ၵူၼ်းမိူင်းသၢၼ်ၶတ်းသိုၵ်းၵူဝ်းၵၢင်ႉ MNDAA

မိူဝ်ႈဝၼ်းထီႉ 20 January 2025 (လိူၼ်ၵမ်လွင်ႈ 7 ၶမ်ႈ ပီႊတႆး 2119 ၼီႈ) ယၢမ်းၵၢင်ၼႂ် 10:00 မူင်း ၵူၼ်းမိူင်းဢွၼ်ၵၼ် ၵႂႃႇသၢၼ်ၶတ်းသိုၵ်းၵူဝ်းၵၢင်ႉ MNDAA ဢၼ်တိုၵ်ႉႁၢင်ႈႁႅၼ်း တေတင်ႈလုမ်းမႂ်ႇ တီႈၼႂ်းၵၢင်ဝၢၼ်ႈ ဝၢၼ်ႈဝဵင်းသႅင် ၸႄႈဝဵင်းမိူင်းၵူဝ်း ၸိုင်ႈတႆးပွတ်းႁွင်ႇ။

ၵဵဝ်ႇၵပ်းလူၺ်ႈလွင်ႈၼႆႉ ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ဢွင်ႈတီႈဢၼ် ၸုမ်းသိုၵ်းၵူဝ်းၵၢင်ႉ MNDAA တေတင်ႈလုမ်းမႂ်ႇၼၼ်ႉ မၼ်းပဵၼ်ၼႃႈလိၼ်ၶွင် ၵူၼ်းမိူင်းတင်းၼမ် ယွၼ်ႉဝႃႈပိုၼ်ႉတီႈၼၼ်ႉ မီးႁိမ်းၵၢတ်ႇ၊ ပဵၼ်ပႃးပိုၼ်ႉတီႈ လုၵ်ႈဢွၼ်ႇလဵၼ်ႈတၢင်းလဵၼ်ႈ၊ ပဵၼ်တီႈၵိုတ်းၵႃးလႄႈလူတ်ႉၶိူင်ႈ ၸူဝ်ႈၶၢဝ်း၊ မီးပႃးၶူၵ်ႉတမ်ၶဝ်ႈ ဢၼ်ပဵၼ်ၶွင်ၵူၼ်းတင်းၼမ် လႄႈ ၵွပ်ႈဢမ်ႇလီပၵ်းလုမ်းမႂ်ႇၼႆသေ ၵူၼ်းမိူင်း 100 ပၢႆ ဢွၼ်ၵၼ်ၵႂႃႇသၢၼ်ၶတ်း ဝႃႈၼႆ။

ဝၢၼ်ႈဝဵင်းသႅင်ၼႆႉ ဢမ်ႇပေႃးယူႇၵႆၵၼ်တင်း မိူင်းပေႃႈ လႄႈ ၸုမ်းသိုၵ်းၵူဝ်းၵၢင်ႉ MNDAA ဢၼ်တေၵႂႃႇတင်ႈလုမ်းမႂ်ႇ တီႈဝၢၼ်ႈဝဵင်းသႅင်ၼႆႉၵေႃႈ လုၵ်ႉတီႈမိူင်းပေႃႈသေၵႂႃႇ ၼႆယဝ်ႉ။

တႆးလွတ်ႈလႅဝ်း