လူမ်းလႅင်ႉလူင် Super Typhoon ႁိၼ်ၼၢမ်းၼေႃႇ (Hinnamnor)

မိူဝ်ႈဝၼ်းထီႉ 1 September 2022 ၸွမ်းၼင်ႇႁၢင်ႈတီႈလၢဝ်ပွမ် Aqua ၶွင် NASA ပိုတ်ႇဢွၵ်ႇမႃးၼႄၼၼ်ႉ လူမ်းလႅင်ႉလူင် Super Typhoon ႁိၼ်ၼၢမ်းၼေႃႇ (Hinnamnor) လုၵ်ႉတၢင်းၸၢၼ်း မုင်ႈၼႃႈၶိုၼ်ႈၵႂႃႇတၢင်းႁွင်ႇလႄႈ လူမ်းလႅင်ႉလူင်လုၵ်ႈၼႆႉၼႆႉ လႆႈဝႃႈပဵၼ်ဢၼ်ႁၢႆႉႁႅင်းလိူဝ်ပိူၼ်ႈ ၼႂ်းပီႊ 2022 ၼႆႉ ၼႆယူႇ။

မိူဝ်ႈဝၼ်းထီႉ 4 September 2022 ၼၼ်ႉ သိုဝ်ႇၶၢဝ်ႇထႆႇဝၼ်ႇလၢတ်ႈဝႃႈ ယွၼ်ႉလူမ်းလႅင်ႉလူင် Super Typhoon ႁိၼ်ၼၢမ်းၼေႃႇ (Hinnamnor) သေ ႁဵတ်းႁႂ်ႈၾူၼ်လူင်လူမ်းလူင် ၽတ်ႉၶဝ်ႈႁၢဝ်ႈႁႅင်း တီႈၵုၼ်ထႆႇဝၼ်ႇ ဢွၼ်တၢင်းလူမ်းလႅင်ႉလူင်တေမုင်ႈၼႃႈၵႂႃႇ တၢင်းမိူင်းၵျႃႇပၢၼ်ႇၼၼ်ႉလႄႈ ၽၢႆႇတၢင်းထႆႇဝၼ်ႇၵေႃႈ လႆႈပိုၼ်ၽၢဝ်ႇသင်ႇပိၵ်ႉဢိုတ်းၵၢၼ် ၼႂ်းပိုၼ်ႉတီႈလၢႆပွတ်းတွၼ်ႈ ႁူမ်ႈပႃးပွတ်းဝၼ်းဢွၵ်ႇလႄႈ ပွတ်းၸဵင်ႇႁွင်ႇဝၼ်းဢွၵ်ႇၸိူဝ်းၼႆႉ ၼႆယူႇ။

မိူင်းၶႄႇၵေႃႈ လႆႈဢွၵ်ႇမႃးပိုၼ်ၽၢဝ်ႇ ငဝ်းလၢႆးၶိုၵ်ႉၶၵ်ႉၽေးသၽႃႇဝလူမ်းလႅင်ႉ ၶၵ်ႉထီႉ 3 မိူဝ်ႈဝၼ်းထီႉ 3 September 2022 ၼၼ်ႉယူႇ။ လူမ်းလႅင်ႉလူင် ႁိၼ်ၼၢမ်းၼေႃႇ (Hinnamnor) လႆႈၽတ်ႉၶဝ်ႈၸမ် ၽင်ႇပၢင်ႇလၢႆႇပွတ်းဝၼ်းဢွၵ်ႇၸိုင်ႈမိူင်းၶႄႇမႃးတိၵ်းတိၵ်း ၼႆယူႇယဝ်ႉ။

မိူဝ်ႈၼႆႉဝၼ်းထီႉ 5 September 2022 ၽၢႆႇလူလွမ်ပႂ်ႉပႃးၾိင်ႈၾႃႉရႃႇသီႇ ၵူဝ်းရီးယႃးၸၢၼ်းၵေႃႈ လႆႈဢွၵ်ႇမႃးလၢတ်ႈဝႃႈ ယွၼ်ႉလူမ်းလႅင်ႉလူင် ႁိၼ်ၼၢမ်းၼေႃႇ (Hinnamnor) သေ ႁဵတ်းႁႂ်ႈၾူၼ်လူင်တူၵ်းႁၢဝ်ႈႁႅင်း ၼမ်ႉၶိုၼ်ႈသုင် လႄႈ လူမ်းၽတ်ႉၶဝ်ႈသႂ်ႇတႃႈႁိူဝ်းႁၢဝ်ႈႁႅင်း တီႈၵုၼ် Jeju ၼႆယူႇ။

လူမ်းလႅင်ႉလူင် Super Typhoon ႁိၼ်ၼၢမ်းၼေႃႇ (Hinnamnor) ၼႆႉ မီးတၢင်းဝႆးၽႂ်း 24 ၵီႇလူဝ်ႇမီႇတိူဝ်ႇတေႃႇ ၼိုင်ႈၸူဝ်ႈမူင်း မုင်ႈၼႃႈၵႂႃႇတၢင်းႁွင်ႇသေ လၢမ်းၶၢတ်ႈဝႃႈ တေမုင်ႈၼႃႈၵႂႃႇတၢင်း ႁိမ်းၵုၼ် Jeju ၼႂ်းဝၼ်းမိူဝ်ႈၼႆႉသေ သိုပ်ႇထူဝ်းၽတ်ႉၶိုၼ်ႈၵႂႃႇတၢင်း ဝဵင်းပူးသၢၼ်း(Busan) ၼႂ်းမိူင်းၵူဝ်းရီးယႃးၸၢၼ်း မိူဝ်ႈၽုၵ်ႈဝၼ်းထီႉ 6 September 2022 ၼႆယူႇ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း