ယႃႈမဝ်းၵမ်လိူင်ႇၼမ် ၵမ်းၵမ်းတီႉၺွပ်းလႆႈ

ၽၢႆႇၽဵဝ်ႈမူၺ်ႉ ယႃႈမဝ်းၵမ်မၢၼ်ႈ CCDAC Myanmar ပိုၼ်ၽၢဝ်ႇၵႂႃႇဝႃႈ တီႉၺွပ်းလႆႈတႅင်ႈယႃႈၶၢဝ် ၵႃႈၶၼ်ငိုၼ်းမၢၼ်ႈ သႅၼ်ပွင်း 6,000 ပၢႆ တီႈၼႂ်းၸႄႈဝဵင်း သႅၼ်ဝီ ၸိုင်ႈတႆးပွတ်းႁွင်ႇ ၼႆယဝ်ႉ။

မိူဝ်ႈဝၼ်းထီႉ 17 July 2022 (လိူၼ်ပႅတ်ႇလွင်ႈ 5 ၶမ်ႈ ပီႊတႆး 2116 ၼီႈ) ယၢမ်းၵၢင်ၼႂ် 08:00 မူင်း ၽၢႆႇၽဵဝ်ႈမူၺ်ႉ ယႃႈမဝ်းၵမ်မၢၼ်ႈ တီႉၺွပ်းလႆႈတႅင်ႈယႃႈၶၢဝ် 116 တႅင်ႈ ၼမ်ႉၼၵ်း 40.6 Kg (ၵီႇလူဝ်ႇၵရမ်ႇ) ၵႃႈၶၼ်ငိုၼ်းမၢၼ်ႈ သႅၼ်ပွင်း 6,000 ပၢႆ တီႈလၢၼ်ႇၵူတ်ႇထတ်းၼမ်ႉဢုၼ်ႇ ၸႄႈဝဵင်းသႅၼ်ဝီ၊ တီႉၺွပ်းလႆႈပႃး ၵူၼ်းႁေႃႈၵႃး တေႃႉတၢင်ႇယႃႈမဝ်းၵမ် ႁွင်းလွၼ်း၊ ၵူၼ်းၸွမ်းၵႃး ၸေႃႇၵယွင်ႇ ႁူမ်ႈပႃးလူတ်ႉၵႃး Crown ၼိုင်ႈလမ်း ဝႃႈၼႆ။

တႅင်ႈယႃႈၶၢဝ်ၼႆႉ လုၵ်ႉတီႈၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်း တေဢၢၼ်းတေႃႉတၢင်ႇၵႂႃႇတၢင်း ဝဵင်းမူႇၸေႊ ၸိုင်ႈတႆးပွတ်းႁွင်ႇသေ ယၢၼ်ႇၸူင်းပဵဝ်း (ႁွင်ႉ) ဢွင်ႇၵျေႃႇမူဝ်း ၵူၼ်းဢၼ်ၵဵဝ်ႇၶွင်ႈၸွမ်း ၵၢၼ်တေႃႉသူင်ႇ ယႃႈမဝ်းၵမ် ပွၵ်ႈၼႆႉၵေႃႈ တီႉၺွပ်းဝႆႉယဝ်ႉ ဝႃႈၼႆ။

ဝၢႆးသေတပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈယဝ်ႉ လွင်ႈမၢႆမီႈႁူမ်ႇငမ်း ယူပ်ႈယွမ်းမႃး သေ ပၼ်ႁႃယႃႈမဝ်းၵမ် လႄႈ ၽူႈလၵ်ႉၵူၼ်းၸူၼ် လိူင်ႇၼမ်မႃး ၵူႈဝၼ်းဝၼ်း သေဢမ်ႇၵႃး ၼင်ႇႁိုဝ်ၵူၼ်းမိူင်း ပေႃးတေဢမ်ႇသူၼ်ၸႂ်ၵၢၼ်ဝၢၼ်ႈၵၢၼ်မိူင်းလႄႈ တႃႇတပ်ႉသိုၵ်းမၢၼ်ႈ ယိုတ်းဢၢမ်းၼၢတ်ႈၸိုင်ႈမိူင်း ပေႃးတေဢွင်ႇမၢၼ်ၶႅမ်ႉလႅပ်ႈ ၼၼ်ႉၵေႃႈ ၶွင်ႇသီႇသိုၵ်းမၢၼ်ႈ ပၼ်ၶႂၢင်ႉၸတ်းႁဵတ်းပၢင်တေႃႇပၢင်လွင်း ၸဵမ်ၸိူဝ်းၼႆႉ ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း