BURMESE
ENGLISH
UNODC လၢတ်ႈဝႃႈ ၵၢၼ်ၵႃႉၶၢႆယႃႈမဝ်းၵမ် ၵိုင်ႉၵၢင်ႉတိူဝ်းၶိုၼ်ႈသုင်ႁႅင်း ၸူဝ်ႈၽွင်းၸိူဝ်ႉမႅင်း COVID- 19 ၽႄႈလၢမ်းၸွတ်ႇတူဝ်ႈလုမ်ႈၾႃႉ ထႆးပဵၼ်သုၼ်ၵၢင် ၵၢတ်ႇၵႃႉၶၢႆ။
မိူဝ်ႈဝႃး ဝၼ်းထီႉ 10 June 2021 (လိူၼ်ၸဵတ်းမႂ်ႇ 1 ၶမ်ႈ ပီႊတႆး 2115 ၼီႈ) သိုဝ်ႇၶၢဝ်ႇ CNN ဢွၵ်ႇၼႄဝႆႉ ၵဵဝ်ႇလူၺ်ႈလွင်ႈ ၸုမ်းၾၢႆႇၽဵဝ်ႈမူၺ်ႉ ယႃႈမဝ်းၵမ်လႄႈရႃႇၸဝတ်ႈ ၸၢတ်ႈၸိုင်ႈလုမ်ႈၾႃႉ (UNODC) လၢတ်ႈဝႆႉဝႃႈ ၼႂ်းၸူဝ်ႈၽွင်းယၢမ်းလုမ်ႈၾႃႉ လႆႈထူပ်းၽေးၸိူဝ်ႉမႅင်း Coronavirus 2019 ဢမ်ႇၼၼ် COVID-19 ၽႄႈလၢမ်းႁၢႆႉႁႅင်း ယူႇၼႆႉ ဢၼ်ၵိုင်ႉၵၢင်ႉၽႄႈလၢမ်း တိူဝ်းၶိုၼ်ႈသုင်ႁႅင်း ထႅင်ႈလွင်ႈၼိုင်ႈၵေႃႈ ပဵၼ်ယႃႈဢၢႆႉသ် ဢမ်ႇၼၼ် Methamphetamine ၼႆယဝ်ႉ။
ၸွမ်းၼင်ႇၶေႃႈမုၼ်း လၢႆးငၢၼ်းၼႄဝႆႉၼၼ်ႉ မိူဝ်ႈၼႂ်းပီႊ 2020 ပူၼ်ႉမႃး ၸုမ်းၾၢႆႇၽဵဝ်ႈမူၺ်ႉ ယႃႈမဝ်းၵမ်လႄႈရႃႇၸဝတ်ႈ ၸၢတ်ႈၸိုင်ႈလုမ်ႈၾႃႉ (UNODC) တီႉၺွပ်းလႆႈ ယႃႈမဝ်းၵမ် (ယႃႈမ) ၼမ်ႉၼၵ်းမွၵ်ႈ 170 တၢၼ်ႇ ပိုၼ်ႉတီႈဢၼ်တီႉၺွပ်းလႆႈၼမ်သုတ်း ပဵၼ်ၼႂ်းဢေးသျုး ပွတ်းဝၼ်းဢွၵ်ႇလႄႈ ဢေးသျုးၸဵင်ႇၸၢၼ်းဝၼ်းဢွၵ်ႇ တိူဝ်းၼမ်ၶိုၼ်ႈမႃး ႁူဝ်ပၢၵ်ႇသိပ်းၵဝ်ႈ (19%) တေတူၵ်းမႅၼ်ႈၵႃႈၶၼ်ငိုၼ်းမွၵ်ႈ 30,000-61,000 လၢၼ်ႉတေႃႇလႃႇ ဢမေႇရိၵၢၼ်ႇ ၼႆယဝ်ႉ။
UNODC လၢတ်ႈထႅင်ႈဝႃႈ ၵူၼ်းၵႃႉၶၢႆယႃႈမဝ်းၵမ် ၵမ်ႈပႃႈၼမ် တေတေႃႉသူင်ႇလတ်းၽၢၼ်ႇ တၢင်းမိူင်းလၢဝ်း ယွၼ်ႉလၢဝ်းဢမ်ႇပေႃးၸႂ်ႉမၢႆမီႈ ၵူတ်ႇထတ်းႁၢဝ်ႈႁႅင်း ယဝ်ႉၶိုၼ်းသိုပ်ႇလၵ်ႉ တေႃႉၶဝ်ႈသုၼ်ၵၢင် ၵၢၼ်သိုဝ်ႉၶၢႆယႃႈမဝ်းၵမ် တီႈၼႂ်းမိူင်းထႆး လႄႈ မိူင်းဝႅတ်ႉၼၢမ်းၸိူဝ်းၼႆႉ လိူဝ်သေၼၼ်ႉ တီႈၵုၼ်ႁွင်ႇၵွင်ႇၵေႃႈ ထူပ်းႁၼ်ၵူၼ်းၵႃႉၶၢႆယႃႈမဝ်းၵမ် တိူဝ်းၶိုၼ်ႈၼမ် မိူၼ်ၵၼ်ၼႆယဝ်ႉ။
ဢွင်ႈတီႈႁဵတ်းဢွၵ်ႇယႃႈမဝ်းၵမ် ဢၼ်ယႂ်ႇသုတ်းတႄႉ ပဵၼ်ၼႂ်းမိူင်းတႆး ပွတ်းသၢမ်ၸဵင်ႇၶမ်း ဢၼ်ယူႇၼႂ်းပိုၼ်ႉတီႈၵုမ်းၵမ် ၶွင်ၸုမ်းယိပ်းၵွင်ႈၵၢင်ႇ ႁူမ်ပႃးထႅင်ႈ တီႈၼႂ်းမိူင်းထႆး၊ မိူင်းလၢဝ်းၵမ်ႈၽွင်ႈ ဢၼ်ႁဵတ်းဢွၵ်ႇၼမ် ထႅင်ႈတီႈၼိုင်ႈတႄႉ ပဵၼ်တီႈၼႂ်းမိူင်း ၵမ်ႇပေႃးတီးယႃး ၼႆယဝ်ႉ။
ယွၼ်ႉလွင်ႈႁဵတ်းဢွၵ်ႇ ၵႃႉၶၢႆယႃႈမဝ်းၵမ် တိူဝ်းၶိုၼ်ႈၼမ်ႁႅင်းၼႆႉသေ ႁဵတ်းႁႂ်ႈၵႃႈၶၼ်ယႃႈ ၼႂ်းမိူင်းထႆး၊ မိူင်းၵမ်ႇပေႃးတီးယႃး လႄႈ မိူင်းမလေးသျုး ၵႃႈၶၼ်ထုၵ်ႇလူင်းမႃး ၵူၼ်းသူႇသမ်းၵိၼ်ၵေႃႈ ၶဝ်ႈထိုင်လႆႈ ၼမ်တိူဝ်းလိူဝ်သေ ၵႃႈၵွၼ်ႇပူၼ်ႉမႃး မိူဝ်ႈယႃႈမဝ်းၵမ် မီးၵႃႈၶၼ်သုင်ၼၼ်ႉ ၼႆယဝ်ႉ။
ဢွၼ်ၼႃႈၼႆႉ Jeremy Douglas တူဝ်တႅၼ်း UNODC ပိုၼ်ႉတီႈဢေးသျႃးၸဵင်ႇၸၢၼ်းဝၼ်းဢွၵ်ႇ လၢတ်ႈဝႃႈ − ယွၼ်ႉငဝ်းလၢႆးဢမ်ႇၼိမ်သဝ်း တီႈၼႂ်းမိူင်းႁူမ်ႈတုမ်သေ ၵၢၼ်ၽုၵ်ႇယႃႈၼႆႉ ႁႃငိုၼ်းလႆႈငၢႆႈလႄႈ ပဵၼ်ဢၼ်လီလႆႈမႆႈၸႂ် ပုၼ်ႈတႃႇၵူၼ်းမိူင်း ဢၼ်ယူႇၼႂ်းမိူင်းတႆး၊ မိူင်းၶၢင် လႄႈ မိူင်းယၢင်း တေဢွၼ်ၵၼ် တိူဝ်းၽုၵ်ႇသွမ်ႈယႃႈ ယွၼ်ႉပၢႆးမၢၵ်ႈမီးၼႂ်းမိူင်းတူၵ်းတႅမ်ႇၵေႃႈ ၸၢင်ႈပဵၼ်လႆႈ ၼႆယဝ်ႉ။
တႆးလွတ်ႈလႅဝ်း
