ၵျႃႇပၢၼ်ႇ တေဢမ်ႇသူင်ႇၽွင်းတၢင် ၵႂႃႇၶဝ်ႈႁူမ်ႈ ပၢင်လဵၼ်ႈႁႅင်း တီႈမိူင်းၶႄႇ

မိူဝ်ႈၼႆႉ ဝၼ်းထီႉ 24 December 2021 (လိူၼ်ၸဵင်လွင်ႈ 6 ၶမ်ႈ ပီႊတႆး 2116 ၼီႈ) ၼႆႉ ၵျႃႇပၢၼ်ႇ တႅပ်းတတ်းတေဢမ်ႇသူင်ႇ တူဝ်တႅၼ်းလူင်ပွင်ၸိုင်ႈ ပဵၼ်တၢင်းၵၢၼ် ၵႂႃႇၶဝ်ႈႁူမ်ႈၸွမ်း ပၢင်လဵၼ်ႈႁႅင်းၶၢဝ်းၵတ်း (Beijing Winters Olympics) ဢၼ်တေၸတ်းႁဵတ်းတီႈမိူင်းၶႄႇ ပီႊၼႃႈၼၼ်ႉသေ ၵျႃႇပၢၼ်ႇ ၶဝ်ႈႁူမ်ႈၵႂႃႇၸွမ်း လွင်ႈဢၼ်ဢမေႇရိၵၢၼ်ႇ လႄႈမိူင်းဢူၺ်းလီ သၢၼ်ၶတ်းတေႃႇၶႄႇ လူၺ်ႈလၢႆးၽွင်းတၢင်ၼၼ်ႉယူႇဝႃႈၼႆ။

ၼႂ်းၵၢၼ်သၢၼ်ၶတ်းလူၺ်ႈလၢႆးၽွင်းတၢင် ဢမ်ႇသူင်ႇၽွင်းတၢင် ၵႂႃႇၶဝ်ႈႁူမ်ႈၸွမ်း ပၢင်လဵၼ်ႈႁႅင်း ၶၢဝ်းၵတ်း တီႈမိူင်းၶႄႇၼႆႉ မီးဢမေႇရိၵၢၼ်ႇ လႄႈ မိူင်းဢူၺ်းလီဢမေႇရိၵၢၼ်ႇ မၢင်မိူင်း ၶဝ်ႈႁူမ်ႈပႃးၸွမ်း ဝႆႉသေ ယၢမ်းလဵဝ် တိူဝ်းမႃး ၵျႃႇပၢၼ်ႇ ထႅင်ႈမိူင်းၼိုင်ႈ ဝႃႈၼႆ။

သိုဝ်ႇၶၢဝ်ႇၼွၵ်ႈမိူင်းယင်းလၢႆးငၢၼ်းလၢတ်ႈဝႃႈ ပႅၵ်ႉသမ်ႉၵျႃႇပၢၼ်ႇ ဢမ်ႇသူင်ႇၽွင်းတၢင် ၵႂႃႇၶဝ်ႈ ႁူမ်ႈၸွမ်း ပၢင်လဵၼ်ႈႁႅင်းတီႈမိူင်းၶႄႇၼႆသေတႃႉၵေႃႈ ၵျႃႇပၢၼ်ႇ ယင်းလိူၵ်ႈဢဝ် သေးၵူဝ်ႇ ႁၢတ်ႇသ်သျီႇမူဝ်ႇတူဝ်ႇ (Seiko Hashimoto)  ၵေႃႉဢၼ်ၵဵဝ်ႇၶွင်ႈတၢင်းၵၢၼ်မိူင်း လႄႈ ဢၼ်ယၢမ်ႈပဵၼ် ႁူဝ်ပဝ်ႈ ပၢင်လဵၼ်ႈႁႅင်း Olympics ပီႊ 2020 တီႈဝဵင်းလူင်တူဝ်ႇၵျူဝ်ႇ ၼၼ်ႉ ၵႂႃႇၶဝ်ႈႁူမ်ႈၸွမ်းယူႇ ဝႃႈၼႆ။

ယွၼ်ႉၶႄႇပူၼ်ႉပႅၼ်ႇသုၼ်ႇလႆႈသုၼ်ႇပဵၼ်ၵူၼ်းၼႆသေ ဢမေႇရိၵၢၼ်ႇ လႄႈ မိူင်းဢူၺ်းလီ လႆႈသၢၼ်ၶတ်း လူၺ်ႈလၢႆးၽွင်းတၢင် ဢမ်ႇသူင်ႇၽွင်းတၢင်ၵႂႃႇၶဝ်ႈႁူမ်ႈၸွမ်း ပၢင်လဵၼ်ႈႁႅင်း ၶၢဝ်းၵတ်း ဢၼ်တေၸတ်းႁဵတ်းတီႈမိူင်းၶႄႇ ပီႊၼႃႈၼၼ်ႉ ဝႃႈၼႆ။

တႆးလွတ်ႈလႅဝ်း

 

Facebook

ၶၢဝ်ႇလိုၼ်းသုတ်း