ယွၼ်ႉပၢင်တိုၵ်းလႄႈၵူၼ်းမိူင်းလႆႈတၢႆ 6 ၵေႃႉပႃးလုၵ်ႈဢွၼ်ႇ

ၸုမ်းသိုၵ်းမၢၼ်ႈတင်း ၸုမ်းသိုၵ်းၶၢင် KIA+PDF ပိုတ်းယိုဝ်းၵၼ် ၼႂ်းၼႃႈလိၼ်သႃႇသၼႃႇ (ပိုၼ်ႉတီႈၼၼ်ႉၵူၼ်းမိူင်းႁွင်ႉဝႃႈ မျွၵ်ႉၵူင်း) ႁိမ်းဝၢၼ်ႈလူင်းၶိၼ်း ၸႄႈဝဵင်းၽႃၵၢၼ်ႉ မိူင်းၶၢင်။

သိုဝ်ႇၶၢဝ်ႇၶၢင် Kachin News Group ဢွၵ်ႇဝႆႉဝႃႈ မိူဝ်ႈဝၼ်းထီႉ  18 March 2023 (လိူၼ်သီႇလွင်ႈ 13 ၶမ်ႈ ပီႊတႆး 2117 ၼီႈ) ယၢမ်းႁူဝ်ၶမ်ႈမွၵ်ႈ 18:00 မူင်း သိုၵ်းသွင်ၽၢႆႇပိုတ်းယိုဝ်းၵၼ် ႁၢဝ်ႈႁႅင်း ၼႂ်းၼႃႈလိၼ်သႃႇသၼႃႇသေ မီးၵူၼ်းမိူင်း ၸိူဝ်းၵႂႃႇမႃးၸွမ်းတၢင်းၼၼ်ႉ လႆႈတိူဝ်ႉၸပ်းမၢၵ်ႇၵွင်ႈ တၢႆ 6 ၵေႃႉ၊ ၼႂ်းၼၼ်ႉပဵၼ် ၵူၼ်းၸၢႆး 4 ၵေႃႉ၊ ၼၢင်းယိင်း 1 ၵေႃႉ လႄႈ လုၵ်ႈဢွၼ်ႇ 1 ၵေႃႉ၊ ဢၼ်မၢတ်ႇၸဵပ်းသမ်ႉ မီးထႅင်ႈ ၼၢင်းယိင်း လႄႈ လုၵ်ႈဢွၼ်ႇၵေႃႉၼိုင်ႈ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈဝႃႈ ၵူၼ်းၸိူဝ်းတၢႆၵႂႃႇ ပဵၼ်ၽႂ်ၼႆၼၼ်ႉ ဢမ်ႇလႆႈႁူႉၸၵ်းလီလီ လႄႈ ၶဝ်ၵေႃႈဢမ်ႇၸႂ်ႈၵူၼ်းၼႂ်းပိုၼ်ႉတီႈ၊ ၸွမ်းပိုၼ်ႉတီႈ ႁိမ်းတပ်ႉမျွၵ်ႉၵူင်းၼၼ်ႉၵေႃႈ သိုၵ်းမၢၼ်ႈတင်ႈလၢၼ်ႇၵူတ်ႇထတ်း ႁၢဝ်ႈႁႅင်းၼႃႇ ၼႆ လႆႈႁၼ် Kachin News Group ဢွၵ်ႇဝႆႉၼင်ႇၼႆ။

ၵဵဝ်ႇလူၺ်ႈလွင်ႈၵူၼ်းမိူင်း ၼႂ်းပိုၼ်ႉတီႈထုၵ်ႇယိုဝ်းတၢႆၼႆႉ ဢမ်ႇမီးၸုမ်းသိုၵ်း ၸုမ်းလႂ် ဢွၵ်ႇမႃးလၢတ်ႈသင်ၸွမ်း လႄႈ ဢမ်ႇမီးၸုမ်းသိုၵ်း ၸုမ်းလႂ် ႁပ်ႉဢဝ်ပုၼ်ႈၽွၼ်းသင် ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း