းလၢတ်ႈထိုင်ပႃး လွင်ႈဢၼ် ပၢႆႇတႅၼ်ႇ ပိုၼ်ၽၢဝ်ႇမိူဝ်ႈႁူဝ်ပီႊ ပူၼ်ႉမႃးၼၼ်ႉဝႃႈ တေသူင်ႇသိုၵ်းၵႂႃႇၸွႆႈထႆႇဝၼ်ႇယူႇသေတႃႉ ၽၢႆႇတၢင်းပိူင်ၵၢၼ်ၶွင်ဢမေႇရိၵၢၼ်ႇ မီးၼိူဝ်ထႆႇဝၼ်ႇၼၼ်ႉၵေႃႈ ဢမ်ႇလႅၵ်ႈလၢႆႈ မိူၼ်ၵၼ် ၼႆယဝ်ႉ။

ၽၢႆႇတၢင်းၽွင်းလူင်ၽၢႆႇၼွၵ်ႈမိူင်းထႆႇဝၼ်ႇၵေႃႈ ဢွၵ်ႇမႃးယိၼ်းၸူမ်းၶွပ်ႈၸႂ်ထိုင် ၸွမ်ၸိုင်ႈ ၵျူဝ်း ပၢႆႇတႅၼ်ႇ ဢၼ်ယိုၼ်ယၼ်ၵမ်ႉထႅမ်ႁႅင်း လွင်ႈဢၼ်လူင်ပွင်ၸိုင်ႈဢမေရိၵၢၼ်ႇ မီးၼိူဝ်ထႆႇဝၼ်ႇၼၼ်ႉယူႇ၊ ၽၢႆႇတင်းထႆႇဝၼ်ႇၵေႃႈ ယင်းတေတိူဝ်းၼမ်ႉၵတ်ႉ တႃႇၵႅတ်ႇၶႄတူဝ်ၵဝ်ႇ ၵႂႃႇထႅင်ႈလႄႈ တေႁူမ်ႈမိုဝ်း ၵဵဝ်ႇလူၺ်ႈလွင်ႈလွတ်ႈၽေး ၸွမ်းဢမေႇရိၵၢၼ်ႇ ႁႂ်ႈၵႅၼ်ႇၶႅင်မႃးထႅင်ႈလိူဝ်ၵဝ်ႇ ဝႃႈၼႆ။

ၽူႈတၢင်လၢတ်ႈမိူင်းၶႄႇၵေႃႈ ဢွၵ်ႇမႃးလၢတ်ႈထိုင် တၢင်းႁၼ်ထိုင် ၵျူဝ်း ပၢႆႇတႅၼ်ႇ ဢၼ်ဝႃႈ တေၵႅတ်ႇၶႄထႆႇဝၼ်ႇၼၼ်ႉ ပဵၼ်ၶေႃႈၵႂၢမ်းဢၼ်ပူၼ်ႉပႅၼ်ဢႃႇၼႃႇ ပိူင်ဢုပ်ႉပိူင်ႇဢၼ်ႁၢႆႉႁႅင်းလႄႈ ပဵၼ်ၵၢၼ်ပူၼ်ႉပႅၼ်တေႃႇပိူင်ၵၢၼ် ၶွင်မိူင်းၸဝ်ႈၵဝ်ႇ ဢၼ်လၢတ်ႈယူႇတႃႇသေႇၼၼ်ႉဝႃႈ ယွမ်းႁပ်ႉမိူင်းၶႄႇ ပဵၼ်ၸိုင်ႈလဵဝ်ၼၼ်ႉသေ ပဵၼ်ၵၢၼ်ပူၼ်ႉပႅၼ်ၵႂၢမ်းမၼ်ႈဢၼ်ဢမေႇရိၵၢၼ်ႇ ပၼ်ဝႆႉဝႃႈ တေဢမ်ႇၵမ်ႉထႅမ် လွင်ႈလွတ်ႈလႅဝ်းၶွင်ထႆႇဝၼ်ႇၼႆၼၼ်ႉသေ လွင်ႈဢၼ်ၸွမ်ၸိုင်ႈ ပၢႆႇတႅၼ်ႇ လၢတ်ႈၼႆႉ ပဵၼ်ၵၢၼ်ပၼ်ၾၢင်ႉ ဢၼ်ၽိတ်းပိူင်ႈ ႁၢႆႉႁႅင်းမႃးတေႉတေႉ တေႃႇထိုင်ၸႅၵ်ႇၽႄလႅၼ်လိၼ်ထႆႇဝၼ်ႇၼၼ်ႉ ဝႃႈၼႆ။

ၽၢႆႇတၢင်းဢမေႇရိၵၢၼ်ႇၼၼ်ႉ မီးလွင်ႈၸမ်ၸႂ်ၵၼ်တင်း ၵၢၼ်ၽွင်းတၢင်ၶႄႇမႃး ဝၢႆးသေၵိုတ်းလိုဝ်ႈလွင်ႈၸမ်ၸႂ်တင်း ၵၢၼ်ၽွင်းတၢင်ၸွမ်းထႆႇဝၼ်ႇၵႂႃႇ မိူဝ်ႈ 1979 ၼၼ်ႉယူႇ။ ၵူၺ်းၵႃႈ ယင်းပဵၼ်ဢူၺ်းလီဢၼ်လမ်ႇလွင်ႈ ၸွမ်းထႆႇဝၼ်ႇလႄႈ ထိင်းသိမ်းလွင်ႈၸမ်ၸႂ်တင်း ၵၢၼ်ၽွင်းတၢင်ၸွမ်းလူင်ပွင်ၸိုင်ႈထႆႇဝၼ်ႇယူႇ။ လွင်ႈၶဵင်ႈၶႅင် ဢမေႇရိၵၢၼ်ႇလႄႈၶႄႇၼၼ်ႉၵေႃႈ ၶိုၼ်းပူၵ်းတိုၼ်ႇၶိုၼ်ႈမႃးထႅင်ႈ ၵမ်းၼိုင်ႈ ဝၢႆးသေ Nancy Pelosi ႁူဝ်ပဝ်ႈသၽႃးတႅၼ်းၽွင်းၵူၼ်းမိူင်း ဢမေႇရိၵၢၼ်ႇ ဢွၵ်ႇၶၢဝ်းတၢင်းမႃးထႆႇဝၼ်ႇၼၼ်ႉ ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း