မၢၵ်ႇၵူဝ်ႈ(မၢၵ်ႇၵေႃႈ) မီးၽွၼ်းလီတေႃႇ ပၢႆးယူႇလီၸိူင်ႉႁိုဝ်?

မၢၵ်ႇၵူဝ်ႈၼႆႉ မၼ်းတေမီးၼမ်ႉၼမ်သေ မီးပႃးဢရသႃႇ(ၼမ်ႉလႅမ်ႉ) ၸဵမ်းၸဵမ်းဝႆႉလႄႈ ၼိုင်ႈၸႄႈၵတ်းၵႃႈႁိုဝ်ၵေႃႈ ၼိုင်ႈၵတ်းယဵၼ်ၸိုၼ်ႈပၢင်ႇၵႃႈ ၼၼ်ႉယဝ်ႉ။ ၼွၵ်ႈလိူဝ်သေၼႆႉ မၼ်းယင်းမီးၽွၼ်းလီ တေႃႇတူဝ်ၶိင်းထႅင်ႈတင်းၼမ်တၢင်းလၢႆ ၵွပ်ႈၼၼ်လႄႈ ႁဝ်းမႃးတူၺ်းၸွမ်းၵၼ်ဝႃႈ ၽွၼ်းလီမၼ်းတေမီးသင်လၢႆလၢႆ ဢၼ်ဝႃႈၼၼ်ႉ။

1. ၵႄႈၶေႃးႁႅင်ႈ ၽိဝ်ႇလူမ်းမႆႈ

ယွၼ်ႉၼႂ်းမၢၵ်ႇၵူဝ်ႈၼၼ်ႉ မၼ်းတေမီးထၢတ်ႈၼမ်ႉၼမ်လႄႈ မၼ်းၸင်ႇၸၢင်ႈၵႂႃႇ ၵႄႈပၼ်လွင်ႈၶေႃးႁႅင်ႈ ၽိဝ်ႇလူမ်းမႆႈ သင်ၸိူဝ်ႉပဵၼ်မိူဝ်ႈၶၢဝ်းမႆႈ ဢမ်ႇၼၼ် မိူဝ်ႈၽွင်းမႆႈႁႅင်းၼၼ်ႉ သင်ၵိၼ်ပၼ်မၢၵ်ႇၵူဝ်ႈၵတ်းၵတ်းၼႆ တေႁဵတ်းႁႂ်ႈၸိုၼ်ႈ ပၢင်ႇလႆႈလီ ၼၼ်ႉယဝ်ႉ။

2. ႁဵတ်းႁႂ်ႈၽၢႆႈလႆႈလီ

ၼႂ်းမၢၵ်ႇၵူဝ်ႈၼၼ်ႉ မၼ်းတေမီးၵၢၵ်ႇယႂ်းၼမ်လႄႈ သင်ၸိူဝ်ႉၽူႈၸိူဝ်းပဵၼ် တွင်ႉပိၵ်ႉၼၼ်ႉ ၵိၼ်လူင်းၵႂႃႇပေႃးၼႆၸိုင် မၼ်းတေၵႂႃႇၸွႆႈၵႄႈပၼ် လွင်ႈတွင်ႉပိၵ်ႉ၊  ယွၼ်ႉပိူဝ်ႈ Fiber ဢၼ်မီးၼႂ်းမၢၵ်ႇၵူဝ်ႈၼၼ်ႉ တေၸွႆႈႁဵတ်းႁႂ်ႈ ၽၢႆႈလႆႈလီ ၼၼ်ႉယဝ်ႉ။

3. ၽိူမ်ႉထႅမ်ပၼ်ႁႅင်းၶၢမ်ႇတူဝ်ၶိင်း

Vitamin-C ဢၼ်မီးၼႂ်းမၢၵ်ႇၵူဝ်ႈၼၼ်ႉ မၼ်းတေၸွႆႈၽိူမ်ႉထႅမ်ပၼ်ႁႅင်းၶၢမ်ႇ တူဝ်ၶိင်းလႄႈ သမ်ႉသၢၼ်  Flavonoids ဢၼ်ၸွႆႈလူတ်းယွမ်းလွင်ႈၸဵပ်းသဵပ်ႇ သႄးလ် (Cell) သေ ၵွပ်ႈၼၼ် မၼ်းၸင်ႇႁဵတ်းႁႂ်ႈတူဝ်ၶိင်းၵႅၼ်ႇၶႅင် ဢမ်ႇၸဵပ်း၊ ဢမ်ႇၼၢဝ် လႆႈငၢႆႈ ၼၼ်ႉယဝ်ႉ။

4. လုမ်းလႃးၽိဝ်ၼိူဝ်ႉၼင်

မၢၵ်ႇၵူဝ်ႈၼႆႉ လိူဝ်သေတေမီးၼမ်ႉၼမ်ယဝ်ႉ ယင်းမီး Vitamin-C ၊ Fiber တီႈၸွႆႈလုမ်း လႃးၽိဝ်ၼိူဝ်ႉၼင် ၸွႆႈႁဵတ်းႁႂ်ႈႁွႆးမၢၼ်ႉၸွမ်းၽိဝ်ၼိူဝ်ႉၼၼ်ႉ ၸၢင်လူင်းၵႂႃႇ ၼင်ႇ ပဵၼ်သၽႃႇဝသေဢမ်ႇၵႃး ယင်းမီးပႃးထႅင်ႈ Antioxidants တီႈၸွႆႈႁႄႉၵင်ႈ ယႃႇပေ ႁႂ်ႈလွင်ႈႁဵတ်းၵၢၼ်ၶွင် သႄးလ် (Cell) ယွမ်းလူင်းလႄႈ မၼ်းၸင်ႇၵႂႃႇၸွႆႈႁဵတ်းႁႂ်ႈ ၽိဝ်ၼိူဝ်ႉ တီႈဢၼ်ႁႅင်ႈတႅၵ်ႇၼၼ်ႉ လႆႈႁပ်ႉၼမ်ႉတဵမ်ထူၼ်ႈသေ ၸိုၼ်ႈပၢင်ႇသႂ်မႃးၶိုၼ်းယဝ်ႉ ဢမ်ႇၵႃး ယင်းႁဵတ်းႁႂ်ႈၽိဝ်ႉၼိူဝ်ႉ ယႃႇပေႁႅင်ႈတႅၵ်ႇ ထႅင်ႈလႄႈ ႁႂ်ႈမီးလွင်ႈၸိုမ်းယမ်း ၸိုၼ်ႈပၢင်ႇယူႇတႃႇသေႇ ၼၼ်ႉယဝ်ႉ။

5. လူတ်းတၢင်းပဵၼ်လိူတ်ႈသုင်

Potassium လႄႈ ထၢတ်ႈလဵၵ်း ဢၼ်မီးၼႂ်းမၢၵ်ႇၵူဝ်ႈၼၼ်ႉ မၼ်းတေၸွႆႈၵုမ်းထိင်း တၢင်းပဵၼ်လိူတ်ႈသုင်လႄႈ ၸွႆႈသၢင်ႈပၼ်မဵတ်ႉလိူတ်ႈ ႁႂ်ႈၵႂႃႇလဵင်ႉၸွမ်းၼႂ်းတူဝ်ၶိင်း လႆႈလီ ၼၼ်ႉယဝ်ႉ။

6. လူတ်းယွမ်းၶၵ်ႉၵၢၼ်ႁၢႆႉႁႅင်းၶွင်တၢင်းပဵၼ်ႁူဝ်ၸႂ်

လွင်ႈဢၼ်ႁဝ်းၵႆႉၵိၼ်မၢၵ်ႇၵူဝ်ႈၼႆႉ မၼ်းတေၸွႆႈသၢင်ႈႁႂ်ႈမဵတ်ႉလိူတ်ႈၼႂ်းတူဝ်ၶိင်း မုၼ်းလႅင်းသေ မၼ်းၸင်ႇၸွႆႈလူတ်းၶႆမၼ်းလႄႈ Cholesterol ၼႂ်းလိူတ်ႈသေ ဢမ်ႇၵႃး ယင်းၸွႆႈႁႄႉၵင်ႈလွင်ႈၵိူတ်ႇပဵၼ်တၢင်းပဵၼ်ႁူဝ်ၸႂ်လႆႈလီ ၼၼ်ႉယဝ်ႉ။

မၢၵ်ႇၵူဝ်ႈၼႆႉ မၼ်းပဵၼ်မၢၵ်ႇမႆႉမဵဝ်းဢၼ် တူဝ်ၶိင်းႁဝ်းလႆႈႁပ်ႉၽွၼ်းလီတင်းၼမ် ၵူၺ်ႈၵႃႈ လွင်ႈၵိၼ်မၢၵ်ႇၵူဝ်ႈမဵဝ်းလဵဝ်ၵေႃႈ မၼ်းဢမ်ႇၸႂ်ႈလွင်ႈလီ ယွၼ်ႉပိူဝ်ႈဝႃႈ တူဝ်ၶိင်းႁဝ်းၵေႃႈ လူဝ်ႇဢႃႇႁႃႇရ ထၢတ်ႈတၢင်ႇမဵဝ်းထႅင်ႈတင်းၼမ်လႄႈ ၵွပ်ႈၼၼ် ၼွၵ်ႈလိူဝ်သေ တေၵိၼ်မၢၵ်ႇၵူဝ်ႈယဝ်ႉ ႁႂ်ႈလႆႈၵိၼ်ၽၵ်း၊ မၢၵ်ႇမႆႉတၢင်ႇမဵဝ်းထႅင်ႈ တွၼ်ႈတႃႇႁႂ်ႈတူဝ်ၶိင်းႁဝ်းလႆႈႁပ်ႉ ၽွၼ်းလီထႅင်ႈ ၼၼ်ႉယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://www.sanook.com/women/164017/