သိုၵ်း SSPP ဢၼ် ၸဝ်ႈသိုၵ်းၼု လႄႈ ၸဝ်ႈႁၢၼ်ၺႃႇ ဢွၼ်ႁူဝ်ၼၼ်ႉ ႁွင်ႉၵူၼ်းမိူင်း ၼႂ်းၸႄႈဝဵင်းမိူင်းၵိုင် ႁဵတ်းပၢင်ၵုမ်သေ ႁႂ်ႈႁႃပၼ်ၸၢႆးငၢၼ်ဝၢၼ်ႈ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ လႅင်ၶၢဝ်ႇၼႂ်းပိုၼ်ႉတီႈ ပွင်ႇၶၢဝ်ႇမႃးဝႃႈ မိူဝ်ႈဝၼ်းထီႉ 6 April 2022 သိုၵ်း SSPP ႁွင်ႉၵူၼ်းဝၢၼ်ႈၵွင်း ဢိူင်ႇႁူၺ်ႈၼွႆႉ ၸႄႈဝဵင်းမိူင်းၵိုင် ႁဵတ်းပၢင်ၵုမ်သေ လၢတ်ႈဝႃႈ 1. တေၵူတ်ႇထတ်းၸႅတ်ႈယဵဝ်ႈ၊ 2. ႁႂ်ႈႁႃပၼ်ၸၢႆးငၢၼ်ဝၢၼ်ႈ၊ 3. သင်ၵႃႉၶၢႆယႃႈမဝ်းၵမ်ၼႆ ယႃႇပေၵႃႉၶၢႆယွႆႈယွႆႈ ယႅမ်းယႅမ်း ႁႂ်ႈၵႃႉယႂ်ႇယႂ်ႇ ၼႆယဝ်ႉ။

ၵွပ်ႈပိူဝ်ႈ သိုၵ်း SSPP ၶဝ် ၵႆႉမီးလွင်ႈ တဵၵ်းႁွင်ႉဢဝ် ၵူၼ်းဝၢၼ်ႈၵူၼ်းမိူင်း ႁဵတ်းပၢင်ၵုမ်သေ ၵဵပ်းသဵၼ်ႈသၢႆမၢႆ မုင်ႉႁေႃႁိူၼ်း(ဢဵင်ႇထွင်ႇၸူႉၸယိၼ်း) တႃႇၶဝ်တေၵဵပ်းသိုၵ်းမႂ်ႇၼၼ်ႉလႄႈ ၵူၼ်းဝၢၼ်ႈ ၸႄႈဝဵင်းမိူင်းၵိုင် သမ်ႉပေႃးလႆႈ ၵႂႃႇၸူးတီႈလုမ်း ၽၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်း (လဝၵ) ၶဝ်သေ ၼႅတ်ႈမႄးၵႄႈၶႆႁႂ်ႈသၢႆမၢႆၵူၼ်းၵိုၵ်းႁိူၼ်းလႄႈ ႁႂ်ႈမၢႆၾၢင်မၼ်း ပေႃးထုၵ်ႇမႅၼ်ႈၸွမ်း လူၺ်ႈ ၵူၼ်းၼႂ်းၼႃႈႁိူၼ်းဢၼ်မီးဝႆႉၼၼ်ႉ ဝႃႈၼႆ။

ဝၢႆးသေ ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ထွၼ်ႁႅင်းသိုၵ်းဢွၵ်ႇ လၢႆလၢႆပိုၼ်ႉတီႈယဝ်ႉၼႆႉ ၸုမ်းသိုၵ်းလေႃးလႄး ဢၼ် SSPP ဢွၼ်ႁူဝ်ၼၼ်ႉ ႁွတ်ႈၽႅဝ်တီႈလႂ်ၵေႃႈ မီးလွင်ႈတဵၵ်းႁွင်ႉဢဝ်ၵူၼ်းဝၢၼ်ႈၵူၼ်းမိူင်း ႁဵတ်းပၢင်ၵုမ်သေဢမ်ႇၵႃး တဵၵ်းႁႂ်ႈၵူၼ်းမိူင်း ႁဵတ်းၸွမ်းၼင်ႇၶဝ်ၶႂ်ႈလႆႈၶႂ်ႈပဵၼ်ၼၼ်ႉလႄႈ သင်ဢမ်ႇႁဵတ်းၸွမ်းလႆႈၼႆၵေႃႈ ယင်းမီးတၢမ်ႇပႃးၸဵမ်ၸိူဝ်းၼႆႉသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ယူႇယၢပ်ႇ ၵိၼ်းၶၢၼ်ၸႂ်တေႉတေႉ ဝႃႈၼႆ။

တႆးလွတ်ႈလႅဝ်း