ယွၼ်ႉမီးလူမ်းလႅင်ႉလႄႈ ၾူၼ်တေၸၢင်ႈတူၵ်းၼႂ်းမိူင်းတႆး

ၸွမ်းၼင်ႇႁွင်ႈၵၢၼ် ၾိင်ႈၾႃႉရႃႇသီႇ ပိုၼ်ၽၢဝ်ႇဝႆႉၼၼ်ႉ ယွၼ်ႉမီးလူမ်းလႅင်ႉၼႂ်းပၢင်ႇလၢႆႇလႄႈ တႄႇမိူဝ်ႈၼႆႉဝၼ်းထီႉ 21 March 2022 (လိူၼ်သီႇလွင်ႈ 5 ၶမ်ႈ ပီႊတႆး 2116 ၼီႈ) ထိုင် ဝၼ်းထီႉ 23 March 2022 (လိူၼ်သီႇလွင်ႈ 7 ၶမ်ႈ ပီႊတႆး 2116 ၼီႈ) ၾူၼ်တေၸၢင်ႈတူၵ်း တူဝ်ႈတင်းမိူင်းႁူမ်ႈတုမ် ပႃးၸဵမ် ၼႂ်းမိူင်းတႆး ၼႆယဝ်ႉ။

ယွၼ်ႉပိူဝ်ႈၼႂ်းပၢင်ႇလၢႆႇပင်းၵေႃး လႄႈ ပၢင်ႇလၢႆႇဢႅၼ်ႇတႃႇမၢၼ်ႇ (မၢၼ်ႈၶဝ်ႁွင်ႉဝႃႈ ပၢင်ႇလၢႆႇၵပ်ႉပလီႇ) ၼၼ်ႉ မီးလူမ်းလႅင်ႉသၢႆႇၵလူၼ်း လၢမ်းၶၢတ်ႈဝႃႈ တေၽတ်ႉၶဝ်ႈၸူး ၽင်ႇပၢင်ႇလၢႆႇမိူင်းႁူမ်ႈတုမ် ၸွမ်းပိုၼ်ႉတီႈမိူင်းမွၼ်း၊ တိူင်းတႃႈၵုင်ႈ၊ တိူင်းတၼိၼ်းတႃႇယီႇ ၸႃႉၵႂႃႇလၢႆလၢႆပိုၼ်ႉတီႈၼႆလႄႈ ႁႅင်းလူမ်းလႅင်ႉ တေယူႇတီႈၸၼ်ႉပၢၼ်ၵၢင် သီမၢၵ်ႇၸွၵ်းဝႆႉၼႆယဝ်ႉ။

လၢမ်းၶၢတ်ႈဝႃႈ မိူဝ်ႈၼႆႉ လူမ်းလႅင်ႉတေၽတ်ႉၶဝ်ႈ တီႈၵုၼ်ၵူဝ်ႇၵူဝ်းၸုၼ်း၊ မိူဝ်ႈၽုၵ်ႈ ၸွမ်းပိုၼ်ႉတီႈၵုၼ်ႁၢႆးၵျီးၸုၼ်း၊ မိူဝ်ႈႁိုဝ်း ၽတ်ႉၶဝ်ႈထိုင် ၸွမ်းၽင်ႇပၢင်ႇလၢႆႇ မိူင်းရၶႅင်ႇသေ သိုပ်ႇၶဝ်ႈၸူးၽင်ႇပၢင်ႇလၢႆႇမိူင်းဢိၼ်းတီးယႃး ၼႆယဝ်ႉ။

ယွၼ်ႉၼၼ် ၽွၼ်းတုမ်ႉယွၼ်ႈလူမ်းလႅင်ႉဢၼ်ၼႆႉ တေၸၢင်ႈႁဵတ်းႁႂ်ႈ ၼႂ်းမိူင်းတႆး၊ မိူင်းၶျၢင်း၊ မိူင်းရၶႅင်ႇ၊ မိူင်းယၢင်းလႅင်၊ မိူင်းယၢင်း၊ မိူင်းမွၼ်း၊ မိူင်းၶၢင်၊ တိူင်းၸႄႈၵႅင်း၊ တိူင်းမၢၼ်းတလေး၊ တိူင်းမၵူၺ်း၊ တိူင်းပႃႇၵိူဝ်၊ တိူင်းတႃႈၵုင်ႈ၊ တိူင်းဢေႇရႃႇဝတီႇ လႄႈ တိူင်းတၼိၼ်းတႃႇယီႇ တူဝ်ႈတင်းမိူင်းၼႆယဝ်ႉ။

မိူၼ်ၼင်ႇပိုၼ်ႉတီႈ ဢၼ်ၸမ်ၽင်ႇပၢင်ႇလၢႆႇၼၼ်ႉတႄႉ ထုၵ်ႇလီလႆႈၶၢႆႉပၢႆႈဝႆႉၸူဝ်ႈၶၢဝ်း ယွၼ်ႉပိူဝ်ႈတေမီးလူမ်းလႅင်ႉၽတ်ႉၶဝ်ႈ ဝႃႈၼႆ။

ၽၢႆႇၾိင်ႈၾႃႉရႃႇသီႇ ပၼ်ၾၢင်ႉဝႆႉဝႃႈ ၽွင်းလူမ်းလႅင်ႉၽတ်ႉၶဝ်ႈၼၼ်ႉ တေၸၢင်ႈမီးလူမ်းၽတ်ႉပဝ်ႇႁႅင်းထိုင် ၼိုင်ႈၸူဝ်ႈမူင်းလႂ် 40 လၵ်း၊ ႁႅင်းႁွၼ်ၼမ်ႉပၢင်ႇလၢႆႇ ၸၢင်ႈၶိုၼ်ႈသုင် 9 ထတ်းထိုင် 12 ထတ်း ၼႆလႄႈ  ႁႂ်ႈလႆႈဢွၼ်ၵၼ်ႁၢင်ႈႁႅၼ်း တႃႇတေႁပ်ႉမိုဝ်း ၽေးလူမ်းလႅင်ႉဝႆႉထႃႈဢွၼ်တၢင်း ၼႆယဝ်ႉ။

ဝၢႆးသိုၵ်းမၢၼ်ႈ ယိုတ်းဢၢမ်းၼၢတ်ႈၸိုင်ႈမိူင်းမႃးၼႆႉ လူမ်းလႅင်ႉတေၽတ်ႉၶဝ်ႈၼႂ်းမိူင်း ပဵၼ်ပွၵ်ႈဢွၼ်တၢင်းသုတ်း၊ ၽွင်းၶၢဝ်းယၢမ်း လွင်ႈပၼ်တၢင်းၸွႆႈထႅမ်ၼႂ်းတူင်ႇဝူင်း တိုၵ်ႉဢူၼ်ႈဢွၼ်ႇယူႇၼႆႉ လူမ်းလႅင်ႉတေၽတ်ႉၶဝ်ႈထႅင်ႈၼႆလႄႈ ၵူၼ်းမိူင်းႁူမ်ႈတုမ် ဢွၼ်ၵၼ်မႆႈၸႂ်ဝႆႉထႃႈယူႇယဝ်ႉ ဝႃႈၼႆ။

တႆးလွတ်ႈလႅဝ်း