သျီႇ ၵျိၼ်းၽိင်ႇ ပိုၼ်ၽၢဝ်ႇ တေသၢင်ႈတပ်ႉသိုၵ်းႁႂ်ႈၵႅၼ်ႇၶႅင်လိူဝ်သေၵဝ်ႇ

ၸွမ်ၸိုင်ႈၶႄႇ သျီႇ ၵျိၼ်းၽိင်ႇ လႆႈပိုၼ်ၽၢဝ်ႇလၢတ်ႈၵႂႃႇတီႈၼႂ်းပၢင်ၵုမ်လူင် NPC ဝႃႈ ၶႄႇတေသၢင်ႈတပ်ႉသိုၵ်း ႁႂ်ႈမီးလွင်ႈၵႅၼ်ႇၶႅင်မိူၼ်ၼင်ႇႁူဝ်ႉလဵၵ်း ဝႃႈၼႆ။

မိူဝ်ႈဝၼ်းထီႉ 13 March 2023 ၸွမ်ၸိုင်ႈၶႄႇ သျီႇ ၵျိၼ်းၽိင်ႇ လႆႈၵၢဝ်ႇလၢတ်ႈ ပၼ်ၶေႃႈမၼ်ႈၵႅၼ်ႇ ပဵၼ်ပွၵ်ႈဢွၼ်တၢင်းသုတ်း တႄႇၸဵမ်မိူဝ်ႈလႆႈႁပ်ႉတၼ်းႁဵင်း ပဵၼ်ၸွမ်ၸိုင်ႈထႅင်ႈ ပဵၼ်ပၢၼ်ထီႉ 3 တေႃႇတူဝ်တႅၼ်းသၽႃးၵူၼ်းမိူင်းၶႄႇ ဢၼ်မီးၸမ် 3,000 ၵေႃႉၼၼ်ႉဝႃႈ တေသၢင်ႈပၼ်လွင်ႈမၼ်ႈၼိမ်သဝ်းၸိုင်ႈမိူင်း ႁႂ်ႈမီးလွင်ႈမၼ်ႈၵိုမ်း ဢိၵ်ႇတင်း သၢင်ႈတပ်ႉသိုၵ်းၶႄႇပဵၼ်မိူၼ်ႁူဝ်ႉလဵၵ်း တႃႇႁႄႉ ၵင်ႈၽွၼ်းလႆႈၶွင်ၸိုင်ႈမိူင်း ၼႂ်းၶၢဝ်းယၢမ်းဢၼ်မီးလွင်ႈၶဵင်ႈၶႅင်ၸွမ်းဢမေႇရိ ၵၢၼ်ႇၼၼ်ႉ ဝႃႈၼႆ။

သိုပ်ႇလၢတ်ႈထႅင်ႈဝႃႈ လွင်ႈမၼ်ႈၼိမ်သဝ်းၼၼ်ႉ ပဵၼ်ငဝ်ႈၶၢမ်ႇပိုၼ်ႉၶွင်ၵၢၼ်မုၼ်း လႅင်းလႄႈ လွင်ႈမၼ်ႈၵိုမ်းၼၼ်ႉ ၸမ်ပဵၼ်တေလႆႈမီး တွၼ်ႈတႃႇလွင်ႈၶိုၼ်ႈယႂ်ႇမႂ်ႇ သုင် သေဢမ်ႇၵႃး လၢတ်ႈထႅင်ႈဝႃႈ ၶႄႇတေလႆႈပိုင်ႈဢိင်တူဝ်ၵဝ်ႇႁႂ်ႈမၼ်းၼမ်ၶိုၼ်ႈ မႃးလႄႈ မီးၵၢၼ်ၶိုပ်ႈၼႃႈ ၼႂ်းလွင်ႈ Technology တင်း ပၢႆးသၢႆႈတင်းၼမ် ဝၢႆးသေ ဢမေႇရိၵၢၼ်ႇ ၶတ်းၸႂ်ၶတ်းၶႂၢင်ၶႄႇ ၼႂ်းၵၢၼ်ၶဝ်ႈထိုင်ၶိူင်ႈၸၢၵ်ႈဢိတ်ႇဢွၵ်ႇ Chip လႄႈ Technology ဢၼ်ၶိုတ်းၵၢပ်ႈၸိူဝ်းၼႆႉ ဝႃႈၼႆ။

ဢွၼ်တၢင်းၼႆႉၵေႃႈ ၽွင်းလူင်ၽၢႆႇၼွၵ်ႈမိူင်း မိူင်းၶႄႇ ၵေႃႉမႂ်ႇ လႆႈလၢတ်ႈပၼ်ၾၢင်ႉ ဝႃႈ လွင်ႈဢမေႇရိၵၢၼ်ႇ ၶတ်းၸႂ်ၵုမ်းထိင်းၽွၼ်းလႆႈၶွင်ၸိုင်ႈမိူင်းၶႄႇၼၼ်ႉ တေႁဵတ်းႁႂ်ႈမီးလွင်ႈၶဵင်ႈၶႅင်လႄႈ တေႃႇသူႈၵၼ်မႃး ဝႃႈၼႆ။

ၽၢႆႇတၢင်းပႃႇတီႇၶွမ်ႇမိဝ်ႇၼိတ်ႉမိူင်းၶႄႇၵေႃႈ ဢမ်ႇတွၼ်ႉလႅၵ်ႈလၢႆႈပိူင်ၵၢၼ် လွင်ႈႁူမ်ႈႁွမ်းဢဝ်မိူင်းထႆႇဝၼ်ႇ ၶဝ်ႈပဵၼ်ၸိုင်ႈမိူင်းလဵဝ်ၵၼ်တင်း မိူင်းၶႄႇ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၸွမ်ၸိုင်ႈၶႄႇ သျီႇ ၵျိၼ်းၽိင်ႇ လႆႈလၢတ်ႈဝႃႈ မၼ်းတေႁဵတ်းၵၢၼ်တႃႇၵႄႈၶႆပၼ်ႁႃတီႈၵုၼ်ထႆႇဝၼ်ႇလႄႈ တေသၢင်ႈလွင်ႈ မိုတ်ႈၵိုဝ်းၸမ်ၸႂ် ၽၢၼ်ႇတၢင်းပိုၼ်ႉတီႈၵႅပ်ႈထႆႇဝၼ်ႇ လူၺ်ႈလွင်ႈငမ်းယဵၼ် ၵူၺ်းၵႃႈ တေသၢၼ်ၶတ်း လွင်ႈၵူၼ်းၽၢႆႇၼွၵ်ႈၶဝ်ႈမႃးၸိမ်ၸွမ်း ႁူမ်ႈထိုင်ပႃး လွင်ႈတူင်ႉၼိုင် ၸုမ်းၸိူဝ်းၸႅၵ်ႇယႅၵ်ႈလႅၼ်လိၼ် ၼႂ်းထႆႇဝၼ်ႇ ဢၼ်တုၵ်းယွၼ်းလွင်ႈလွတ်ႈလႅဝ်းၼၼ်ႉ ဝႃႈၼႆ။

ၸိူဝ်ႉႁိုဝ်ၵေႃႈလီ ၸွမ်ၸိုင်ႈၶႄႇ သျီႇ ၵျိၼ်းၽိင်ႇ ယင်းလႆႈလၢတ်ႈထိုင် လွင်ႈၸမ်ပဵၼ် ၵၢၼ်ၸႂ်ႉတိုဝ်းပၵ်းပိူင်း ၼိုင်ႈၸိုင်ႈမိူင်း သွင်ပၵ်းပိူင် တီႈၼႂ်း Hong Kong လႄႈ Macau ယွၼ်ႉလွင်ႈပၢႆးမၢၵ်ႇမီး ဢၼ်မၼ်ႈၵိုမ်းၶၢဝ်းယၢဝ်း ၼႂ်း Hong Kong တင်း Macau ၼၼ်ႉ ပဵၼ်ဢၼ်လွင်ႈယႂ်ႇ တႃႇသၢင်ႈပၼ်ႁႂ်ႈၶႄႇ ပဵၼ်ၸိုင်ႈမိူင်းဢၼ်ၵႅၼ်ႇၶႅင် ဝႃႈၼႆ။

တႆးလွတ်ႈလႅဝ်း