ပႃႇတီႇ မိူင်းမွၼ်းမႂ်ႇ ပၼ်ၶေႃႈမၼ်ႈဝႃႈ တေသိုပ်ႇယိပ်းၵွင်ႈၵႂႃႇ Wednesday, 02 March 2011 13:16

ၽူႈၼမ်း ပႃႇတီႇ မိူင်းမွၼ်းမႂ်ႇ MNSP လၢတ်ႈဝႃႈ ၸုမ်းၶဝ် တေဢမ်ႇ ဝၢင်းၶိူင်ႈ၊ တႃႇၵူၼ်းမိူင်း တူဝ်ၵဝ်ႇ လႆႈလွင်ႈ ပူတ်းပွႆႇၼႆႉ တေသိုပ်ႇ ၶဝ်ႈပွႆးတိုၵ်း ၵႂႃႇဝႃႈၼႆ။

ၼႂ်းပၢင်ၵႅဝ်ႈ ပွႆးဝၼ်း ၸိူဝ်ႉၸၢတ်ႈမွၼ်း ၶွပ်ႈၶူပ်ႇ 64ပီႊ ဢၼ်ၸတ်းႁဵတ်း တီႈငဝ်ႈငုၼ်း MNSP လႄႈ ၵူၼ်းမိူင်း 1000 ပၢႆ ၶိုၼ်ႈႁွတ်ႈၼၼ်ႉ ၼၢႆႇရွတ်ႉသ ၵေႃႉပဵၼ်ၵႅမ် ႁူဝ်ပဝ်ႈ ပႃႇတီႇ မိူင်းမွၼ်းမႂ်ႇ လၢတ်ႈဝႃႈ “ဢၼ်ႁဝ်းၶႃႈ တူၵ်းလူင်း ၵိုတ်းသိုၵ်းၼၼ်ႉ ပဵၼ်တႃႇ ၵႄႈၶႆ ပၼ်ႁႃ ၵၢၼ်မိူင်း ႁဝ်းၶႃႈ လူၺ်ႈလၢႆး ၵတ်းယဵၼ်၊ ၵူၺ်းၵႃႈ ႁဝ်းၶႃႈ ဢမ်ႇလႆႈသုၼ်ႇ တႃႇၵႄႈၶႆ ၸိူင်ႉၼၼ်၊ ၸုမ်း သိုၵ်းမၢၼ်ႈ ၶႂ်ႈႁႂ်ႈ ႁဝ်းၶႃႈ ဝၢင်းၶိူင်ႈ လုမ်းလုမ်းၵူၺ်း၊ ႁဝ်းၶႃႈ တိုၼ်းဢမ်ႇ ႁဵတ်းလႆႈ ၸိူင်ႉၼၼ်၊ ႁဝ်းၶႃႈ တေႁူမ်ႈမိုဝ်း တင်းၵူၼ်း မိူင်းႁဝ်းၶႃႈလႄႈ ယိပ်းတင်းၵွင်ႈသေ တေတိုၵ်းတႃႇ လွင်ႈပူတ်းပွႆႇ ႁဝ်းၶႃႈ” ၼႆယူႇ။

တင်ႈတႄႇ ၸုမ်းသိုၵ်းမၢၼ်ႈ ယႃႉလႅဝ် ၶေႃႈလႆႈၸႂ် ၵိုတ်းသိုၵ်း ယဝ်ႉၼၼ်ႉ ပႃႇတီႇ မိူင်းမွၼ်းမႂ်ႇ ၵေႃႈလႆႈ ႁၢင်ႈႁႅၼ်း တႃႇပၢင်တိုၵ်း ဝႆႉ၊ ယၢမ်းလဵဝ် သိုၵ်းၵဝ်ႇၶဝ် ၸိူဝ်းၵိုတ်းလိုဝ်ႈ ဝႆႉၼၼ်ႉၵေႃႈ ၶဝ်ၶိုၼ်းႁွင်ႉ မႃးႁၢပ်ႇထၢမ်း ၵၢၼ်သိုၵ်းၶိုၼ်း၊ တေႃႇထိုင်မိူဝ်ႈလဵဝ် မီးသိုၵ်းၵဝ်ႇ 100 ပၢႆမႃး ႁၢပ်ႇထၢမ်းၵၢၼ် ၶိုၼ်းယဝ်ႉ ဝႃႈၼႆ။

ၽူႈမီးၸၼ်ႉ NMSP ၸဝ်ႈၼိုင်ႈ လၢတ်ႈဝႃႈ တႃႇထိုင် ယိူင်းမၢႆၼၼ်ႉ ၸုမ်းၶဝ် တေၸႂ်ႉ လၢႆးသိုၵ်း မုတ်းသေတိုၵ်း၊ ၽၢႆႇၼိုင်ႈၵေႃႈ တေၽိုၵ်းၽွၼ်ႉ ၸုမ်းမိုဝ်းမႅၼ်ႈ ဝႆႉပႃး ၼႆယူႇ။

မၼ်းၸဝ်ႈ သိုပ်ႇလၢတ်ႈဝႃႈ “ႁဝ်းၶႃႈ မီးသိုၵ်း မွၵ်ႈ1000၊ ၼႂ်းၼၼ်ႉ ႁဝ်းၶႃႈ ထတ်းလိူၵ်ႈဢဝ် 200 သေ ၽိုၵ်းၽွၼ်ႉ ပဵၼ်ၸုမ်း သိုၵ်းမုတ်း ၶိုၵ်ႉတွၼ်းလႆႈ” ဝႃႈၼႆ။

ၶေႃႈမွၵ်ႇ လၢတ်ႈၵႂၢမ်း ဢၼ်ၽူႈၼမ်း NMSP ၶဝ်လၢတ်ႈၵႂႃႇ ၼႂ်းပွႆးဝၼ်း ၸိူဝ်ႉၸၢတ်ႈမွၼ်း ပီႊၼႆႉၼႆႉ မၼ်းပႅၵ်ႇပိူင်ႈ ၵၼ်တင်း ဢၼ်လႆႈလၢတ်ႈ မႃးမိူဝ်ႈ ၵူႈပွၵ်ႈ တႄႉတႄႉ၊ ၵူႈပွၵ်ႈတႄႉ ၽူႈၼမ်း မွၼ်းၶဝ် ဢမ်ႇတွၼ်ႉလၢတ်ႈ လွင်ႈတေ တုမ်ႉတိူဝ်ႉ ၸုမ်းသိုၵ်းမၢၼ်ႈ၊ ပီႊၼႆႉတႄႉ လၢတ်ႈလွင်ႈ သၢၼ်ၶတ်ႈ ၸုမ်းသိုၵ်း မၢၼ်ႈပႃး၊ ၼႆႉပွင်ႇဝႃႈ လွင်ႈၶဵင်ႈၶႅင် ၼႂ်းၵႄႈ ၸုမ်းသိုၵ်းမၢၼ်ႈ တင်းပႃႇတီႇ မိူင်းမွၼ်းမႂ်ႇ တိူဝ်းၼမ်မႃး ႁၢဝ်ႈႁႅင်း ၼႆယူႇ။

ၼၢႆႇႁၢၼ်ႇသႃႇ ၵေႃႉပဵၼ် ၽူႈၼမ်းၼႂ်း ပႃႇတီႇ မိူင်းမွၼ်းမႂ်ႇ လၢတ်ႈဝႃႈ “သင်ဝႃႈ ၸုမ်းသိုၵ်းမၢၼ်ႈ ဢဝ်တင်း ၵွင်ႈၵၢင်ႇသေ တေၽဵဝ်ႈမူၺ်ႉ ႁဝ်းၶႃႈၸိုင် ၽၢႆႇႁဝ်း ၶႃႈၵေႃႈ တူဝ်ႈတၼ်း တႃႇယႃႉ ၽျၢၵ်ႈၶဝ်လူၺ်ႈ ၵွင်ႈၵၢင်ႇယူႇ” ဝႃႈၼႆ။

ပႃႇတီႇ မိူင်းမွၼ်းမႂ်ႇၼႆႉ လႆႈၵိုတ်းသိုၵ်း တင်းၸုမ်း သိုၵ်းမၢၼ်ႈ မိူဝ်ႈပီႊ 1995၊ ၵူၺ်းၵႃႈ ဝၢႆးၸုမ်းၶဝ် ဢမ်ႇယွမ်း ႁဵတ်းပဵၼ် တပ်ႉပႂ်ႉ လႅၼ်လိၼ် ဢၼ်ၸုမ်း သိုၵ်းမၢၼ်ႈ တုၵ်းယွၼ်း မိူဝ်ႈလိူၼ် June ပီႊၵၢႆၼၼ်ႉ လွင်ႈၵိုတ်းသိုၵ်းၵေႃႈ လႆႈလုလႅဝ် ၵႂႃႇပႅတ်ႈ။

ၶေႃႈမုၼ်း တီႈIrrawaddy။
တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း