ၵူၼ်းပၢႆႈၽေးသိုၵ်းမႆႈၸႂ်လွင်ႈ ၶူင်းၵၢၼ်လူင်ပွင်ၸိုင်ႈ ၼႂ်းၸိုင်ႈတႆးပွတ်းႁွင်ႇ

ယွၼ်ႉပိူဝ်ႈပၢင်တိုၵ်းယင်းတိုၵ်ႉသိုပ်ႇပဵၼ် ၼႂ်းၸိုင်ႈတႆးပွတ်းႁွင်ႇလႄႈ ၼႂ်းမိူင်းၶၢင်ယူႇ သေဢမ်ႇၵႃး ထႅင်ႈလွင်ႈၼိုင်ႈၵေႃႈ ယင်းတိုၵ်ႉမီးၽေးလွင်ႈမၢၵ်ႇမႅင်းၸိူဝ်းၼႆႉ ၼႂ်းပိုၼ်ႉတီႈယူႇလႄႈ ၵူၼ်းပၢႆႈၽေးသိုၵ်း ၸိူဝ်းဢၼ်ယူႇသဝ်းဝႆႉတီႈ ႁူင်းပၢႆႈၽေးၸိူဝ်းၼႆႉ ဢမ်ႇပႆႇၸၢင်ႈပွၵ်ႈၶိုၼ်းႁိူၼ်းယေး ဝၢၼ်ႈၵိူတ်ႇမိူင်းၼွၼ်းၽႂ်မၼ်းလႄႈ ၼႂ်းၸိုင်ႈတႆး ပွတ်းႁွင်ႇၼႆႉ ၽၢႆႇတၢင်းလူင်ပွင်ၸိုင်ႈမီးၶူင်းၵၢၼ် မိူၼ်ၼင်ႇ တေႁဵတ်းၾၢႆၼမ်ႉၾႆးၾႃႉ ၊ သုၼ်ၵၢင်လဵင်ႉလူသတ်း ၊ သုၼ်ၵၢင်ၽုၵ်ႇသွမ်ႈ လႄႈ သုၼ်ၵၢင်လွင်ႈၵႃႉၶၢႆသေဢမ်ႇၵႃး မီးပႃးထႅင်ႈ ၶူင်းၵၢၼ်သဵၼ်ႈတၢင်းၾႆးၾႃႉၸွမ်း ၸိုင်ႈမိူင်းၶႄႇၸိူဝ်းၼႆႉဝႆႉလႄႈ ၵူၼ်းပၢႆႈၽေးၶဝ် မီးလွင်ႈမႆႈၸႂ်ဝႃႈ ၶူင်းၵၢၼ်လူင်ပွင်ၸိုင်ႈၸိူဝ်းၼႆႉ တေသိမ်းဢဝ် တီႈလိၼ်သူၼ်ႁႆႈၼႃးၶဝ်ၵႂႃႇၼႆယဝ်ႉ။

ၵူၼ်းပၢႆႈၽေးသိုၵ်းမႆႈၸႂ်လွင်ႈ ၶူင်းၵၢၼ်လူင်ပွင်ၸိုင်ႈ ၼႂ်းၸိုင်ႈတႆးပွတ်းႁွင်ႇ

ၵဵဝ်ႇလူၺ်ႈၶူင်းၵၢၼ်လူင်ပွင်ၸိုင်ႈၼႆႉသေ ၵူၼ်းပၢႆႈၽေးသိုၵ်းၶဝ်ဢွၼ်ၵၼ်မႆႈၸႂ်ဝႃႈ ၽၢႆႇတင်းလူင်ပွင်ၸိုင်ႈ သိမ်းဢဝ်တီႈလိၼ် ၶဝ်ႈပႃးၼႂ်းၶူင်းၵၢၼ်သေယဝ်ႉ ပေႃးငဝ်းလၢႆး ၼႂ်းပိုၼ်ႉတီႈလွတ်ႈၽေးယဝ်ႉသေ ၵူၼ်းပၢႆႈၽေးၶဝ် ပွၵ်ႈမိူဝ်းၶိုၼ်းႁိူၼ်းၼၼ်ႉ ၵူဝ်ဝႃႈတေဢမ်ႇမီးတီႈယူႇတၼ်းသဝ်းၼႆယဝ်ႉ။

ယွၼ်ႉပိူဝ်ႈၼၼ်လႄႈ မိူဝ်ႈဝၼ်းထီႉ 4 December 2019 ၼႆႉ ၵူၼ်းပၢႆႈၽေးသိုၵ်းၼႂ်းၸိုင်ႈတႆးပွတ်းႁွင်ႇလႄႈ ၵူၼ်းပၢႆႈၽေး ဢၼ်ယူႇၼႂ်းပိုၼ်ႉတီႈ မၢၼ်ႈဝဵင်းလူင် မိူင်းၶၢင် 36 တီႈႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇတုၵ်းယွၼ်းဝႃႈ ယႃႇႁႂ်ႈႁဵတ်းၶူင်းၵၢၼ်သင်ၼႂ်းပိုၼ်ႉတီႈ တီႈလိၼ်ၸိူဝ်းၼၼ်ႉ ၼႆယဝ်ႉ။

ၵူၼ်းပၢႆႈၽေးသိုၵ်းမႆႈၸႂ်လွင်ႈ ၶူင်းၵၢၼ်လူင်ပွင်ၸိုင်ႈ ၼႂ်းၸိုင်ႈတႆးပွတ်းႁွင်ႇ

တႄႇၸဵမ်မိူဝ်ႈပီႊ 2011 ပူၼ်ႉမႃးၼႆႉတေႃႇထိုင်ယၢမ်းလဵဝ် ၵူၼ်းမိူင်းၼႂ်းပိုၼ်ႉတီႈ ၼမ်ႉတူႈ ၊ ၵူတ်ႉၶၢႆ ၊ ၼမ်ႉၶမ်းလႄႈ မၢၼ်ႈဝဵင်းလူင်ၸိူဝ်းၼႆႉ လႆႈပၢႆႈဢွၵ်ႇယၢၼ်ႁိူၼ်းယေး ပၢႆႈၽေးသိုၵ်းသိူဝ် ယူႇတီႈႁူင်းပၢႆႈၽေးဝႆႉမီးယူႇမွၵ်ႈ 17000 (ၼိုင်ႈမိုၼ်ႇၸဵတ်းႁဵင်) ၸိူဝ်းၼႆႉၼႆ လႆႈႁူႉၸွမ်းသၢႆမၢႆ ၸုမ်းၸွႆႈထႅမ်ပရႁိတၶဝ်ၼင်ႇၼႆ ၊ ၵူၼ်းပၢႆႈၽေးသိုၵ်း ၸိူဝ်းၼႆႉၵေႃႈ တေႃႇထိုင်ယၢမ်းလဵဝ်ပႆႇၸၢင်ႈပွၵ်ႈမိူဝ်းၶိုၼ်းလႄႈ ပဵၼ်ဢၼ်မႆႈၸႂ်ၸွမ်း တီႈလိၼ်ဢၼ် ႁဵတ်းၵိၼ်သူၼ်ႁႆႈၼႃးမႃး ၸဵမ်ပၢၼ်ပူႇမွၼ်ႇၼၢႆးယႃႈႁဝ်းမႃးၼၼ်ႉ ၊ ယွၼ်ႉပိူဝ်ႈဝႃႈ တီႈလိၼ်ၸိူဝ်းၼႆႉ ပဵၼ်တီႈလိၼ် ဢၼ်ထိင်းသိမ်းႁဵတ်းၵိၼ်ၽုၵ်ႇသွမ်ႈမႃး ပၢၼ်သိုပ်ႇပၢၼ် ဢမ်ႇတွၼ်ႉယၢမ်ႈမီး သၢၵ်ႈသေႇ လၵ်းထၢၼ်ၸွမ်းၼင်ႇ ဢၼ်ပဵၼ် တၢင်းၵၢၼ် ၼႂ်းလုမ်းလူင်ပွင်ၸိုင်ႈၸိူဝ်းၼၼ်ႉလႄႈ ပေႃးလူင်ပွင်ၸိုင်ႈ သိမ်းဢဝ်ၶဝ်ႈပႃး ၼႂ်းၶူင်းၵၢၼ်ၼႆၸိုင် ယူႇတီႈၵူၼ်းမိူင်းၸိူဝ်းၼၼ်ႉသေ ဢမ်ႇမီးသၢၵ်ႈသေႇလၵ်းထၢၼ် သင်တႃႇ တေၼႄဝႃႈ ပဵၼ်တီႈလိၼ်ၶွင်တူဝ်ၵဝ်ႇၼႆယဝ်ႉ။

တီႈၼႂ်းၶေႃႈပိုၼ်ၽၢဝ်ႇတုၵ်းယွၼ်းၼၼ်ႉတႅမ်ႈဝႆႉဝႃႈ − ၸူဝ်ႈၵႃႈၵူၼ်းပၢႆႈၽေးၶဝ် ပႆႇပွၵ်ႈ ၶိုၼ်းႁိူၼ်းလႆႈၼၼ်ႉ ယူႇတီႈလူင်ပွင်ၸိုင်ႈသေ ယႃႇႁႂ်ႈလႆႈႁဵတ်းၶူင်းၵၢၼ်သင် ၼႂ်းပိုၼ်ႉတီႈ ဝၢၼ်ႈၵိူတ်ႇမိူင်းၼွၼ်းၸိူဝ်းၼၼ်ႉလႄႈ တီႈလိၼ်ၸိူဝ်းၼၼ်ႉၵေႃႈ ယႃႇပေႁႂ်ႈလႆႈဢဝ် ႁဵတ်းပဵၼ် တီႈလိၼ်ပဝ်ႇလိၼ်ႁၢမ်း ၸွမ်းၼင်ႇမၢႆမီႈမီးၼၼ်ႉ ၊ ယႃႇပေႁႂ်ႈလႆႈ ၶုတ်းထၢၼ်ႇႁိၼ် ၊ တႅပ်းမႆႉ လႄႈ ယႃႉၶူဝ်းၶွင်သၽႃႇဝၸွမ်းႁိမ်းႁွမ်းၼႂ်းပိုၼ်ႉတီႈ ၸိူဝ်းၼၼ်ႉလႄႈ သင်ၸိူဝ်ႉဝႃႈ တိုၵ်ႉမီးၶူင်းၵၢၼ်ႁဵတ်းသၢင်ႈလွင်ႈၸိူဝ်းၼၼ်ႉဝႆႉယူႇၼႆ ႁႂ်ႈလႆႈၵိုတ်းယင်ႉပၼ်ၼႆယဝ်ႉ။

ၼႂ်းပီႊၼႆႉမီးၶၢဝ်ႇလိုဝ်းဝႃႈ လူင်ပွင်ၸိုင်ႈတေသၢင်ႈၽၢႆ ၼိူဝ်မႄႈၼမ်ႉၶၢႆႇ ၼႂ်းၸႄႈဝဵင်း ၵူတ်ႉၶၢႆလႄႈ တေသၢင်ႈသုၼ်ၵၢင်ၵၢၼ် ၽုၵ်ႇသွမ်ႈ လႄႈ ၵၢၼ်လဵင်ႉလူသတ်းၸိူဝ်းၼႆႉ ၼႆသေတႃႉ ယူႇတီႈၽူႈၵဵဝ်ႇၶွင်ႈ လူင်ပွင်ၸိုင်ႈတႄႉ ပႆႇဢွၵ်ႇမႃးလၢတ်ႈသင်သေပိူင် ဝႃႈၼႆ။

ၵဵဝ်ႇလူၺ်ႈလွင်ႈ ၶူင်းၵၢၼ်လူင်ဢၼ်ႁူမ်ႈၵၼ်တင်း ၸိုင်ႈမိူင်းၶႄႇၼႆႉသေ ၸဵမ်မိူဝ်ႈပီႊ 2017 လိူၼ် မေႇပူၼ်ႉမႃးၼႆႉ ၸိုင်ႈမိူင်းၶႄႇတင်း မိူင်းႁူမ်ႈတုမ် ႁူမ်ႈၵၼ်လူင်းလၢႆးမိုဝ်း MOU ဝႆႉယဝ်ႉသေ ၼႂ်းၶူင်းၵၢၼ်လူင်ၸိူဝ်းၼၼ်ႉ ပုၼ်ႈတႃႇၶူင်းၵၢၼ်လူင် သဵၼ်ႈတၢင်း လူတ်ႉၾႆးၼႆႉ ယူႇတီႈၽူႈမီးပုၼ်ႈၽွၼ်းၶဝ် လူင်းပိုၼ်ႉတီႈ မူႇၸေႈ−လႃႈသဵဝ်ႈ−ဝဵင်းလိူဝ်ႇ သေ ထတ်းသၢင်တူၺ်းယဝ်ႉၼႆ ၽွင်းလူင်ၽၢႆႇယေးငိုၼ်း မိူင်းတႆး ဢူးၸူဝ်းၺုၼ်ႉလုၼ်ႇ လၢတ်ႈတီႈသိုဝ်ႇၶၢဝ်ႇ RFA ၼင်ႇၼႆ။

သင်ၸိူဝ်ႉဝႃႈ လူင်ပွင်ၸိုင်ႈ ၵေႃႇသၢင်ႈၶူင်းၵၢၼ်ၸိူဝ်းၼႆႉၼႆၸိုင် တီႈလိၼ်ၵူၼ်းပၢႆႈ ၽေးၶဝ် တေပႃးၸွမ်း ၼႂ်းၶူင်းၵၢၼ်ၼၼ်ႉသေ ယူႇတီႈၵူၼ်းပၢႆႈၽေးသိုၵ်းၶဝ် ပေႃးဝႃႈပွၵ်ႈမိူဝ်းၶိုၼ်း ဝၢၼ်ႈၵိူတ်ႇၼႆၵေႃႈ တေဢမ်ႇမီး တီႈလိၼ် တႃႇႁဵတ်းၵိၼ်ၵၢၼ် လဵင်ႉတွင်ႉလႄႈ တေမီးလွင်ႈယၢပ်ႇၽိုတ်ႇတေႉတေႉၼႆယဝ်ႉ။

ၶေႃႈမုၼ်း − RFA
တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း