လၢႆၸႄႈမိူင်း ၼႂ်းမိူင်းၶႄႇပွတ်းၸၢၼ်း ၼမ်ႉထူမ်ႈႁၢဝ်ႈႁႅင်း

လၢႆလၢႆၸႄႈမိူင်း ၼႂ်းမိူင်းၶႄႇပွတ်းၸၢၼ်း မိူၼ်ၼင်ႇ Guangdong, Fujian, Guizhou ထူပ်းၽေးၼမ်ႉထူမ်ႈႁၢဝ်ႈႁႅင်း ဝၢႆးသေၾူၼ်တူၵ်းယဝ်ႉ ယွၼ်ႉႁႅင်းၼမ်ႉၶိုၼ်ႈ သုင်သုတ်း ၼႂ်းႁွပ်ႈၶူပ်ႇ 60 ပီႊ ဝႃႈၼႆ။

ၼမ်ႉတင်းၼမ်ၼၼ်ႉ လႆလူၼ်ႉတဵမ်ၽၢႆဝႆႉလႄႈ ၽၢႆႇၽူႈမီးပုၼ်ႈၽွၼ်းမိူင်းၶႄႇ ၶဝ်ၵေႃႈ လႆႈႁိပ်ႈၼႅတ်ႈဢဝ်ၼမ်ႉဢွၵ်ႇၽၢႆလၢႆတီႈယူႇ တႃႇႁႄႉၵင်ႈလွင်ႈၽၢႆတႅၵ်ႇ ၼႆယဝ်ႉ။

မီးၵူၼ်းၼပ်ႉႁူဝ်သႅၼ် လႆႈၶၢႆႉၵႂႃႇယူႇတီႈလွတ်ႈၽေး၊ မိူၼ်ၸိူင်ႉၼင်ႇ ၸႄႈမိူင်း Guangdong ၼႆႉၵေႃႈ ပဵၼ်သုၼ်ၵၢင်တီႈႁဵတ်းဢွၵ်ႇလႄႈ ၵၢၼ်တေႃႉသူင်ႇပဵၼ်ပိူင်လူင် ဢၼ်ပၵ်းသဝ်းဝႆႉယူႇၼႂ်းဝဵင်းလူင် Shenzhen ဢၼ်ပဵၼ်ဝဵင်းလူင်ၽၢႆႇ IT ၶွင်ၶႄႇသေ လႆႈဝႃႈၶႄႇထူပ်းၽေးဢၼ်ယႂ်ႇလူင် တႄႉတႄႉ လွင်ႈၼမ်ႉထူမ်ႈပွၵ်ႈၼႆႉ။

မီးလၢႆးငၢၼ်းၼႂ်း Guangdong ဝႃႈ ႁူဝ်ၼပ်ႉၵူၼ်း ဢမ်ႇယွမ်း 5 သႅၼ်ၵေႃႉ လႆႈႁပ်ႉၽွၼ်းတုမ်ႉယွၼ်ႈ ယွၼ်ႉၼမ်ႉထူမ်ႈလႄႈလိၼ်ၵူၼ်ႇသေ မီးၵူၼ်းမိူင်းဢမ်ႇယွမ်း 1.7 သႅၼ်ၵေႃႉ လႆႈၶၢႆႉပၢႆႈဢွၵ်ႇယူႇတီႈလွတ်ႈၽေး လႄႈ လင်ႁိူၼ်းလူႉလႅဝ်ဢမ်ႇယွမ်း 1,700 လင် ၼႆယဝ်ႉ။

သိုဝ်ႇၶၢဝ်ႇၶႄႇ လၢႆးငၢၼ်းဝႃႈ ၼႂ်းၶၢဝ်းတၢင်း 46 ဝၼ်း တႄႇဢဝ် ဝၼ်းထီႉ 1 May-15 June 2022 ၼႆႉ မီးၾူၼ်တူၵ်းႁၢဝ်ႈႁႅင်း ၼႂ်းၸႄႈမိူင်း Guangdong ၊ Fujian လႄႈ ပိုၼ်ႉတီႈဢုပ်ႉပိူင်ႇတူဝ်ၵဝ်ႇ Guangxi ၸိူဝ်းၼႆႉသေ တႅၵ်ႈၼမ်ႉၾူၼ်လႆႈထိုင် 621 millimeters လႆႈဝႃႈၼမ်ႉၾူၼ်ဢၼ်တူၵ်းမႃးၼမ်သုတ်း တႄႇၸဵမ်မိူဝ်ႈပီႊ 1961 ၼႆယဝ်ႉ။

ယွၼ်ႉၶဝ်ႈၶၢဝ်းႁိုဝ်ႉသေ ၾူၼ်တူၵ်းၼႂ်းမိူင်းၶႄႇပွတ်းၸၢၼ်း ၼႂ်းပီႊ 2022  ၼႆႉၵူၺ်း ႁဵတ်းႁႂ်ႈမီးၵူၼ်းလူႉသဵင်ႈတၢႆ ယဝ်ႉ ဢမ်ႇယွမ်း 32 ၵေႃႉ လင်ႁိူၼ်းလူႉသုမ်း 2,700 လင် ၼႃးထုၵ်ႇၼမ်ႉထူမ်ႈ လႆႈႁပ်ႉလွင်ႈလူႉသုမ်းယဝ်ႉ ၸမ် 6 သႅၼ်ဢေႇၵ ၼႆယဝ်ႉ။

တႆးလွတ်ႈလႅဝ်း