ၵူၼ်းဝၢၼ်ႈၼွင်ပိင် ထုၵ်ႇၺႃးၸုမ်းယိပ်းၵွင်ႈၵၢင်ႇ ၶဝ်ႈတီႉၺွပ်း

ၸၢႆးပၢင်ႇ ဢႃႇယု 39 ပီႊ ဢၼ်ပဵၼ်ၵူၼ်းဝၢၼ်ႈၼွင်ပိင် ႁူဝ်ၵိုတ်ႈ ၸႄႈဝဵင်းၵျွၵ်းမႄး ထုၵ်ႇၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈတီႉၺွပ်းၵႂႃႇ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ မိူဝ်ႈဝၼ်းထီႉ 21 January 2021 (လိူၼ်ၵမ်လွင်ႈ 5 ၶမ်ႈ ပီႊတႆး 2116 ၼီႈ) ယၢမ်းၵၢင်ၶိုၼ်း 21:30 မူင်းၼၼ်ႉ မီးၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶီႇၵႃး 4 လမ်း ဢဵၼ်ႁႅင်း 20 ပၢႆ ၶဝ်ႈတီႉၺွပ်း ၸၢႆးပၢင်ႇ တီႈႁူင်းၵၢၼ်ၶဝ်ႈၵၢပ်ႇ ဝၢၼ်ႈလုၵ်းပႃ ဢိူင်ႇၼွင်ပိင် ၸႄႈဝဵင်းၵျွၵ်းမႄး ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈ လၢတ်ႈၼႄဝႃႈ ၸုမ်းဢၼ်မႃးတီႉၺွပ်း ၸၢႆးပၢင်ႇၼၼ်ႉ မီးမွၵ်ႈ 20 ပၢႆၼႆႉၶႃႈ၊ ၶီႇတင်းၵႃး 4 လမ်း ၶဝ်ႈမႃးၼႂ်းဝၢၼ်ႈၼွင်ပိင် ႁူဝ်ၵိုတ်ႈ မိူဝ်ႈယၢမ်းၵၢင်ၶမ်ႈ 19:30 မူင်းၼၼ်ႉသေ ၵူၼ်းၵႂႃႇၵူၼ်းမႃး ၼိူဝ်သဵၼ်ႈတၢင်းလူင် ၸိူဝ်းၼၼ်ႉၵေႃႈ ၶဝ်ဢဝ်ၵွင်ႈငႃ တိၵ်းၸႂ်ႉႁႂ်ႈၼင်ႈၶုပ်ႉၶဝ်ႇတင်းမူတ်း၊ ထိုင်မႃး ယၢမ်းၵၢင်ၶိုၼ်း 21:30 မူင်း ၽွင်းၶဝ်ၶိုၼ်းဢွၵ်ႇဝၢၼ်ႈၵႂႃႇၼၼ်ႉ ၵႂႃႇတီႉၺွပ်းဢဝ်တူဝ် ၸၢႆးပၢင်ႇ တီႈႁူင်းၶဝ်ႈၵၢပ်ႇ ဝၢၼ်ႈလုၵ်းပႃ လႄႈ သိမ်းဢဝ်ၵႂႃႇပႃး ၾူၼ်း 6 လုၵ်ႈ ဢိၵ်ႇတင်း မၢႆၾၢင် ၵူၼ်းႁဵတ်းၵၢၼ် တီႈႁူင်းၵၢၼ် ၶဝ်ႈၵၢပ်ႇၼၼ်ႉ ၼႆယဝ်ႉ။

ၸၢႆးပၢင်ႇ ၼႆႉ ပဵၼ်ၵူၼ်းဝၢၼ်ႈၼွင်ပိင် ႁူဝ်ၵိုတ်ႈ ပွၵ်ႉ (5) ၸႄႈဝဵင်းၵျွၵ်းမႄးသေ မၼ်းၸၢႆး ပိုတ်ႇႁူင်းၵၢၼ်ၶဝ်ႈၵၢပ်ႇ တီႈဝၢၼ်ႈလုၵ်းပႃလႄႈ သိုဝ်ႉၶၢႆၶဝ်ႈၵၢပ်ႇ ၼႆယဝ်ႉ။

တေႃႇထိုင် မိူဝ်ႈၼႆႉ ဝၼ်းထီႉ 22 January 2022 ၵေႃႈ ၸုမ်းယိပ်းၵွင်ႈၵၢင်ႇ ဢၼ်တီႉၺွပ်း ၸၢႆးပၢင်ႇၵႂႃႇၼၼ်ႉ ဢမ်ႇပႆႇပွႆႇပၼ် ပွၵ်ႈၶိုၼ်းတၢင်းႁိူၼ်းယေးလႄႈ ဢၼ်ပဵၼ်ပေႃႈမႄႈ ပီႈၼွင်ႉၸိူဝ်ႉၶိူဝ်း လုၵ်ႈလၢင်းၼၢင်းမေး ပဵၼ်ဢၼ်မႆႈၸႂ်ၸွမ်း တေႉတေႉဝႃႈဝႃႈ ယူႇယဝ်ႉ။

တႆးလွတ်ႈလႅဝ်း