သိုၵ်းမၢၼ်ႈတိူၵ်ႈၼႃႇယဝ်ႉလႄႈ တဵၵ်းယွၼ်းငိုၼ်းတမ်ႇငႃႈ 30 သႅၼ်

တမ်ႇငႃႈၵေႃႉၼိုင်ႈ ႁႃၵိၼ်လဵင်ႉတွင်ႉ တီႈဝၢၼ်ႈၼမ်ႉတူၵ်း ၸႄႈဝဵင်းပၢင်လွင်း လူၺ်ႈဢမ်ႇၽိတ်းမၢႆမီႈသင်ၼၼ်ႉ ထုၵ်ႇသိုၵ်းမၢၼ်ႈ ႁႃတၢင်းၽိတ်းပူဝ်ႉသႂ်ႇသေ တီႉၺွပ်းၵုမ်းၶင် လႄႈ လွၵ်ႇငိူတ်ႈထိုင်သၢႆၸႂ်။

မိူဝ်ႈဝၼ်းထီႉ 19 October 2022 သိုၵ်းမၢၼ်ႈ ၵူတ်ႇထတ်းၵူၼ်းမိူင်း တီႈဝၢၼ်ႈၼမ်ႉတူၵ်းလႄႈ သမ်ႉၵႂႃႇယွၼ်းၵူတ်ႇထတ်းတူၺ်း ႁိူဝ်း ၵူဝ်ႇၽူဝ်းထွင်ႇ ၵေႃႉပဵၼ်တမ်ႇငႃႈသေ ထုၵ်ႇသိုၵ်းမၢၼ်ႈၵၢဝ်ႇၼႄးတၢင်းၽိတ်းသႂ်ႇ လႄႈ တီႉၺွပ်းၵုမ်းၶင်ၵမ်းသိုဝ်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈၼႄဝႃႈ “ၵူဝ်ႇၽူဝ်းထွင်ႇၼၼ်ႉ သိုၵ်းမၢၼ်ႈ ယွၼ်းၵူတ်ႇထတ်းတူၺ်းႁိူဝ်းမၼ်း၊ မၼ်းၵေႃႈဝႃႈ ထတ်းတူၺ်း လႄႈ ၸၢင်ႈမီးသင် လိူဝ်သေမီးပႃ ဝႃႈၸိူင်ႉၼႆၵူၺ်း ထုၵ်ႇသိုၵ်းမၢၼ်ႈဝႃႈတီႈမၼ်းၶိုၼ်း ‘မႂ်းမီးသုၼ်ႇလၢတ်ႈတီႈႁဝ်းၶိုၼ်းယူႇႁႃႉ’ ၼႆသေ တီႉၺွပ်းမၼ်းၵမ်းသိုဝ်ႈ၊ ၵမ်းၼၼ်ႉ ၶိုၼ်းၸႂ်ႉၵူၼ်းတၢင်းႁိူၼ်းၶဝ် ဢဝ်ငိုၼ်း 30 သႅၼ်ပျႃး ၵႂႃႇထုတ်ႇဢွၵ်ႇ လႄႈ ပေႃးဢမ်ႇထုတ်ႇဢွၵ်ႇတေႁႅမ်တၢႆ ဝႃႈၼႆလူးၵွၼ်ႇ၊ တၢင်းႁိူၼ်းၶဝ်သမ်ႉ ဢမ်ႇမီးငိုၼ်းသင် လႆႈၵႂႃႇၵူႈယိမ်ပိူၼ်ႈ လႄႈ လႆႈၵႂႃႇတွင်းပၢၼ်ႇ သိုၵ်းမၢၼ်ႈ ပဵၼ်တေႉပဵၼ်ဝႃႈႁေၵေႃႈ ၶိုၼ်းလႆႈပၼ် 15 သႅၼ်ပျႃးသေ ၵူဝ်ႇၽူဝ်းထွင်ႇ လႆႈလွတ်ႈဢွၵ်ႇမႃး ၼႂ်းဝၼ်းထီႉ 20 October 2022 ၼႆႉ” ဝႃႈၼႆ။

ဝၢႆးသေသိုၵ်းမၢၼ်ႈယိုတ်းမိူင်းမႃးၼႆႉ သိုၵ်းမၢၼ်ႈထၢင်ႇႁၢင်ႈႁဵတ်းသၢင်ႈလႆႈၵူႈလွင်ႈ လႄႈ ၵူၼ်းမိူင်းၸိူဝ်းဢွၵ်ႇတႃႈပႆတၢင်းၵေႃႈ ထုၵ်ႇတဵၵ်းယွၼ်းငိုၼ်းၵႃႈပွင်ႇၵႃႈပဵၼ် ၸွမ်းၵဵၵ်ႉၸွမ်းလၢၼ်ႇ ယူႇယဝ်ႉ။

တႆးလွတ်ႈလႅဝ်း