လွႆၾႆးပူႇလူႇသၢၼ်ႇ ၼိူဝ်ၵုၼ်လူႇသၢၼ်ႇ ၸၢင်ႈတႅၵ်ႇလႄႈ ၾီႇလိပ်ႇပိၼ်ႇ ပၵ်းတႃတူၺ်းၸွမ်းၶိုတ်းၸမ်

မိူဝ်ႈၼႆႉဝၼ်းထီႉ 6 June 2022 (လိူၼ်ၸဵတ်းမႂ်ႇ 8 ၶမ်ႈ ပီႊတႆး 2116 ၼီႈ) ႁွင်ႈၵၢၼ်ၽၢႆႇလူလွမ် ၵႅတ်ႇၶႄထိင်းသိမ်း သၽႃႇဝ မိူင်းၾီႇလိပ်ႇပိၼ်ႇ ဢွၵ်ႇမႃးပိုၼ်ၽၢဝ်ႇဝႃႈ လွင်ႈလႆႈဢွၵ်ႇမႃးပၼ်ၾၢင်ႉၵူၼ်းမိူင်း ၵဵဝ်ႇလူၺ်ႈလွင်ႈ လွႆၾႆးပူႇလူႇသၢၼ်ႇၼႆႉ ယွၼ်ႉဝႃႈ ထူပ်းႁၼ်လွင်ႈလၢၵ်ႇလၢႆး တႄႇၶၵ်ႉ 0 သေ ပဵၼ်မႃး ၶၵ်ႉထီႉ 1 လႄႈ လွႆၾႆး ၸၢင်ႈတေတႅၵ်ႇထႅင်ႈ ဝႃႈၼႆ။

ၸွမ်းလူၺ်ႈလွင်ႈတၢင်းၼႆႉသေ မိူဝ်ႈဝႃးဝၼ်းထီႉ 5 June 2022 ၼၼ်ႉ လွႆၾႆးပူႇလူႇသၢၼ်ႇ လႆႈတႄႇပွႆႇၾုၼ်ႇၵႂၼ်းဢွၵ်ႇ ပုင်ႈၶိုၼ်ႈသုင်ထိုင် 1 ၵီႇလူဝ်ႇမီႇတိူဝ်ႇ ၼႆယဝ်ႉ။

ၶၢဝ်းယၢမ်းလဵဝ်ၵၼ်ၼၼ်ႉ ႁွင်ႈၵၢၼ်ၽၢႆႇလူလွမ် ၵႅတ်ႇၶႄထိင်းသိမ်း သၽႃႇဝ မိူင်းၾီႇလိပ်ႇပိၼ်ႇတႄႉ လၢမ်းၶၢတ်ႈဝႃႈ ၾုၼ်ႇၵႂၼ်းၾႆးၼၼ်ႉ ပုင်ႈၶိုၼ်ႈသုင် ထိုင် 4 ၵီႇလူဝ်ႇမီႇတိူဝ်ႇ ၼႆသေ ႁိမ်းႁွမ်းလွႆၾႆးၼၼ်ႉ ဝႆႉပဵၼ်ပိုၼ်ႉတီႈဢမ်ႇလွတ်ႈၽေး လႄႈၵူၼ်းမိူင်းၸိူဝ်းယူႇသၢင်ႈၵိၼ်သဝ်း ႁိမ်းႁွမ်းၼၼ်ႉ ႁႂ်ႈႁိပ်ႈၼႅတ်ႈၶၢႆႉၶူဝ်းႁိူၼ်းၶူဝ်းယေး ပၢႆႈဢွၵ်ႇတူင်ႇတၢင်ႇၼၼ်ႉ ဝႆးဝႆးၽႂ်းၽႂ်း ဝႃႈၼႆ။

ယင်းသိုပ်ႇပၼ်ၾၢင်ႉပႃးဝႃႈ ၵူၼ်းမိူင်းၸိူဝ်းယူႇဝႆႉၼႂ်းပိုၼ်ႉတီႈႁိမ်းႁွမ်း လွႆၾႆးၼၼ်ႉ ၼင်ႇႁိုဝ်တေဢမ်ႇပဵၼ်တၢင်းပဵၼ် ၵဵဝ်ႇလူၺ်ႈသဵၼ်ႈတၢင်းလူမ်းထူၺ်ႈၸႂ် ႁႂ်ႈဢွၼ်ၵၼ် သႂ်ႇၽႃႈပူၵ်ႉသူပ်း တႃႇႁေႉၵင်ႈတၢင်းပဵၼ် လႄႈ ဢမ်ႇထုၵ်ႇလီယူႇၼႂ်းၵၢင်ပၢင်ႇ ဝႃႈၼႆ။

လွႆၾႆးပူႇလူႇသၢၼ်ႇၼႆႉ တၢင်းသုင်မီး 1,565 မီႇတိူဝ်ႇ လႄႈမီးဝႆႉၼိူဝ်ၵုၼ်လူႇသၢၼ်ႇပွတ်းၸၢၼ်း ႁၢင်ႇၵႆၵၼ်တင်းဝဵင်းလူင်မၼီႇလႃႇ 600 ၵီႇလူဝ်ႇမီႇတိူဝ်ႇ လႄႈ လွႆၾႆးလုၵ်ႈၼႆႉ ပဵၼ် 1 ၼႂ်း 24 လွႆၾႆး ၼႂ်းမိူင်းၾီႇလိပ်ႇပိၼ်ႇသေ လွႆၾႆးပူႇလူႇသၢၼ်ႇ ယၢမ်ႈတႅၵ်ႇၵႂႃႇပွၵ်ႈလိုၼ်းသုတ်း မိူဝ်ႈလိူၼ် June ပီႊ 2017 ဝႃႈၼႆ။

တႆးလွတ်ႈလႅဝ်း