လိၼ်ၵူၼ်ႇတဵင်ၺႃးႁိူၼ်းၵူၼ်းမိူင်း တီႈဝဵင်းမိူင်းၵုတ်ႈ လႄႈ မီးၵူၼ်းႁၢႆလၢႆဝႆႉၼိုင်ႈၵေႃႉ

ပဵၼ်ၽေးသၽႃႇဝ ၾူၼ်တူၵ်းႁႅင်း တီႈဝဵင်းမိူင်းၵုတ်ႈ ႁဵတ်းႁႂ်ႈလိၼ်ၵူၼ်ႇ တဵင်သႂ်ႇၺႃး ႁိူၼ်းၵူၼ်းမိူင်းသေ ဢွင်ႈတီႈလိၼ်ၵူၼ်ႇပင်းၼၼ်ႉ မီးၵူၼ်းႁၢႆလၢႆဝႆႉ ၼိုင်ႈၵေႃႉၼႆလႄႈ ၸုမ်းၽၢႆႇၸွႆႈထႅမ်ၶဝ် တိုၵ်ႉၶတ်းၸႂ်သွၵ်ႈႁႃယူႇ ဝႃႈၼႆ။

မိူဝ်ႈၼႆႉ ဝၼ်းထီႉ 13 August 2021 (လိူၼ်ၵဝ်ႈမႂ်ႇ 6 ၶမ်ႈ ပီႊတႆး 2115 ၼီႈ) ယၢမ်းၵၢင်ၼႂ်ၸဝ်ႉၼၼ်ႉ လိၼ်ၵူၼ်ႇတဵင်ႇသႂ်ႇ ႁိူၼ်းၵူၼ်းမိူင်း တီႈပွၵ်ႉမဵဝ်ႉမ ဝဵင်းမိူင်းၵုတ်ႈသေ ဢွင်ႈတီႈလိၼ်ၵူၼ်ႇတဵင်သႂ်ႇၺႃးၼၼ်ႉ မီးၵူၼ်းၶမ်ဝႆႉ 7 ၵေႃႉ ၼႂ်းၼၼ်ႉ   ၽူႈၸၢႆး 5 ၵေႃႉ လႄႈ လုၵ်ႈဢွၼ်ႇ 1 ၵေႃႉ တႄႉ ၽၢႆႇၸွႆႈထႅမ် ဢၼ်ပဵၼ်ၸုမ်း ၽၢႆႇၶႄၾႆး ဢိၵ်ႇ ၸုမ်းပရႁိတၶဝ် ၵႂႃႇၸွႆႈထႅမ် ဢဝ်ဢွၵ်ႇမႃးသေ  ၸုမ်းပရႁိတ ဝဵင်းမိူင်းၵုတ်ႈၶဝ် ၶိုၼ်းဢဝ်လူတ်ႉၵႃး တၢင်ႇသူင်ႇယူတ်းယႃတူဝ်ဝႆႉတီႈႁူင်းယႃ ဝဵင်းမိူင်းၵုတ်ႈ ဝႃႈၼႆ။

လႆႈႁပ်ႉႁူႉဝႃႈ လိၼ်ၵူၼ်ႇတဵင်သႂ်ႇ ႁိူၼ်းၵူၼ်းမိူင်း တီႈဝဵင်းမိူင်းၵုတ်ႈၼႆႉ မီးၵူၼ်းၶမ်ဝႆႉ 7 ၵေႃႉ ၼႂ်းၼၼ်ႉ ၸုမ်းၽၢႆႇၸွႆႈထႅမ်ၶဝ် ၸွႆႈဢွၵ်ႇမႃးလႆႈ 6 ၵေႃႉ ဢၼ်ၵိုတ်းလိူဝ်ထႅင်ႈ ၵေႃႉၼိုင်ႈတႄႉ တိုၵ်ႉသိုပ်ႇသွၵ်ႈႁႃယူႇ ဝႃႈၼႆ။

တီႈဝဵင်းမိူင်းၵုတ်ႈၼႆႉ တင်ႈတႄႇမိူဝ်ႈဝႃး ဝၼ်းထီႉ 12 August 2021 ယၢမ်းၵၢင်ၼႂ်ၸဝ်ႉ 01:00 မူင်း ၾူၼ်တူၵ်းႁႃႇယႂ်ႇႁႃႇလူင် လႄႈ ႁဵတ်းႁႂ်ႈၼမ်ႉထူမ်ႈ ၼမ်ႉၼွင်း၊ သဵၼ်ႈတႃႈသၢႆတၢင်းလူႉၵွႆ၊ လင်ႁိူၼ်းၵူၼ်းမိူင်းၵူၼ်ႇပင်း သေဢမ်ႇၵႃး တီႈပွၵ်ႉၵျွၵ်ႉၽိဝ်ႇ ႁိမ်းလၢၼ်ႉၶၢႆၼမ်ႉမၼ်းၸၢၵ်ႈ BOC ၼၼ်ႉၵေႃႈ ၵွပ်ႈပိူဝ်ႈလိၼ်ၵူၼ်ႇပင်းလႄႈ မီးၵူၼ်းၼႂ်းၼႃႈႁိူၼ်းလဵဝ်ၵၼ် လူႉသဵင်ႈတၢႆ 3 ၵေႃႉ ၼႆယဝ်ႉ။

တႆးလွတ်ႈလႅဝ်း

Photo – ၸုမ်းၽၢႆႇၶႄၾႆး မိူင်းႁူမ်ႈတုမ်

Facebook

ၶၢဝ်ႇလိုၼ်းသုတ်း