ၵူၼ်းမိူင်းၵူဝ်းရီးယႃးႁွင်ႇ ၽွမ်ႉႁူမ်ႈၶဝ်ႈႁဵတ်းသိုၵ်း တႃႇတေႃႇသူႈ ဢမေႇရိၵၢၼ်ႇ

ၶၢဝ်းတၢင်းဝၼ်းလဵဝ် ၵူၼ်းမိူင်းၵူဝ်းရီးယႃးႁွင်ႇ ၶဝ်ႈသႂ်ႇသၢႆမၢႆ ႁဵတ်းသိုၵ်း 800,000 ၵေႃႉ တႃႇတေႃႇသူႈၸွမ်း ဢမေႇရိၵၢၼ်ႇ ဝႃႈၼႆ။

မိူဝ်ႈဝၼ်းထီႉ 18 March 2023 (လိူၼ်သီႇလွင်ႈ 13 ၶမ်ႈ ပီႊတႆး 2117 ၼီႈ) သိုဝ်ႇၶၢဝ်ႇ ၵူဝ်းရီးယႃးႁွင်ႇ လၢႆးငၢၼ်းဝႃႈ ၼႂ်းဝၼ်းထီႉ 17 March 2023 ဝၼ်းလဵဝ်ၵူၺ်း မီးလုၵ်ႈႁဵၼ်းလႄႈ ၵူၼ်းႁဵတ်းၵၢၼ် ၸွတ်ႇတူဝ်ႈတင်းမိူင်းၵူဝ်းရီးယႃးႁွင်ႇ မွၵ်ႈ 800,000 ၵေႃႉ ဢွၼ်ၵၼ်သႂ်ႇသၢႆမၢႆ ၶဝ်ႈႁဵတ်းသိုၵ်း တႃႇတေႃႇသူႈ ဢမေႇရိၵၢၼ်ႇ ဝႃႈၼႆ။

ၵဵဝ်ႇလူၺ်ႈလွင်ႈၼႆႉၵေႃႈ လႆႈမီးမႃးဝၢႆးသေ ၵူဝ်းရီးယႃးႁွင်ႇ ယိုဝ်းမၢၵ်ႇမိတ်ႉသႆးၶၢမ်ႇ မိူင်း (ICBM) Hwasong-17 မိူဝ်ႈဝၼ်းထီႉ 16 March 2023 တႃႇတုမ်ႉတွပ်ႇ ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ဢၼ်လႆႈၽိုၵ်းၽွၼ်ႉၵၢၼ်သိုၵ်းႁူမ်ႈၵၼ် ၼၼ်ႉ သေဢမ်ႇၵႃး ၵၢၼ်ယိုဝ်းမၢၵ်ႇမိတ်ႉသႆးပွၵ်ႈၵမ်းၼႆႉၵေႃႈ ပဵၼ်မႃးဢွၼ်တၢင်း ၸွမ်ၸိုင်ႈၵူဝ်းရီးယႃးၸၢၼ်း တေဢွၵ်ႇၶၢဝ်းတႃႇၵႂႃႇ မိူင်းၵျႃႇပၢၼ်ႇ တႃႇဢုပ်ႇဢူဝ်း ႁႃလွၵ်းလၢႆးတုမ်ႉတွပ်ႇ ၵူဝ်းရီးယႃးႁွင်ႇ ဢၼ်မီးၶိူင်ႈယိပ်းၼိဝ်းၶလီးယႃး ၸွမ်း ၸွမ်ၽွင်းလူင်ၵျႃႇပၢၼ်ႇ ဝႃႈၼႆ။

ၼွၵ်ႈလိူဝ်သေၼႆႉယဝ်ႉဢမ်ႇၵႃး သိုဝ်ႇၶၢဝ်ႇ ၵူဝ်းရီးယႃးၸၢၼ်း လႆႈငၢၼ်း မိူဝ်းဝႃး ဝၼ်းထီႉ 19 March 2023 ဝႃႈ ၵူဝ်းရီးယႃးႁွင်ႇ လႆႈၸၢမ်းယိုဝ်းမၢၵ်ႇမိတ်ႉသႆး ၵႂႃႇတူၵ်း ၼႂ်းပၢင်ႇလၢႆႇပွတ်းဝၼ်းဢွၵ်ႇ ဢမ်ႇၼၼ် ပၢင်ႇလၢႆႇၵျႃႇပၢၼ်ႇ ဝႃႈၼႆ။

ၽၢႆႇတၢင်းၵူဝ်းရီးယႃးႁွင်ႇ လႆႈယိုဝ်းမၢၵ်ႇမိတ်ႉသႆးထပ်းၵၼ် ပဵၼ်ၶၢဝ်းတၢင်းလၢႆဝူင်ႈ ပူၼ်ႉမႃးၼၼ်ႉ တႃႇၼႄႁႂ်ႈႁၼ်ဝႃႈ ၵူဝ်းရီးယႃးႁွင်ႇ တေဢမ်ႇယွမ်းတေႃႇ ဢမေႇရိၵၢၼ်ႇ တင်း ၵူဝ်းရီးယႃးၸၢၼ်း ဢၼ်ႇလႆႈၽိုၵ်းၽွၼ်ႉၵၢၼ်သိုၵ်းယႂ်ႇလူင် ႁူမ်ႈၵၼ် ၼႂ်းႁွပ်ႈလၢႆပီႊပူၼ်ႉမႃးၼၼ်ႉ ဝႃႈၼႆ။

ၽၢႆႇတၢင်းႁွင်ႈၵၢၼ်လူင်ၽၢႆႇၵႅတ်ႇၶႄ ဢမေႇရိၵၢၼ်ႇ လၢတ်ႈဝႃႈ မိူဝ်ႈဝၼ်းထီႉ 19 March 2023 ၼႆႉ ဢမေႇရိၵၢၼ်ႇ လႆႈသူင်ႇႁိူဝ်းမိၼ်ပွႆႇမၢၵ်ႇ သႅၼ်း B-1B ၶဝ်ႈႁူမ်ႈ ၽိုၵ်းၽွၼ်ႉၵၢၼ်သိုၵ်းၸွမ်းၵူဝ်းရီးယႃးၸၢၼ်း တႃႇၽွမ်ႉတုမ်ႉတွပ်ႇ လွင်ႈသူၼ်းၵဝ်း ၵူဝ်းရီးယႃးႁွင်ႇ ဝႃႈၼႆ။

မိူဝ်ႈပီႊ 2022 ပူၼ်ႉမႃးၼၼ်ႉ ၵူဝ်းရီးယႃးႁွင်ႇ လႆႈယိုဝ်းမၢၵ်ႇမိတ်ႉသႆးႁူမ်ႈတင်းမူတ်း ၼမ်လိူဝ်သေ 70 လုၵ်ႈလႄႈ ၼမ်လိူဝ်သေၼႂ်းပိုၼ်းဢၼ်ယၢမ်ႈမီးမႃးသေ ႁဵတ်းႁႂ်ႈ ဢမေႇရိၵၢၼ်ႇ၊ ၵူဝ်းရီးယႃးၸၢၼ်း တင်း ၵျႃႇပၢၼ်ႇ ဝၢႆႇႁႃၽိုၵ်းၽွၼ်ႉၵၢၼ်သိုၵ်းႁူမ်ႈ ၵၼ် တႃႇႁၢင်ႈႁႅၼ်းႁပ်ႉမိုဝ်းၸွမ်း လွင်ႈပူၼ်ႉပႅၼ်ၵူဝ်းရီးယႃးႁွင်ႇ ဝႃႈၼႆ။

မိူဝ်ႈဝၼ်းထီႉ 13 March 2023 ပူၼ်ႉမႃးၼၼ်ႉ ဢမေႇရိၵၢၼ်ႇလႄႈ ၵူဝ်းရီးယႃးၸၢၼ်း လႆႈႁူမ်ႈၵၼ်တႄႇၽိုၵ်းၽွၼ်ႉၵၢၼ်သိုၵ်း ဢၼ်မီးၸိုဝ်ႈဝႃႈ Freedom Shield 23 ပဵၼ် ၶၢဝ်းတၢင်း 11 ဝၼ်းလႄႈ ပဵၼ်ၵၢၼ်ၽိုၵ်းၽွၼ်ႉယႂ်ႇလူင် တႄႇၸဵမ်မိူဝ်ႈ 2017 ဝႃႈၼႆ။

ၼွၵ်ႈလိူဝ်သေၼႆႉ သိုဝ်ႇၶၢဝ်ႇ ၵူဝ်းရီးယႃးၸၢၼ်း လၢႆးငၢၼ်းထႅင်ႈဝႃႈ ဢမေႇရိၵၢၼ်ႇ မီးၽႅၼ်ၵၢၼ် တႃႇၽိုၵ်းၽွၼ်ႉၵၢၼ်သိုၵ်း ၽၢႆႇတၢင်းၵၢင်ႁၢဝ်ၸွမ်း ၵူဝ်းရီးယႃး ၸၢၼ်း ၼႂ်းႁၢင်လိူၼ်ၼႆႉလႄႈ ယုမ်ႇဝႃႈ ၵူဝ်းရီးယႃးႁွင်ႇၵေႃႈ တေတုမ်ႉတွပ်ႇ လူၺ်ႈၵၢၼ်ယိုဝ်းမၢၵ်ႇမိတ်ႉသႆး ဢမ်ႇထၢတ်ႇဢမ်ႇဝၢႆး ဝႃႈၼႆ။

တႆးလွတ်ႈလႅဝ်း