ၵူၼ်းတိတ်းၸပ်းၸိူဝ်ႉမႅင်း COVID-19 ၼႂ်းမိူင်းတႆး တိူဝ်းၶိုၼ်ႈထႅင်ႈ 3 ၵေႃႉ

မိူဝ်ႈဝႃး ဝၼ်းထီႉ 22 December 2020 (လိူၼ်ၸဵင်မႂ်ႇ 8 ၶမ်ႈ ပီႊတႆး 2115 ၼီႈ) ၼႂ်းၶၢဝ်းတၢင်း 24 ၸူဝ်ႈမူင်း ၽၢႆႇပၢႆးယူႇလီၶဝ် ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း COVID-19 ၼႂ်းမိူင်းတႆးထႅင်ႈ 3 ၵေႃႉ ဝႃႈၼႆ။

ၽၢႆႇၵူတ်ႇထတ်းၸိူဝ်ႉမႅင်း ဝဵင်းလူင်တူၼ်ႈတီး (Public Health Laboratory – Taunggyi) လႆႈၵူတ်ႇထတ်းၸႅတ်ႈတူၺ်း တူဝ်ယၢင်ႇၼမ်ႉမုၵ်ႈသႂ် 423 ၵေႃႉသေ ၼႂ်းၼၼ်ႉ ထူပ်းႁၼ်ၵူၼ်းတိတ်းၸပ်းၸိူဝ်ႉမႅင်း COVID-19 ထႅင်ႈ 3 ၵေႃႉ၊ ပဵၼ်ၼႂ်းၸႄႈဝဵင်းတူၼ်ႈတီး မိူင်းတႆးပွတ်းၸၢၼ်း 1 ၵေႃႉ၊ ၸႄႈဝဵင်းမိူင်းပဵင်း မိူင်းတႆးပွတ်းဢွၵ်ႇ 1 ၵေႃႉ လႄႈ ၸႄႈဝဵင်းလွႆၵေႃႇ မိူင်းယၢင်းလႅင် 1 ၵေႃႉ ဝႃႈၼႆ။

မိူဝ်ႈဝႃး ယၢမ်းႁူဝ်ၶမ်ႈ လၢၼ်ႇၵူတ်ႇထတ်းၸိူဝ်ႉမႅင်း ၼႂ်းၸႄႈဝဵင်းၵၢတ်ႇလေႃႉၼၼ်ႉၵေႃႈ လႆႈၵူတ်ႇထတ်းၸႅတ်ႈတူၺ်း ၵူၼ်းႁေႃႈၵႃးတၢင်ႇၵုၼ်ႇ လႄႈ ၵူၼ်းၸွမ်းၵႃး ဢၼ်လုၵ်ႉတၢင်းဝဵင်းမၢၼ်းတလေး ဢွၵ်ႇၶၢဝ်းတၢင်းမႃးတီႈ ဝဵင်းတူၼ်ႈတီးသေ ထူပ်းႁၼ်ၵူၼ်းတိတ်းၸပ်းၸိူဝ်ႉမႅင်း COVID-19 ထႅင်ႈ 1 ၵေႃႉ ပဵၼ်ၽူႈၸၢႆး ဢႃႇယု 45 ပီႊ လႄႈ ပဵၼ်ၵူၼ်းႁေႃႈၵႃးတၢင်ႇၵုၼ်ႇ ၼႆယဝ်ႉ။

မိူဝ်ႈဝႃးၼႆႉၵူၺ်းၼင်ႇၵဝ်ႇ ၵူၼ်းပဵၼ်ဢၼ်ယူတ်းယႃတူဝ်တီႈ ႁူင်းယႃၸူဝ်ႈၶၢဝ်း ဢၼ်ပိုတ်ႇၽုၺ်ႇဝႆႉတီႈ ၵျွင်းမူဝ်းၵူၵ်ႉ (မိုးကုတ်ဝိပဿနာကျောင်း) ဝဵင်းတႃႈၶီႈလဵၵ်းၼၼ်ႉ ယူတ်းယႃၸိုၼ်ႈၶႅၼ်းၶိုၼ်းသေ လႆႈလူင်းႁူင်းယႃထႅင်ႈ 1 ၵေႃႉ ပဵၼ်ၽူႈယိင်း ဝႃႈၼႆ၊ ႁူင်းယႃဢွၼ်ႇ Fever Clinic ဢၼ်ပိုတ်ႇၽုၺ်ႇဝႆႉတီႈ ႁူင်းယႃၵဝ်ႇ ဝဵင်းတႃႈၶီႈလဵၵ်းၼၼ်ႉတႄႉ မိူဝ်ႈဝႃး ယၢမ်းၵၢင်ၼႂ် မီးၵူၼ်းၵႂႃႇၵူတ်ႇထတ်းၸႅတ်ႈတူၺ်း 23 ၵေႃႉယူႇ ၵူၺ်းၵႃႈ ဢမ်ႇထူပ်းႁၼ်ၵူၼ်းတိတ်းၸပ်းၸိူဝ်ႉမႅင်း COVID-19 သေၵေႃႉ ၼႆယဝ်ႉ။

ၵူၼ်းတိတ်းၸပ်းၸိူဝ်ႉမႅင်း COVID-19 တီႈဝဵင်းတႃႈၶီႈလဵၵ်းၼႆႉ ႁူမ်ႈတင်းသဵင်ႈ မီး 106 ၵေႃႉ၊ ၵူၼ်းပဵၼ်ဢၼ်ယူတ်းယႃၸိုၼ်ႈၶႅၼ်းၶိုၼ်းသေ လႆႈလူင်းႁူင်းယႃ မီး 97 ၵေႃႉ လႄႈ ၵူၼ်းပဵၼ်ဢၼ်တိုၵ်ႉယူတ်းယႃတူဝ် တီႈႁူင်းယႃ မီး 9 ၵေႃႉ ဝႃႈၼႆ။

ၸွမ်းၼင်ႇႁွင်ႈၵၢၼ်ၽၢႆႇပၢႆးယူႇလီလႄႈ ၽၢႆႇလဵၼ်ႈႁႅင်း မိူင်းႁူမ်ႈတုမ် ပိုၼ်ၽၢဝ်ႇၵႂႃႇ မိူဝ်ႈဝႃး ဝၼ်းထီႉ 22 December 2020 ယၢမ်းၵၢင်ၶိုၼ်း 20 : 00 မူင်းၼၼ်ႉသေ ၵူၼ်းတိတ်းၸပ်းၸိူဝ်ႉမႅင်း COVID-19 ၼႂ်းမိူင်းႁူမ်ႈတုမ် တိူဝ်းၶိုၼ်ႈထႅင်ႈ 964 ၵေႃႉသေ ၵူၼ်းပဵၼ်ဢၼ်လူႉသဵင်ႈတၢႆသမ်ႉ တိူဝ်းၶိုၼ်ႈထႅင်ႈ 19 ၵေႃႉ ဝႃႈၼႆ။

တေႃႇထိုင်မိူဝ်ႈဝႃး ယၢမ်းၵၢင်ၶိုၼ်း 20 : 00 မူင်း ၵူၼ်းတိတ်းၸပ်းၸိူဝ်ႉမႅင်း COVID-19 ၼႂ်းမိူင်းႁူမ်ႈတုမ် ႁူမ်ႈတင်းသဵင်ႈ မီး 117,946 ၵေႃႉ၊ ၵူၼ်းပဵၼ်ဢၼ်လူႉသဵင်ႈတၢႆ မီး 2,484 ၵေႃႉ လႄႈ ၵူၼ်းပဵၼ်ဢၼ်ယူတ်းယႃၸိုၼ်ႈၶႅၼ်းသေ လႆႈလူင်းႁူင်းယႃသမ်ႉ မီး 97,819 ၵေႃႉ ၼႆယဝ်ႉ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း