ဢမေႇရိၵၢၼ်ႇ တုၵ်းယွၼ်း ၶႄႇ လႄႈ ႁွင်ႇၵွင်ႇ ႁႂ်ႈပွႆႇပၼ် ၽူႈႁၢပ်ႇၵၢၼ်သိုဝ်ႇၶၢဝ်ႇ

မိူဝ်ႈဝၼ်းထီႉ 29 December 2021 (လိူၼ်ၸဵင်လွင်ႈ 11 ၶမ်ႈ ပီႊတႆး 2116 ၼီႈ) ၼႆႉ ၽွင်းလူင်ၽၢႆႇၼွၵ်ႈမိူင်း မိူင်းဢမေႇရိၵၢၼ်ႇ Antony Blinken လႆႈလၢတ်ႈႁႂ်ႈ လူင်ပွင်ၸိုင်ႈ ၶႄႇ လႄႈ ႁွင်ႇၵွင်ႇ ပွႆႇပၼ်ၽူႈႁၢပ်ႇၵၢၼ်ၵေႃသိုဝ်ႇၶၢဝ်ႇ Stand News ဢၼ်ထုၵ်ႇပလိၵ်ႈႁွင်ႇၵွင်ႇ ပိၵ်းဢိုတ်းလွင်ႈဢိတ်ႇဢွၵ်ႇၽိုၼ်ႇၶၢဝ်ႇသေ တီႉၺွပ်းၵႂႃႇၼၼ်ႉဝႃႈၼႆ။

ၼႂ်းလိၵ်ႈပိုၼ်ၽၢဝ်ႇဢမေႇရိၵၢၼ်ႇၼၼ်ႉ လၢတ်ႈႁႂ်ႈ လူင်ပွင်ၸိုင်ႈ ၶႄႇ လႄႈ ႁွင်ႇၵွင်ႇ ၵိုတ်းယင်ႉ လွင်ႈဢဝ်သိုဝ်ႇၶၢဝ်ႇ ၸိူဝ်းႁဵတ်းၵၢၼ်တႃႇလွင်ႈလွတ်ႈလႅဝ်းၼၼ်ႉ ပဵၼ်ပဝ်ႉမၢႆဝႆႉသေဢမ်ႇၵႃး ႁႂ်ႈလႆႈပွႆႇပၼ်ၽူႈသိုဝ်ႇၶၢဝ်ႇ လႄႈ ၽူႈၸတ်းၵၢၼ် ၵေႃသိုဝ်ႇၶၢဝ်ႇ Stand News ဢၼ်ထုၵ်ႇတီႉၺွပ်း ၵႂႃႇၵုမ်းၶင်တူဝ်ဝႆႉ လူၺ်ႈဢမ်ႇမီးလွင်ႈတြႃးၽဵင်ႇပဵင်းၼၼ်ႉ ၵမ်းလဵဝ်ဝႃႈၼႆ။

ၼွၵ်ႈလိူဝ်ၼၼ်ႉ ယင်းလၢတ်ႈပႃးဝႃႈ လွင်ႈဢၼ် လူင်ပွင်ၸိုင်ႈ ၶႄႇ လႄႈ ႁွင်ႇၵွင်ႇ ၶတ်းၸႂ် မွတ်ႇႁၢႆပႅတ်ႈ သိုဝ်ႇၶၢဝ်ႇဢၼ်လွတ်ႈလႅဝ်းၼၼ်ႉၵေႃႈ မိူၼ်ၵၼ်တင်း ယိုင်ႈၶႅၼ်းႁဵတ်းႁႂ်ႈ တုမ်ႉတိူဝ်ႉတေႃႇ လွင်ႈယူႇလွတ်ႈလႆႈ လႄႈ လွင်ႈယုမ်ႇယမ် ၵုၼ်ႁွင်ႇၵွင်ႇ ယူႇဝႃႈၼႆ။

ၵေႃသိုဝ်ႇၶၢဝ်ႇ Stand News ၼႆႉ ၵေႃႇတင်ႈၶိုၼ်ႈမိူဝ်ႈပီႊ 2014 ၼၼ်ႉသေ ပဵၼ်သိုဝ်ႇၶၢဝ်ႇ ဢၼ်ဢမ်ႇမီးၼမ်ႉမျႅတ်ႈၼမ်ႉတွၼ်းသင် လႄႈ ပဵၼ်သိုဝ်ႇၶၢဝ်ႇဢၼ်လဵဝ် ဢၼ်ၵိုတ်းယူႇဝႆႉ ဝၢႆးသေ မၢႆမီႈလွင်ႈႁူမ်ႈလူမ်ႈမႂ်ႇ လႆႈမၵ်းမၼ်ႈၸႂ်ႉတိုဝ်းတီႈၵုၼ်ႁွင်ႇၵွင်ႇယဝ်ႉ ၽူႈၵမ်ႉၸွႆႈ သိုဝ်ႇၶၢဝ်ႇ Apple Daily ထုၵ်ႇတီႉၺွပ်းသႂ်ႇၶွၵ်ႈ လႄႈ သိုဝ်ႇၶၢဝ်ႇ Apple Daily ထုၵ်ႇပိၵ်ႉဢိုတ်း ဝႃႈၼႆ။

ယူႇတီႈသိုဝ်ႇၶၢဝ်ႇ Stand News ၵေႃႈ လႆႈမီးလွင်ႈဢွၵ်ႇၶၢဝ်ႇ ၵဵဝ်ႇလွင်ႈၵၢၼ်ဝၢၼ်ႈၵၢၼ်မိူင်း လႄႈ လွင်ႈလွတ်ႈလႅဝ်း ၵုၼ်ႁွင်ႇၵွင်ႇ ႁူမ်ႈပႃး လွင်ႈလွတ်ႈလႅဝ်းသိုဝ်ႇၶၢဝ်ႇ ၸိူဝ်းၼႆႉ ၵမ်ႈပႃႈၼမ် ဝႃႈၼႆ။

တႆးလွတ်ႈလႅဝ်း

 

 

Facebook

ၶၢဝ်ႇလိုၼ်းသုတ်း