ၵူၼ်းႁၢႆႉ/ၵူၼ်းလိူင်း ယိုဝ်းၵူၼ်းထဝ်ႈတၢႆ တီႈပၢင်လူင်

ၵူၼ်းထဝ်ႈယိင်းၵေႃႉၼိုင်ႈ ဢၼ်ပဵၼ်ၸဝ်ႈၶွင်ပၢမ်ႉၼမ်ႉမၼ်း တီႈတၢင်းဢွၵ်ႇ ဝဵင်းပၢင်လူင် ဢၼ်မုင်ႈၼႃႈၵႂႃႇတၢင်းဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ ထုၵ်ႇၺႃးၵူၼ်းႁၢႆႉ/ၵူၼ်းလိူင်း ယိုဝ်းတၢႆပႅတ်ႈ တီႈၼႂ်းဢိူင်ႇၼွင်လႅင်။

ၵဵဝ်ႇၵပ်းလူၺ်ႈလွင်ႈၼႆႉ မိူဝ်ႈဝၼ်းထီႉ 30 October 2022 (လိူၼ်သိပ်းသွင်မႂ်ႇ 7 ၶမ်ႈ ပီႊတႆး 2116 ၼီႈ) ယၢမ်းၵၢင်ၶမ်ႈ 18:00 မူင်းပၢႆ မီးၵူၼ်းဢမ်ႇႁူႉၸၵ်း ၵႂႃႇႁွင်ႉဢဝ် ပႃႈၺူဝ်ႇ ဢႃႇယု ၸမ် 60 ပီႊ ထိုင်တီႈႁိူၼ်း ပွၵ်ႉ 4 လႄႈ ထိုင်မႃးဝၼ်းထီႉ 31 October 2022 ယၢမ်းဝၢႆးဝၼ်းၸမ် 13:00 မူင်း ၵူၼ်းၼႂ်းႁိူၼ်းဢမ်ႇထၢင်ႇဢမ်ႇထိူမ်သေ လႆႈထူပ်းႁၼ်တူဝ်တၢႆ ပႃႈၺူဝ်ႇ တီႈတၢင်းၶဝ်ႈဝၢၼ်ႈၼမ်ႉလိၼ်း ဢိူင်ႇၼွင်လႅင် ၸႄႈဝဵင်းပၢင်လူင်။

ၵူၼ်းၼႂ်းပိုၼ်ႉတီႈလၢတ်ႈၼႄဝႃႈ “မီးၵူၼ်းပႅၵ်ႇၼႃႇ ၵႂႃႇႁွင်ႉပႃႈၺူဝ်ႇသေ ဝႃႈမီးလွင်ႈၶႂ်ႈဢုပ်ႇ ၵၢၼ်သိုဝ်ႉၵၢၼ်ၶၢႆဢိတ်းၼိုင်ႈၼႆလႄႈ ပႃႈၺူဝ်ႇ လႆႈဢွၵ်ႇၵႂႃႇ ၸွမ်းၸိူဝ်းၶဝ်၊ ၵမ်းၼၼ်ႉ ၵူၼ်းတၢင်းႁိူၼ်းသမ်ႉ ပႂ်ႉပႃႈၺူဝ်ႇၵမ်းလႂ်ၵေႃႈ ဢမ်ႇပွၵ်ႈႁိူၼ်း သိုပ်ႇၾူၼ်းၸူးတီႈပီႈၼွင်ႉၵေႃႈ ဢမ်ႇလႆႈႁၼ်ပႃႈၺူဝ်ႇ ဝႃႈၼႆ၊ ပီႈပီႈၼွင်ႉၼွင်ႉၶဝ်ၵေႃႈ ဢွၼ်ၵၼ်မႆႈၸႂ်လႄႈ ၵႂႃႇၸွမ်းသွၵ်ႈႁႃတၢင်းႁွင်ႇဝဵင်းသေ လႆႈၵႂႃႇႁၼ်တူဝ်တၢႆ ပႃႈၺူဝ်ႇ ဢၼ်ထုၵ်ႇၵူၼ်းႁၢႆႉ ယိုဝ်းတၢႆပႅတ်ႈဝႆႉတီႈ တၢင်းၶဝ်ႈဝၢၼ်ႈၼမ်ႉလိၼ်း၊ ပေႃးထတ်းတူၺ်းႁွႆးမၢၵ်ႇၵွင်ႈၼႆ တေလုၵ်ႉတီႈၵွၵ်းႁူဝ် ပွင်ႇၽွၵ်ႈတီႈၵႅမ်ႈ လႄႈ တေလႆႈဝႃႈပိူၼ်ႈတေၸႂ်ႉ ပႃႈၺူဝ်ႇၼင်ႈယဝ်ႉ ၶိုၼ်းယူႇၽၢႆႇလင် ဢဝ်ၵွင်ႈၸမ်လူင်းသေယိုဝ်းဢဝ်“ လၢတ်ႈၼႄၼင်ႇၼႆ။

ပႃႈၺူဝ်ႇၼႆႉ မီးဢႃႇယု ၸမ် 60 ယဝ်ႉသေ ပဵၼ်ၵူၼ်းၵမ်သိလ်ၼွၼ်းၵျွင်း ၵေႃႉၼိုင်ႈလႄႈ ပိုတ်ႇပၢမ်ႉၼမ်ႉမၼ်းဝႆႉ တၢင်းဢွၵ်ႇဝဵင်းပၢင်လူင် ဢၼ်မုင်ႈၼႃႈၵႂႃႇတၢင်း ဝဵင်းလၢႆးၶႃႈ၊ ၵဵဝ်ႇလူၺ်ႈၵၢၼ်တၢႆၶွင် ပႃႈၺူဝ်ႇၼႆႉၵေႃႈ ၵူၼ်းၼႂ်းမုင်ႉႁေႃႁိူၼ်း ပဵၼ်ဢၼ်ၸႂ်ဢမ်ႇလီတေႉတေႉ လႄႈ ၸဝ်ႈပၢႆးမၢၵ်ႈမီး ၼႂ်းဝဵင်းပၢင်လူင်ၵေႃႈ ဢွၼ်ၵၼ်တူၵ်းၸႂ် လွင်ႈပိူင်ပဵၼ်ၼႆႉမိူၼ်ၵၼ် ၼႆယဝ်ႉ။

ၵဵဝ်ႇလူၺ်ႈလွင်ႈ ပႃႈၺူဝ်ႇ ထုၵ်ႇယိုဝ်းတၢႆတီႈ တၢင်းၶဝ်ႈဝၢၼ်ႈၼမ်ႉလိၼ်း ဢိူင်ႇၼွင်လႅင် ၸႄႈဝဵင်းပၢင်လူင် ၼႆႉ ပဵၼ်ႁွႆးမိုဝ်းၽႂ်ၼႆၼၼ်ႉ ဢမ်ႇလႆႈႁူႉၸွမ်း။

တႆးလွတ်ႈလႅဝ်း