ၵူၼ်းမိူင်းၺႃးၸၢၵ်ႇမၢၵ်ႇ ယွၼ်ႉပၢင်တိုၵ်း

သိုၵ်းမၢၼ်ႈတင်းသိုၵ်းရၶႅင်ႇ AA ပဵၼ်ပၢင်တိုၵ်းၵၼ်သေ မၢၵ်ႇလူင်ၵႂႃႇတူၵ်းတႅၵ်ႇ တိူဝ်ႉၸပ်းၵူၼ်းမိူင်း ဢၼ်တိုၵ်ႉႁဵတ်းၵၢၼ်တီႈ ၵၼၢၼ်းတၢႆႇ ႁိမ်းဝၢၼ်ႈၵုၼ်းတွင်ႇ ၸႄႈဝဵင်းပုင်ႇၼႃးၵျုၼ်း မိူင်းရၶႅင်ႇ။

Mizzima ဢွၵ်ႇဝႆႉဝႃႈ မိူဝ်ႈဝၼ်းထီႉ 15 November 2022 (လိူၼ်သိပ်းသွင်လွင်ႈ 8 ၶမ်ႈ ပီႊတႆး 2116 ၼီႈ) ယၢမ်းၵၢင်ၼႂ် 06:30 မူင်းပၢႆ သိုၵ်းရၶႅင်ႇ AA ၶဝ်ႈတိုၵ်းတပ်ႉသိုၵ်းမၢၼ်ႈ ၶလယ 232 ဢၼ်မီးႁႅင်းသိုၵ်းမွၵ်ႈ 100 သေ ပၵ်းဝႆႉတီႈတႃႈလူတ်ႉၾႆး ဝၢၼ်ႈၵုၼ်းတွင်ႇ လႄႈ သွင်ၽၢႆႇပိုတ်းယိုဝ်းၵၼ်ႁၢဝ်ႈႁႅင်း ဝႆႉ၊ ၽွင်းသွင်ၽၢႆႇ ပိုတ်းယိုဝ်းၵၼ်ၼၼ်ႉ မၢၵ်ႇလူင်ၵႂႃႇတူၵ်းတႅၵ်ႇသႂ်ႇၵူၼ်းမိူင်း လႄႈ လႆႈမၢတ်ႇၸဵပ်းၵႂႃႇၵေႃႉၼိုင်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈဝႃႈ မိူဝ်ႈယၢမ်းၵၢင်ၼႂ် 07:20 မူင်းၼၼ်ႉ သိုၵ်းမၢၼ်ႈ တပ်ႉၶလယ 232 (တပ်ႉပႃႇတလဵၵ်ႉ) ဢၼ်မီးတီႈဝဵင်းၸိတ်ႉတူၺ်ႇၼၼ်ႉ ယိုဝ်းမၢၵ်ႇလူင်မႃး 3 လုၵ်ႈ၊ လုၵ်ႈၵမ်းထီႉ 2 ၼၼ်ႉ ၵႂႃႇတူၵ်းတႅၵ်ႇတီႈ ၵၼၢၼ်းတၢႆႇ သေ တိူဝ်ႉၸပ်းၺႃး ၵူဝ်ႇၸေႃႇဝိၼ်းထုၼ်း ဢႃႇယု 34 ပီႊ ဢၼ်တိုၵ်ႉႁဵတ်းၵၢၼ် ဝႆႉယူႇၼၼ်ႉလႄႈ မၼ်းၸၢႆးလႆႈတၢင်းၸဵပ်းမၢတ်ႇ တီႈမိုဝ်းၽၢႆႇၶႂႃ တင်း ၼႃႈဢူၵ်း၊ ၵူၼ်းၼႂ်းပိုၼ်ႉတီႈလႆႈဢဝ်သူင်ႇယူတ်းယႃတူဝ်ဝႆႉ တီႈႁူင်းယႃၸိတ်ႉတူၺ်ႇယဝ်ႉၼႆ လႆႈႁၼ် Mizzima ဢွၵ်ႇဝႆႉၼင်ႇၼႆ။

ယွၼ်ႉသိုၵ်းသွင်ၽၢႆႇပိုတ်းယိုဝ်းၵၼ် တီႈတႃႈလူတ်ႉၾႆး ဝၢၼ်ႈၵုၼ်းတွင်ႇသေ သမ်ႉလႃႈလီႈပိုတ်းယိုဝ်းၵႂႃႇ ၵူႈႁူးၵူႈတၢင်းလႄႈ ၵူၼ်းမိူင်းၼႂ်းပိုၼ်ႉတီႈ လႆႈဢွၼ်ၵၼ်ပၢႆႈဢွၵ်ႇဝၢၼ်ႈၼႆယဝ်ႉ။

တႆးလွတ်ႈလႅဝ်း