သိုၵ်းမၢၼ်ႈဢဝ်ၾႆးၸုတ်ႇၽဝ်ႁိူၼ်းၵူၼ်းမိူင်း ၸမ် 300 လင်

သိုဝ်ႇၶၢဝ်ႇ Khit Thit Media ဢွၵ်ႇဝႆႉဝႃႈ ၸုမ်းသိုၵ်းမၢၼ်ႈ ဢၼ်ၵႂႃႇတူင်ႉၼိုင်ၸွမ်းပိုၼ်ႉတီႈ ဝၢၼ်ႈထၢၼ်းၸီး ၸႄႈဝဵင်းဝႅတ်ႉလႅတ်ႉ တိူင်းၸႄႈၵႅင်းၼၼ်ႉ ဢဝ်ၾႆးၸုတ်ႇၽဝ်ႁိူၼ်းၵူၼ်းမိူင်း တင်းၼမ်တင်းလၢႆသေ ႁဵတ်းႁႂ်ႈၵူၼ်းမိူင်း ႁၢမ်းတီႈယူႇတၼ်းသဝ်းထႅင်ႈ ဝႃႈၼႆ။

မိူဝ်ႈဝႃးဝၼ်းထီႉ 13 November 2022 (လိူၼ်သိပ်းသွင်လွင်ႈ 6 ၶမ်ႈ ပီႊတႆး 2116 ၼီႈ) သၢႆသိုၵ်းမၢၼ်ႈၶဝ်ႈၵႂႃႇတီႈ ၼႂ်းဝၢၼ်ႈထၢၼ်းၸီး လႄႈ တင်ႈပဝ်ႉမၢႆဝႆႉဝႃႈ ၵႂၢတ်ႇၽဵဝ်ႈလၢင်ႉပိုၼ်ႉတီႈၼႆသေ ဢဝ်ၾႆးၸုတ်ႇပႅတ်ႈႁိူၼ်းၵူၼ်းမိူင်းတင်းၼမ် ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းၼႂ်းပိုၼ်ႉတီႈ လၢတ်ႈတီႈ Khit Thit Media ဝႃႈ “သိုၵ်းမၢၼ်ႈဢဝ်ၾႆးၸုတ်ႇၽဝ်ႁိူၼ်းၵူၼ်းမိူင်း တင်ႈတႄႇၵၢင်ၼႂ်ထိုင်ၵၢင်ၶမ်ႈ လႄႈ ၾႆးမႆႈၵႂႃႇမွၵ်ႈ 300 လင်ၼႆႉယူႇ၊  ၶႂ်ႈမႆႈၵႂႃႇတင်းဝၢၼ်ႈယဝ်ႉ၊ တီႈဝၢၼ်ႈၼႆႉ မီးလင်ႁိူၼ်းတမ်း 400 ပၢႆသေ ၾႆးမႆႈၵႂႃႇၼမ်တေႉတေႉ၊ ၵူၼ်းဝၢၼ်ႈတႄႉ ဢမ်ႇပႆႇမီးၽႂ်ႁတ်းၶဝ်ႈဝၢၼ်ႈ၊ ၵူၼ်းၸၢႆးၸိူဝ်းတူၵ်းပုၼ်ႈၽွၼ်း (ပႂ်ႉဝၼ်း) ၼၼ်ႉၵူၺ်း ၶဝ်ႈၵႂႃႇတူၺ်း” ၼႆယဝ်ႉ။

လွင်ႈသိုၵ်းမၢၼ်ႈ ဢဝ်ၾႆးၸုတ်ႇၽဝ်ႁိူၼ်းၵူၼ်းမိူင်း လႄႈ ႁႅမ်တၢႆပႅတ်ႈၵူၼ်းမိူင်း ၸိူဝ်းဢမ်ႇမီးတၢင်းၽိတ်းသင် ၶိူဝ်းၶိူဝ်းယႂ်းယႂ်းယူႇၼၼ်ႉ တၢင်းၽၢႆႇ ၸေႃႇမိၼ်းထုၼ်း ၽၢႆႇပိုၼ်ၽၢဝ်ႇသိုၵ်းမၢၼ်ႈ တွပ်ႇလၢတ်ႈတီႈသိုဝ်ႇၶၢဝ်ႇ လႄႈ ပႅတ်ႉလႅၼ်ၵူၼ်းၼႂ်းမိူင်းၼွၵ်ႈမိူင်းဝႃႈ လွင်ႈၼႆႉဢမ်ႇၸႂ်ႈႁွႆးမိုဝ်းတပ်ႉမတေႃႇႁဝ်း လႄႈ ႁဝ်းဢမ်ႇလႆႈႁဵတ်း ဝႃႈၼႆ။

ဝၢႆးသေ သိုၵ်းမၢၼ်ႈယိုတ်းမိူင်းမႃးၼႆႉ ႁိူၼ်း/ဝၢၼ်ႈၵူၼ်းမိူင်း လႆႈထုၵ်ႇပဵၼ် ပဝ်ႉမၢႆသေ ၺႃးၸုတ်ႇၽဝ်ပႅတ်ႈတင်းၼမ်တင်းလၢႆ လႄႈ ၵူၼ်းမိူင်းၵေႃႈ ပဵၼ်ဢၼ်တုၵ်ႉၶၶၢၼ်ၸႂ်ႁႅင်းတေႉတေႉ ယူႇယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း