သိုၵ်းမၢၼ်ႈလႄႈပိဝ်ႇၸေႃးထီး ယိုဝ်းၵူၼ်းမိူင်းတၢႆ

ၵူၼ်းမိူင်းၼႂ်းပိုၼ်ႉတီႈ ဢၼ်ဢမ်ႇမီးတၢင်းၽိတ်းသင် ႁေႃႈၵႃးတၢင်ႇမၢၵ်ႇႁိၼ်သေ ထုၵ်ႇသိုၵ်းမၢၼ်ႈ တင်း ပိဝ်ႇၸေႃးထီး ႁႄႉၵိုတ်းတီႈပွၵ်ႉပျီႇၵျီးမၢၼ်ႇတၢႆႇ ၸႄႈဝဵင်းပူၵ်ႉပျိၼ်း လႄႈ ဢဝ်ၵွင်ႈယိုဝ်းတၢႆၼိူဝ်ၵႃးၵမ်းသိုဝ်ႈ။

Khit Thit Media ဢွၵ်ႇဝႆႉဝႃႈ မိူဝ်ႈဝၼ်းထီႉ 22 October 2022 (လိူၼ်သိပ်းဢဵတ်းလွင်ႈ 13 ၶမ်ႈ ပီႊတႆး 2116 ၼီႈ) ယၢမ်းၵၢင်ၶိုၼ်းမွၵ်ႈ 22:30 မူင်းၼၼ်ႉ ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ ၸိုဝ်ႈႁွင်ႉ မွင်ႇၸူဝ်း ဢႃႇယု 27 ပီႊ ပဵၼ်လုၵ်ႈၸၢႆး ဢူးၸေႃႇဝိၼ်း တီႈယူႇဝဵင်းမျဵၵ်ႉၼၼ်ႉ ထုၵ်ႇသိုၵ်းမၢၼ်ႈတင်း ပိဝ်ႇၸေႃးထီး ႁေႉၵႃးမၼ်းၸၢႆးၼိူဝ်တၢင်းသေ ဢဝ်ၵွင်ႈယိုဝ်းသႂ်ႇ တီႈၼႃႈဢူၵ်းၵမ်းသိုဝ်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈဝႃႈ တေဝႃႈမၼ်းဢမ်ႇယွမ်းၵိုတ်းၵႃးၼႆၵေႃႈဢမ်ႇၸႂ်ႈ ၼႆႉတင်ႈၸႂ်ႁေႉၽၢႆႇၼႃႈၵႃးသေ ပႂ်ႉယိုဝ်းၵူၺ်းလူင်၊ ၵေႃႉထုၵ်ႇယိုဝ်းၼၼ်ႉ တၢႆၼိူဝ်ၵႃးၵမ်းလဵဝ် လႄႈ မၢၵ်ႇၵွင်ႈတိူဝ်ႉၸပ်း တီႈၼႃႈဢူၵ်းမၼ်းလီလီယဝ်ႉ ၼႆ လႆႈႁၼ် Khit Thit Media ဢွၵ်ႇဝႆႉၼင်ႇၼႆ။

AAPP ၵေႃႈဢွၵ်ႇဝႆႉဝႃႈ တင်ႈတႄႇသိုၵ်းမၢၼ်ႈယိုတ်းမိူင်းမႃး ထိုင်ဝၼ်းထီႉ 21 October 2022 ၼႆႉ ၵူၼ်းမိူင်းၼႂ်းမိူင်းႁူမ်ႈတုမ် ထုၵ်ႇႁႅမ်တၢႆ 2,377 ၵေႃႉ လႄႈ ဢၼ်ထုၵ်ႇၵုမ်းၶင်ဝႆႉမိူဝ်ႈလဵဝ်သမ်ႉ မီး 12,712 ၵေႃႉ ၼႆယဝ်ႉ။

တႆးလွတ်ႈလႅဝ်း