ၵူၼ်းမိူင်းၼမ်ႉၶမ်းၵေႃႉၼိုင်ႈ ဢၼ်ထုၵ်ႇ TNLA တီႉၺွပ်းၵႂႃႇသေ ၶိုၼ်းလွတ်ႈဢွၵ်ႇမႃးၼၼ်ႉ ယွၼ်ႉႁွႆးမၢတ်ႇၸဵပ်း ထုၵ်ႇၺႃးၶဝ်ပေႃႉထုပ်ႉႁႅမ်လႄႈ လႆႈလူႉသဵင်ႈ

ၵူၼ်းဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၵေႃႉၼိုင်ႈ ဢၼ်ထုၵ်ႇသိုၵ်း TNLA တီႉၺွပ်းၵႂႃႇသေ ၶိုၼ်းလွတ်ႈဢွၵ်ႇမႃးၼၼ်ႉ ယွၼ်ႉႁွႆးမၢတ်ႇၸဵပ်း ထုၵ်ႇ TNLA ၶဝ်ပေႃႉထုပ်ႉႁႅမ်ႁၢဝ်ႈႁႅင်းလႄႈ လႆႈလူႉသဵင်ႈၵႂႃႇ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉ မိူဝ်ႈဝၼ်းထီႉ 5 August 2022 သိုၵ်း TNLA ဢဝ်လွင်ႈတၢင်းယႃႈမဝ်းၵမ်သေ တီႉၺွပ်း လုင်းၸၢႆးၵျေႃႇသူၺ်ႇ ဢႃႇယု 70 ပီႊ တီႈယူႇပွၵ်ႉမူဝ်ၶမ်း ဝဵင်းၼမ်ႉၶမ်း ၵႂႃႇၼႆယဝ်ႉ။

ဝၢႆးသေလုင်းၸၢႆးၵျေႃႇသူၺ်ႇ ထုၵ်ႇတီႉၺွပ်းယဝ်ႉ ၵူၼ်းၼႂ်းၼႃႈႁိူၼ်းမၼ်းၸၢႆး လႆႈယွၼ်းတၢင်း ၸွႆႈထႅမ်တီႈသိုၵ်းၸုမ်းၼိုင်ႈဢၼ်ပဵၼ်ဢူၺ်းလီၵၼ်ၼၼ်ႉ ၶိုၼ်းငူပ်ႉငီႉတင်း TNLA သေ လႆႈလွတ်ႈဢွၵ်ႇမႃးၶိုၼ်း မိူဝ်ႈဝၼ်းထီႉ 7 August 2022 ၊ ၵူၺ်းၵႃႈ ထိုင်မႃး မိူဝ်ႈၼႆႉ ဝၼ်းထီႉ 14 August 2022 ယၢမ်းၵၢင်ၼႂ် 05:00 မူင်း ယွၼ်ႉႁွႆးမၢတ်ႇၸဵပ်း ထုၵ်ႇသိုၵ်း TNLA ၶဝ်ပေႃႉထုပ်ႉႁႅမ်ၼၼ်ႉသေ လုင်းၸၢႆးၵျေႃႇသူၺ်ႇ လႆႈလူႉသဵင်ႈၵႂႃႇ ၼႆယဝ်ႉ။

ၵူၼ်းမိူင်းၼမ်ႉၶမ်းၵေႃႉၼိုင်ႈ ဢၼ်ၸမ်ၸႂ်ၵၼ်တင်း လုင်းၸၢႆးၵျေႃႇသူၺ်ႇ လၢတ်ႈၼႄဝႃႈ မိူဝ်ႈဝၼ်းထီႉ 5 August 2022 သိုၵ်းပလွင်ႈ TNLA ဢဝ်လွင်ႈတၢင်းယႃႈမဝ်းၵမ်သေ ၶဝ်ႈတီႉၺွပ်း ၵူၼ်းၼႂ်းၸႄႈဝဵင်းၼမ်ႉၶမ်း လုင်းၸၢႆးၵျေႃႇသူၺ်ႇၵေႃႈ လႆႈထုၵ်ႇတီႉၺွပ်းၵႂႃႇၸွမ်းၶႃႈဢေႃႈ၊ ၵွပ်ႈပိူဝ်ႈမၼ်းၸၢႆး ပဵၼ်ၵူၼ်းဢႃႇယုယႂ်ႇ မီးတၢင်းပဵၼ်ၵိုၵ်းတူဝ်ဝႆႉ သမ်ႉထုၵ်ႇတီႉၺွပ်းၵႂႃႇလႄႈ ၵူၼ်းၼႂ်းၼႃႈႁိူၼ်းမႆႈၸႂ်သေ လႆႈယွၼ်းတၢင်းၸွႆႈထႅမ်တီႈသိုၵ်းၸုမ်းၼိုင်ႈ ဢၼ်ပဵၼ်ဢူၺ်းလီ တင်း TNLA ႁႂ်ႈပွႆႇပၼ်ၼႆလႄႈ ၸင်ႇလႆႈလွတ်ႈဢွၵ်ႇမႃးၶိုၼ်း၊ ငိၼ်းဝႃႈတႄႉ တႃႇတေလွတ်ႈဢွၵ်ႇမႃးၼႆႉ လႆႈပၼ်ငိုၼ်းယူႇ ဢိတ်းၼိုင်ႈ၊ ၵူၼ်းၸိူဝ်းဢၼ်ထုၵ်ႇတီႉၺွပ်းၵႂႃႇၼႆႉ မီးလုင်းၸၢႆးၵျေႃႇသူၺ်ႇ ၵေႃႉလဵဝ်ၵူၺ်း ဢၼ်လႆႈလွတ်ႈဢွၵ်ႇမႃး ဝႃႈၼႆ။

မိူဝ်ႈၽွင်းလွတ်ႈဢွၵ်ႇမႃးၶိုၼ်းၼၼ်ႉ မိုဝ်းမၼ်းၸၢႆးၵေႃႈၵႂ်ႈ ထုၵ်ႇၺႃးပေႃႉႁႅမ်သမ်ႉပေႃးႁၵ်း၊ တင်ႈတႄႇလွတ်ႈဢွၵ်ႇမႃး မၼ်းၸၢႆးၶင်းဝႃႈၸဵပ်းတင်းတူဝ်၊ ယွၼ်ႉႁွႆးမၢတ်ႇၸဵပ်းၼၼ်ႉသေ ဢမ်ႇၵိၼ်ၶဝ်ႈလႆႈလီလီလႄႈ ထိုင်မႃး မိူဝ်ႈၼႆႉ ဝၼ်းထီႉ 14 August 2022 ယၢမ်းၵၢင်ၼႂ် 05:00 မူင်း မၼ်းၸၢႆး လႆႈလူႉသဵင်ႈၵႂႃႇယဝ်ႉ ဝႃႈၼႆ။

သိုၵ်းပလွင်ႈ TNLA ၼႆႉ ၵႆႉတဵၵ်းၵဵပ်းၶွၼ်ႇၵူၼ်းမိူင်း ၼႂ်းၸႄႈဝဵင်းၼမ်ႉၶမ်း၊ ၸႄႈဝဵင်းမူႇၸေႊ လႄႈ ၸႄႈဝဵင်းၵျွၵ်းမႄး ၸိုင်ႈတႆးပွတ်းႁွင်ႇ၊ ပေႃးၵူၼ်းမိူင်း ဢမ်ႇသႂ်ႇပၼ်ၶွၼ်ႇၶဝ်သမ်ႉ တီႉၺွပ်းၵူၼ်းမိူင်း လွၵ်ႇငိူတ်ႈၵူၼ်းမိူင်း ထိုင်သၢႆၸႂ် ၸိူဝ်းၼႆႉ ၼႆယဝ်ႉ။

မိူဝ်ႈဝၼ်းထီႉ 18 July 2022 ပူၼ်ႉမႃးၼၼ်ႉၵေႃႈ သိုၵ်းပလွင်ႈ TNLA တီႉၺွပ်းၵူၼ်းႁဵတ်းၵၢၼ် လၢၼ်ႉၶၢႆတူဝ်လူတ်ႉ တီႈဝဵင်းၵျွၵ်းမႄး ၵေႃႉၼိုင်ႈသေ တဵၵ်းၸႂ်ႉႁႂ်ႈၵူၼ်းတၢင်းလင် ဢဝ်ငိုၼ်းၵႂႃႇထုတ်ႇတူဝ် 150 သႅၼ်ပျႃး ၼႆယဝ်ႉ။

တႆးလွတ်ႈလႅဝ်း