မၢၵ်ႇတႅၵ်ႇတီႈလုမ်းၽၢႆႇဢုပ်ႉပိူင်ႇၵူႈလွင်ႈလွင်ႈ

မိူဝ်ႈဝၼ်းထီႉ 30 October 2022 (လိူၼ်သိပ်းသွင်မႂ်ႇ 7 ၶမ်ႈ ပီႊတႆး 2116) ၼီႈ မၢၵ်ႇတႅၵ်ႇတီႈလုမ်းၽၢႆႇဢုပ်ႉပိူင်ႇၵူႈလွင်ႈလွင်ႈ ဢၼ်မီးတီႈပွၵ်ႉဢေႇယႃႇ ဝဵင်းၸေႊၼႃး ၸႄႈမိူင်းၶၢင်သေ မီးၵူၼ်းတၢႆၵေႃႉၼိုင်ႈ။

ၵူၼ်းမိူင်းၼႂ်းပွၵ်ႉဢေႇယႃႇ လၢတ်ႈၼႄတီႈ RFA ဝႃႈ မိူဝ်ႈယၢမ်းၵၢင်ၶမ်ႈမွၵ်ႈ 18:00 မူင်းပၢႆၼၼ်ႉ တီႈလုမ်းၽၢႆႇဢုပ်ႉပိူင်ႇၵူႈလွင်ႈလွင်ႈ မီးလွင်ႈမၢၵ်ႇတႅၵ်ႇႁၢဝ်ႈႁႅင်းဝႆႉ၊ ပဵၼ်ႁွႆးမိုဝ်းၸုမ်းလႂ်ႁဵတ်းသၢင်ႈၼႆၼၼ်ႉ ဢမ်ႇလႆႈႁူႉ၊ ၵူၼ်းၽၢႆႇၾႆးၾႃႉၶဝ် ၸိုဝ်ႈႁွင်ႉ ပူးၵႃး ၼၼ်ႉၵေႃႈ သမ်ႉၵႂႃႇသူင်ႇ Battery တီႈလုမ်းၼၼ်ႉသေ ၸၢၵ်ႇမၢၵ်ႇ လႆႈတိူဝ်ႉၸပ်းမၼ်း လႄႈ လႆႈတၢႆၵႂႃႇယဝ်ႉ ဝႃႈၼႆ။

ၵဵဝ်ႇလူၺ်ႈလွင်ႈမၢၵ်ႇတႅၵ်ႇၼႆႉသေ ဢမ်ႇပႆႇလႆႈႁၼ်ၽၢႆႇသိုၵ်းမၢၼ်ႈ ဢွၵ်ႇမႃးလၢတ်ႈ သင်ၸွမ်း၊ ဝၢႆးသေသိုၵ်းမၢၼ်ႈယိုတ်းမိူင်းမႃးၼႆႉ ဢွင်ႈတီႈႁဵတ်းၵၢၼ်လုမ်း သိုၵ်းမၢၼ်ႈ လႄႈ ၶွၵ်ႈၶင် ၸိူဝ်းၼႆႉ မၢၵ်ႇၵႆႉတႅၵ်ႇၼႃႇ လႄႈ မီးၵူၼ်းမိူင်းၼႂ်းပိုၼ်ႉတီႈ လႆႈလူႉတၢႆၸွမ်းၵေႃႈမီး ၼႆယဝ်ႉ။

တႆးလွတ်ႈလႅဝ်း