ဢိၼ်ႇတူဝ်ႇၼီးသျႃး ၼႅင်ၸႂ် ယွၼ်ႉသိုၵ်းမၢၼ်ႈဢမ်ႇယွမ်းႁဵတ်းၸွမ်း ၶေႃႈတူၵ်းလူင်း ဢႃႇသီႇယၼ်ႇ

ၸွမ်ၸိုင်ႈမိူင်းဢိၼ်ႇတူဝ်ႇၼီးသျႃး ၼႅင်ၸႂ်ၶိုၼ်း ယွၼ်ႉပိူဝ်ႈမိူင်းႁူမ်ႈတုမ် ဢမ်ႇယွမ်းၽေႃႇၼမ်ႉၼႄတူဝ် ၶေႃႈတူၵ်းလူင်း ပၢင်ၵုမ်ဢႃႇသီႇယၼ်ႇ (5) ၶေႃႈၼႆ သိုဝ်ႇၶၢဝ်ႇၼွၵ်ႈမိူင်း ဢွၵ်ႇၶၢဝ်ႇဝႆႉၼင်ႇၼႆ။

လွင်ႈၼႆႉ ယူႇတီႈႁွင်ႈၵၢၼ်ၽၢႆႇၼွၵ်ႈမိူင်း မိူင်းဢိၼ်ႇတူဝ်ႇၼီးသျႃး လႆႈဢွၵ်ႇလိၵ်ႈ ပိုၼ်ၽၢဝ်ႇဝႆႉ မိူဝ်ႈဝႃးဝၼ်းထီႉ 23 January 2022 (လိူၼ်ၵမ်လွင်ႈ 7 ၶမ်ႈ ပီႊတႆး 2116 ၼီႈ) သေ ၵျူဝ်ႇၵူဝ်ႇ ဝီႇတူဝ်ႇတူဝ်ႇ (Joko Widodo) လၢတ်ႈဝႃႈ ပႅၵ်ႉသမ်ႉဝႃႈ ႁုၼ်ႇသဵၼ်ႇ ၸွမ်ၽွင်းလူင် မိူင်းၵမ်ႇပေႃးတီးယႃး ပဵၼ်ပႃး ႁူဝ်ပဝ်ႈဢႃႇသီႇယၼ်ႇ ၵႂႃႇႁူပ်ႉထူပ်းၸွမ်း မိၼ်းဢွင်ႇလႅင်ႇ ထိုင်တီႈမိူင်းႁူမ်ႈတုမ် တႃႇၶၢဝ်းတၢင်း (2) ဝၼ်းသေတႃႉၵေႃႈ ၽၢႆႇသိုၵ်းမၢၼ်ႈ ဢမ်ႇပၼ်ၵႂၢမ်းမၼ်ႈဝႃႈ တေၽေႃႇၼမ်ႉၼႄတူဝ် ၶေႃႈတူၵ်းလူင်း ဢႃႇသီႇယၼ်ႇၼႆလႄႈ ပဵၼ်ဢၼ်ၼႅင်ၸႂ် သဵင်ႈၸႂ်ၸွမ်းတႄႉတႄႉၼႆယဝ်ႉ။

ၼႂ်းလိူၼ် January 2022 ၼႆႉၵူၺ်း ၸွမ်ၸိုင်ႈ မိူင်းဢိၼ်ႇတူဝ်ႇၼီးသျႃး လႄႈ ၸွမ်ၸိုင်ႈ မိူင်းၵမ်ႇပေႃးတီးယႃး လႆႈသိုပ်ႇၾူၼ်း ဢုပ်ႇလၢတ်ႈလွင်ႈမိူင်းႁူမ်ႈတုမ် (2) ပွၵ်ႈယဝ်ႉသေ မိူဝ်ႈဝၼ်းထီႉ 21 January 2022 ပူၼ်ႉမႃးၼႆႉၵေႃႈ ၸွမ်ၸိုင်ႈသွင်ၵေႃႉ လႆႈဢုပ်ႇလွင်ႈၶၢဝ်းတၢင်းႁုၼ်ႇသဵၼ်ႇ မႃးမိူင်းႁူမ်ႈတုမ် ဝႃႈၼႆ။

ၵျူဝ်ႇၵူဝ်ႇ ဝီႇတူဝ်ႇတူဝ်ႇ လၢတ်ႈဝႃႈ − ပေႃးတေဢုပ်ႇတႃႇၵႄႈလိတ်ႈ ပၼ်ႁႃၵၢၼ်မိူင်း မိူင်းႁူမ်ႈတုမ်ပေႃးၼႆၸိုင် ထုၵ်ႇလီဢဝ်ၶေႃႈတူၵ်းလူင်း ပၢင်ၵုမ်ဢႃႇသီႇယၼ်ႇ (5) ၶေႃႈသေ ဢုပ်ႇၵႂႃႇ၊ မူႇပိူင်သိုၵ်းမၢၼ်ႈတမ်းဝၢင်းဝႆႉ (5) ၶေႃႈ ၽွင်းၶဝ်ပိုၼ်ၽၢဝ်ႇပဵၼ် လူင်ပွင်ၸိုင်ႈပႂ်ႉႁိူၼ်း ၼၼ်ႉ ဢမ်ႇၸႂ်ႈသဵၼ်ႈတၢင်း တႃႇၵႄႈလိတ်ႈလႆႈပၼ်ႁႃလႄႈ ထုၵ်ႇလီဢဝ်ၶေႃႈတူၵ်းလူင်း ဢႃႇသီႇယၼ်ႇ ဝႆႉပဵၼ်ပိူင်ယႂ်ႇၵူၺ်း ဝႃႈၼႆ။

သင်ၸိူဝ်ႉဝႃႈ ဢမ်ႇပႆႇၽေႃႇၼမ်ႉၼႄတူဝ်လႆႈ ၶေႃႈတူၵ်းလူင်းဢႃႇသီႇယၼ်ႇ ပေႃးၼႆၸိုင် မိူင်းႁူမ်ႈတုမ် တေလႆႈၶိုၼ်ႈပၢင်ၵုမ်ဢႃႇသီႇယၼ်ႇ ဢၼ်ပဵၼ်ပၢင်ၵုမ်ယူဝ်းယူဝ်းၵူၺ်း၊ ပၢင်ၵုမ်ဢၼ်ၵဵဝ်ႇၸွမ်းၵၢၼ်မိူင်းၼၼ်ႉတႄႉ တေဢမ်ႇမီးသုၼ်ႇၶဝ်ႈႁူမ်ႈၸွမ်းယဝ်ႉ ဝႃႈၼႆ။

တႃႇၵႄႈလိတ်ႈပၼ်ႁႃၵၢၼ်မိူင်း မိူင်းႁူမ်ႈတုမ်လႆႈၼၼ်ႉၵေႃႈ ၸွမ်ၸိုင်ႈ ဢိၼ်ႇတူဝ်ႇၼီးသျႃး တိုၵ်းသူၼ်း သိုၵ်းမၢၼ်ႈယိုတ်းဢၢမ်းၼၢတ်ႈဝႃႈ ႁႂ်ႈပၼ်ၶႂၢင်ႉဢႃႇသီႇယၼ်ႇ လႄႈ ၽွင်းတၢင်ၶိုၵ်ႉတွၼ်း UN  ဢၼ်ၵဵဝ်ႇၸွမ်းမိူင်းႁူမ်ႈတုမ် ၵပ်းသိုပ်ႇႁူပ်ႉထူပ်းၸွမ်းၸုမ်းသၢၼ်ၶတ်း သိုၵ်းမၢၼ်ႈတင်းမူတ်း ႁူမ်ႈပႃး ဢွင်ႇသၢၼ်းသုၵျီႇယူႇၼႆယဝ်ႉ။

တႆးလွတ်ႈလႅဝ်း