သပဵၼ်ႇ Spain လိုပ်ႈလမ်းၽွင်းတၢင်ရၢတ်ႉသျႃးဢွၵ်ႇမိူင်း 25 ၵေႃႉ

မိူဝ်ႈဝၼ်းထီႉ 6 April 2022 (လိူၼ်ႁႃႈမႂ်ႇ 6 ၶမ်ႈပီႊတႆး 2116 ၼီႈ) လူင်ပွင်ၸိုင်ႈ သပဵၼ်ႇ Spain လိုပ်ႈလမ်း ၽွင်းတၢင်ရၢတ်ႉသျႃး 25 ၵေႃႉပွၵ်ႈမိူဝ်းမိူင်းရၢတ်ႉသျႃးၶိုၼ်း ဝၢႆးသေၸိုင်ႈမိူင်းဢူၺ်းလီ ယူးရူပ်ႉ လႆႈလိုပ်ႈလမ်း ၽွင်းတၢင် ရၢတ်ႉသျႃး ပွၵ်ႈၶိုၼ်းမိူင်း တႃႇတုမ်ႉတွပ်ႇၶိုၼ်းလွင်ႈႁဵတ်းသၢင်ႈ မိူၵ်ႈမႆႈရၢတ်ႉသျႃး ၼႂ်းယူႇၶရဵၼ်း ဝႃႈၼႆ။

Jose Manuel Alvares ၽွင်းလူင်ၽၢႆႇၼွၵ်ႈမိူင်း သပဵၼ်ႇ Spain လၢတ်ႈၵႂႃႇၼႂ်းဝၼ်းထီႉ 5 April 2022 ဝႃႈ သပဵၼ်ႇ Spain လႆႈတႅပ်းတတ်းၸႂ်ယဝ်ႉတႃႇလိုပ်ႈလမ်း ၽွင်းတၢင်ရၢတ်ႉသျႃး 25 ၵေႃႉၼၼ်ႉဢွၵ်ႇမိူင်း သပဵၼ်ႇ Spain ၵႂႃႇ ၊ ယွၼ်ႉဝႃႈၽွင်းတၢင်ၸိူဝ်းၼၼ်ႉပဵၼ်ၽေး လွင်ႈမၼ်ႈၼိမ်သဝ်း တေႃႇ သပဵၼ်ႇ Spain ဝႃႈၼႆ။

Jose Manuel Alvares ယင်းသိုပ်ႇလၢတ်ႈထႅင်ႈဝႃႈ လွင်ႈလႆႈလိုပ်ႈလမ်း ၽွင်းတၢင် ရၢတ်ႉသျႃး ပွၵ်ႈမိူဝ်းမိူင်းၶိုၼ်းၼၼ်ႉ တိုၵ်ႉပဵၼ်ၵၢၼ်တုမ်ႉတွပ်ႇဢိတ်းဢီႈၵူၺ်း ၵႃႈပူၼ်ႉမႃးၼႂ်းယူႇၶရဵၼ်း ယဵၼ်းပဵၼ်လွင်ႈႁူၵ်းႁၢႆႉ မိူၼ်ၼင်ႇ မိူင်းပူးၶျႃး မႃႊရိဢူးၽုတ်း ဢၼ်မီးၶၢဝ်ႇဢွၵ်ႇမႃးဝႃႈ ပဵၼ်လွင်ႈၽဵဝ်ႈမူၺ်ႉၶိူဝ်းၵူၼ်းၼၼ်ႉ လူဝ်ႇလႆႈဢဝ်တၢင်းၽိတ်းယူႇယဝ်ႉ ဝႃႈၼႆ။

ၽၢႆႇတၢင်းရၢတ်ႉသျႃး ပၢၵ်ႈပႅတ်ႈၶေႃႈၵၢဝ်ႇႁႃ တပ်ႉသိုၵ်းၶဝ်ဢမ်ႇလႆႈၶႃႈႁႅမ်ၵူၼ်းမိူင်း ၼႂ်းမိူင်းပူးၶျႃး ဝႃႈၼႆ။ လိူဝ်သေၼၼ်ႉ ဝၼ်းထီႉ 5 April 2022 ၶၢဝ်းယၢမ်းၵၢင်ၼႂ်ၸဝ်ႉ မိူၼ်ၼင်ႇ ဢီႇတလီႇ၊ သဝိတ်ႉတဵၼ်ႇ ၊ တဵၼ်းမၢၵ်ႉ လႆႈပိုၼ်ၽၢဝ်ႇ လိုပ်ႈလမ်း ၽွင်းတၢင်ရၢတ်ႉသျႃး ဢွၵ်ႇမိူင်းၽႂ်မၼ်းၵႂႃႇ လူၺ်ႈမီးၶေႃႈယိူင်းဢၢၼ်း မိူၼ် သပဵၼ်ႇ Spain ၵူၺ်း ဝႃႈၼႆ။

ၸိူင်ႉႁိုဝ်ၵေႃႈလီ Jose Manuel Alvares ၽွင်းလူင်ၽၢႆႇၼွၵ်ႈမိူင်း သပဵၼ်ႇ Spain လၢတ်ႈဝႃႈ ၵူၺ်း သပဵၼ်ႇ Spain တေပႆႇၵိုင်ႉၵၢင်ႉလိုပ်ႈလမ်း ၽွင်းတၢင်ရၢတ်ႉသျႃး ဢွၵ်ႇမိူင်းၵမ်းသိုဝ်ႈ ယွၼ်ႉဝႃႈ ၶႆႈႁႂ်ႈၽွင်းတၢင် သပဵၼ်ႇ Spain ဢၼ်ယူႇၼႂ်းရၢတ်ႉသျႃး ႁဵတ်းၸွမ်းပုၼ်ႈၽွၼ်းၵႂႃႇလႄႈ ဢဝ်ဝႆႉပဵၼ်တႃႇပိုတ်ႇ သဵၼ်ႈတၢင်း ဢုပ်ႇၸွမ်းရၢတ်ႉသျႃး တႃႇၵိုတ်းတိုၵ်း ဝႃႈၼႆ။

ဢိင်- https://www.voathai.com

တႆးလွတ်ႈလႅဝ်း