ယွၼ်ႉမႄႈၼမ်ႉမိူၺ်း ၼွင်းၶိုၼ်ႈသေ ႁဵတ်းႁႂ်ႈၵူၼ်းပၢႆႈၽေး ၸွမ်းႁိမ်းၽင်ႇၼမ်ႉ ထူပ်းလွင်ႈယၢပ်ႇၽိုတ်ႇၼမ်

ယွၼ်ႉၾူၼ်တူၵ်း ဢမ်ႇထၢတ်ႇဢမ်ႇဝၢႆးသေ ႁဵတ်းႁႂ်ႈ လင်ႁိူၼ်းၵူၼ်းပၢႆႈၽေး ဢၼ်မီးႁိမ်း မႄႈၼမ်ႉမိူၺ်း ၸႄႈဝဵင်းမျႃႉဝတီႇ မိူင်းယၢင်း လႆႈထူပ်းလွင်ႈယၢပ်ႇၽိုတ်ႇ တင်းၼမ် ဝႃႈၼႆ။

ၾူၼ်တႄႇတူၵ်း မိူဝ်ႈဝၼ်းထီႉ 20 May 2022 သေ တေႃႇထိုင် ဝၼ်းထီႉ 22 May 2022 ၵေႃႈ တိုၵ်ႉတူၵ်းယူႇလႄႈ ႁဵတ်းႁႂ်ႈ မႄႈၼမ်ႉမိူၺ်း ဢၼ်မီးႁိမ်း ပၢင်သဝ်းၵူၼ်းပၢႆႈၽေး ၼႂ်းၸႄႈဝဵင်းလေးၵေႉၵေႃႇၼၼ်ႉ ထုၵ်ႇၼမ်ႉႁူၺ်ႈၼမ်ႉလွႆ ၼမ်ႉၾူၼ်ၸိူဝ်းၼႆႉ လႆၶဝ်ႈၸူးတင်းၼမ်လႄႈ ႁဵတ်းႁႂ်ႈ ၼမ်ႉၼွင်းၶိုၼ်ႈမႃး၊ လိူဝ်ၼၼ်ႉၸွမ်းပွၵ်ႉၵမ်ႈၽွင်ႈ ဢၼ်မီးၼႂ်းၸႄႈဝဵင်းမျႃႉဝတီႇၵေႃႈ ယွၼ်ႉၼမ်ႉထူမ်ႈလႄႈ ႁဵတ်းႁႂ်ႈၵူၼ်းဝၢၼ်ႈ ၵမ်ႈၽွင်ႈလႆႈၶၢႆႉပၢႆႈ ၶဝ်ႈယူႇဝႆႉၸွမ်း ႁူင်းႁဵၼ်း ၸိူဝ်းၼႆႉၸူဝ်ႈၵႅပ်ႉ ဝႃႈၼႆ။

ၽၢႆႇၸွႆႈထႅမ် ၵူၼ်းပၢႆႈၽေးၵေႃႉၼိုင်ႈ လၢတ်ႈၼႄတီႈသိုဝ်ႇၶၢဝ်ႇဝႃႈ “ယွၼ်ႉဝႃႈၾူၼ် တူၵ်းတင်းဝၼ်း တင်းၶိုၼ်းလႄႈ ႁဵတ်းႁႂ်ႈမႄႈၼမ်ႉ ၼွင်းၶိုၼ်ႈသေ တီႈယူႇသဝ်း ၵူၼ်းပၢႆႈၽေးၶဝ်သမ်ႉ ဢၼ်ဢဝ်သၢႆးသေႁဵတ်းဝႆႉၵေႃႈ မီးတင်းၼမ်လႄႈ လႆႈၸူမ်ၵႂႃႇ ၶဝ်ႈၼမ်ႉတၢင်းၵိၼ် ၵူၼ်းပၢႆႈၽေးၶဝ်ၵေႃႈ ယွၼ်ႉၾူၼ်တူၵ်းသႂ်ႇလႄႈ ယမ်းၵႂႃႇမူတ်းသေ ထူပ်းတၢင်းယၢပ်ႇၽိုတ်ႇတင်းၼမ်” ဝႃႈၼႆ။

ၽၢႆႇဢွၵ်ႇသၼ်လွႆတေႃးၼၼႆႉ ဢၼ်ၶဝ်ႈပႃးၼႂ်းပိုၼ်ႉတီႈလေးၵေႉၵေႃႇ မိူၼ်ၼင်ႇ  ၵျွၵ်ႉၶႅတ်ႉ၊ လေးတေး၊ ဝေႃႇလေႇ၊ ၵၼႄႉလေး၊ တတုၵ်ႉထ၊ တၼေႃႉထ၊ တေႉပေႃးပူဝ်း၊ ၵလေႉထေႃႇ လႄႈ သူႉတလီႇ ၸိူဝ်းၼႆႉ ႁူမ်ႈႁူဝ်ၵူၼ်းပၢႆႈၽေးမီးယူႇ 15,000 ပၢႆ ဝႃႈၼႆ။

ပတူဝ်ႇ‌ၸေႃးတႃႇၼီး ၽူႈယႂ်ႇၵူၼ်းလူင်ၼႂ်း KNU လၢတ်ႈတီႈသိုဝ်ႇၶၢဝ်ႇဝႃႈ “မိူဝ်ႈလဵဝ် ပၢင်သဝ်း ၵူၼ်းပၢႆႈၽေး ဢၼ်မီးႁိမ်း မႄႈၼမ်ႉမိူၺ်းၼႆႉ ယွၼ်ႉၾူၼ် တူၵ်းဢမ်ႇထၢတ်ႇဢမ်ႇဝၢႆးလႄႈ ႁဵတ်းႁႂ်ႈလိၼ်ၵူၼ်ႇ တီႈ တေႉပေႃးပူဝ်းလႄႈ ဢူႉၵေႇထႃး ပဵၼ်သွင်တီႈၼႆႉ၊ ႁူဝ်ၵူၼ်းပၢႆႈၽေးတႄႉ မီးႁဵင်ပၢႆ၊ မိူဝ်ႈလဵဝ်တႄႉ တႃႇ 200 ပၢႆ လႆႈၶၢႆႉတီႈယူႇဝႆႉ၊ ယွၼ်ႉၼမ်ႉၵေႃႈၶိုၼ်ႈ  လိၼ်ၵေႃႈယူတ်ႇ လႄႈ  တၢင်းၵိၼ်တၢင်းယႅမ်ႉတႄႉၵေႃႈ တီႈပၢင်သဝ်းၶႃႈႁဝ်းၶဝ် တိုၵ်ႉမီးဝႆႉၼမ်ယူႇ၊  ၼႂ်းတပ်ႉၸုမ်း 2 ၸႄႈတွၼ်ႈတထူင်ႇ ၵေႃႈ တင်ႈတႄႇႁူဝ်လိူၼ် May မႃးၼႆႉ လႆႈထုၵ်ႇတင်းၸုမ်းသိုၵ်းမၢၼ်ႈၶဝ် ဢဝ်ႁိူဝ်းမိၼ် ၶဝ်ႈမႃးပွႆႇမၢၵ်ႇသႂ်ႇလႄႈ ႁဵတ်းႁႂ်ႈၵူၼ်းပၢႆႈၽေး မီးဢၢၼ်ႇႁူဝ်မိုၼ်ႇသေ တွၼ်ႈတႃႇၶဝ်ၸိူဝ်းၼၼ်ႉသမ်ႉ လူဝ်ႇတၢင်းၸွႆႈထႅမ်ဝႆႉ တင်းၼမ်” ဝႃႈၼႆ။

ယွၼ်ႉၾူၼ်တူၵ်းႁႃႇယႂ်ႇ လႄႈ ႁဵတ်းႁႂ်ႈမႄႈၼမ်ႉ ၼွင်းၶိုၼ်ႈသေ လိူဝ်ၼၼ်ႉ ၵူၼ်းပၢႆႈၽေး ဢၼ်မီးႁိမ်းၽင်ႇၼမ်ႉၼၼ်ႉသမ်ႉ လႆႈၶၢႆႉပၢႆႈယၢမ်းၵၢင်ၶိုၼ်းလႄႈ ၶဝ်ႈသၢၼ် ၸိူဝ်းၼႆႉၵေႃႈ ၼမ်ႉယမ်းၵႂႃႇမူတ်း ဝႃႈၼႆ။

ယွၼ်ႉၾူၼ်တူၵ်း ဢမ်ႇထၢတ်ႇဢမ်ႇဝၢႆးလႄႈ ႁဵတ်းႁႂ်ႈလုၵ်ႈဢွၼ်ႇ ဢိၵ်ႇတင်း ၵူၼ်းထဝ်ႈဢႃႇယုယႂ်ႇ ဢၼ်မီးၼႂ်း ပၢင်သဝ်းၵူၼ်းပၢႆႈၽေးၼႆႉ ဢမ်ႇမီးတီႈယူႇသဝ်း ဢိၵ်ႇတင်း ပၢႆမီးပႃးၵူၼ်းပဵၼ် ၸိူဝ်းၼႆႉထႅင်ႈလႄႈ လူဝ်ႇတၢင်းၸွႆႈထႅမ် ၶူဝ်းၶွင်ၸႂ်ႉတိုဝ်း လႄႈ ၶဝ်ႈၼမ်ႉတၢင်းၵိၼ် ၸိူဝ်းၼႆႉ ၶၼ်ၶၼ်ၽႂ်းၽႂ်းယူႇ ဝႃႈၼႆ။

တႆးလွတ်ႈလႅဝ်း