လုမ်းတြႃးၶွင်ႇသီႇသိုၵ်းမၢၼ်ႈ တႅပ်းတတ်းပၼ်တၢမ်ႇ ဢွင်ႇသၢၼ်းသုၵျီႇ ထႅင်ႈ

မိူဝ်ႈဝၼ်းထီႉ 2 September 2022 (လိူၼ်သိပ်းမႂ်ႇ 8 ၶမ်ႈ ပီႊတႆး 2116 ၼီႈ) ၼၼ်ႉ လုမ်းတႅပ်းတတ်းတြႃးမိူင်းႁူမ်ႈတုမ် ဢၼ်ယူႇၽၢႆႇတႂ်ႈၵုမ်းၵမ်ၶွင်ႇသီႇသိုၵ်းမၢၼ်ႈ တႅပ်းတတ်းပၼ်တၢမ်ႇၶွၵ်ႈ လႄႈ ႁဵတ်းၵၢၼ်ၵျၢမ်း ဢွင်ႇသၢၼ်းသုၵျီႇ ထႅင်ႈ 3 ပီႊ လူၺ်ႈတၢင်းၽိတ်းဝႃႈ  ဢဝ်လၢႆးၵူတ်ႉငေႃးသေ ႁဵတ်းႁႂ်ႈပႃႇတီႇၼူၵ်ႉယုင်း NLD ဢွင်ႇပေႉပၢင်လိူၵ်ႈတင်ႈ မိူဝ်ႈလိူၼ် November ပီႊ 2020 ၼၼ်ႉ ဝႃႈၼႆ။

လွင်ႈဝႃႈတေၸႂ်ႉႁဵတ်းၵၢၼ်ၵျၢမ်း ၼႆၼၼ်ႉ တေပဵၼ်ၵၢၼ်လွင်ႈသင် ႁဵတ်းဢီႈသင် တီႈလႂ် မိူဝ်ႈလႂ် ဢၼ်ဝႃႈၼၼ်ႉတႄႉ ဢမ်ႇပႆႇမီးႁူဝ်ယွႆႈယႅမ်း ဢွၵ်ႇမႃး။ တေႃႈၼင်ႇၼၼ် ၸွမ်ၸိုင်ႈၵဝ်ႇ ဢူးဝိၼ်းမျိၼ်ႉ ၵေႃႈ ထုၵ်ႇတႅပ်းတတ်းတြႃးၵႂႃႇ တၢမ်ႇၶွၵ်ႈ လႄႈ ႁဵတ်းၵၢၼ်ၵျၢမ်း 3 ပီႊ မိူၼ်ဢွင်ႇသၢၼ်းသုၵျီႇ ယူႇယဝ်ႉ။

ဢွင်ႇသၢၼ်းသုၵျီႇ ဢႃႇယု 76 ပီႊ ထုၵ်ႇၵုမ်းၶင်တူဝ် တႄႇၸဵမ်မိူဝ်ႈ တပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈ ၼႂ်းလိူၼ် February ပီႊ 2021 ၼၼ်ႉယဝ်ႉ သေ မိူဝ်ႈၽွင်းၼၼ်ႉ ဢွင်ႇသၢၼ်းသုၵျီႇ ထုၵ်ႇမၢပ်ႇၼႄးဝႃႈ မီးတၢင်းၽိတ်းတင်း ၼမ်တင်းလၢႆ ပေႃးႁူမ်ႈၵၼ်တင်းမူတ်းၸိုင် တေၺႃးတၢမ်ႇၶွၵ်ႈဢမ်ႇယွမ်း 190 ပီႊ ဝႃႈၼႆ။ မိူဝ်ႈပူၼ်ႉမႃးၼႆႉၵေႃႈ လုမ်းတႅပ်းတတ်းတြႃး ၶွင်ႇသီႇသိုၵ်းမၢၼ်ႈ တႅပ်းတတ်းပၼ်တၢမ်ႇၶွၵ်ႈ ဢွင်ႇသၢၼ်းသုၵျီႇ ၵႂႃႇ 17 ပီႊယဝ်ႉသေ ပွၵ်ႈၵမ်းၼႆႉ သမ်ႉ လႆႈတႅပ်းတတ်းပၼ်တၢမ်ႇၶွၵ်ႈထႅင်ႈ 3 ပီႊလႄႈ ႁူမ်ႈတၢမ်ႇၶွၵ်ႈတင်းမူတ်း ဢၼ်တႅပ်းတတ်းယဝ်ႉ ပဵၼ်ၵႂႃႇ 20 ပီႊ ၼႆယူႇယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း