ၶိမ်း ၵျွင်းဢိုၼ်း သင်ႇၽိုၵ်းၽွၼ်ႉသိုၵ်း မိူၼ်ၶဝ်ႈပၢင်တိုၵ်းတေႉ

ဝၢႆးသေၸွမ်ၸိုင်ႈ ၶိမ်း ၵျွင်းဢိုၼ်း လႆႈဢွၼ်လုၵ်ႈယိင်းမၼ်းၵႂႃႇတူၺ်း ၵၢၼ်ၸၢမ်းယိုဝ်း မၢၵ်ႇမိတ်ႉသႆးသႅၼ်းယိုဝ်းၸမ်ယဝ်ႉၼၼ်ႉ  ၶိုၼ်းသင်ႇႁႂ်ႈ တပ်ႉသိုၵ်းၵူဝ်းရီးယႃးႁွင်ႇ ၽိုၵ်းၽွၼ်ႉၵၢၼ်သိုၵ်း မိူၼ်ၼင်ႇၶဝ်ႈပၢင်တိုၵ်းတေႉ ဝႃႈၼႆ။

မိူဝ်ႈဝၼ်းထီႉ 10 March 2023 (လိူၼ်သီႇလွင်ႈ 5 ၶမ်ႈ ပီႊတႆး 2117 ၼီႈ) သိုဝ်ႇၶၢဝ်ႇ KCNA ၶွဝ်ၵူဝ်းရီးယႃးႁွင်ႇ ဢွၵ်ႇသပ်းၸႅင်ႈၶၢဝ်ႇ လွင်ႈၽူႈဢွၼ်ႁူဝ်ၵူဝ်းရီးယႃးႁွင်ႇ ၶိမ်း ၵျွင်းဢိုၼ်း ဢွၵ်ႇၶေႃႈသင်ႇ ႁႂ်ႈတပ်ႉသိုၵ်းၵူဝ်းရီးယႃးႁွင်ႇ ၸတ်းႁဵတ်းပၢင်ၽိုၵ်း ၽွၼ်ႉၵၢၼ်သိုၵ်း ၼင်ႇႁၢဝ်ႈႁႅင်း တႃႇႁပ်ႉမိုဝ်းလႄႈ တုမ်ႉတွပ်ႇၽူႈၶဵၼ် မိူၼ်ၼင်ႇ ပၢင်တိုၵ်းတေႉလႄႈ ၶေႃႈသင်ႇၽူႈဢွၼ်ႁူဝ် ၵူဝ်ရီးယႃးႁွင်ႇၼႆႉၵေႃႈ မီးမႃးၼႂ်းၵႄႈ ပၢင်တိုၵ်းယူႇၶရဵၼ်းတင်း ရၢတ်ႉသျႃး ဢိၵ်ႇတင်း လွင်ႈၶဵင်ႈၶႅင်ၼႂ်းပၢင်ႇလၢႆႇၵူဝ်းရီး ယႃး ဢၼ်ႁၢႆႉႁႅင်းၶိုၼ်ႈမႃးၼၼ်ႉ ဝႃႈၼႆ။

မိူဝ်ႈဝၼ်းထီႉ 9 March 2023 ပူၼ်ႉမႃးၼၼ်ႉၵေႃႈ ၶိမ်း ၵျွင်းဢိုၼ်း လႆႈဢွၼ်ဢဝ် လုၵ်ႈယိင်းမၼ်း ၵႂႃႇတူၺ်းၵၢၼ်ၸၢမ်းယိုဝ်းမၢၵ်ႇမိတ်ႉသႆးသႅၼ်းယိုဝ်းၸမ်ၶွင် ၵူဝ်းရီးယႃးႁွင်ႇ ဢၼ်ယိုဝ်းၵႂႃႇတူၵ်းတီႈ ၼွၵ်ႈၽင်ႇပၢင်ႇလၢႆႇပွတ်းဝၼ်းတူၵ်းၼၼ်ႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ႁဵတ်းႁႂ်ႈၽၢႆႇတၢင်းၵူဝ်းရီးယႃးၸၢၼ်း လႆႈဢွၵ်ႇမႃး လၢမ်းၶၢတ်ႈဝႃႈ ၵၢၼ်ၸၢမ်းယိုဝ်းမၢၵ်ႇမိတ်ႉသႆး ၶွင်ၵူဝ်းရီးယႃးႁွင်ႇပွၵ်ႈၼႆႉ ၼႄႁႂ်ႈ ႁၼ်လွင်ႈပဵၼ်ၵႂႃႇလႆႈဝႃႈ ၵူဝ်းရီးယႃးႁွင်ႇ တေသိုပ်ႇၸၢမ်းယိုဝ်းမၢၵ်ႇမိတ်ႉသႆး ၵူႈသႅၼ်းသႅၼ်းၵႂႃႇထႅင်ႈ ဝႃႈၼႆ။

ၼွၵ်ႈလိူဝ်သေၼႆႉ သိုဝ်ႇၶၢဝ်ႇ KCNA ၶွင်ၵူဝ်းရီးယႃးႁွင်ႇ ယင်းလၢတ်ႈဝႃႈ သိုၵ်းၵူဝ်းရီးယႃးႁွင်ႇ လႆႈၸၢမ်းယိုဝ်းမၢၵ်ႇမိတ်ႉသႆးၵႂႃႇတူၵ်းတီႈပဝ်ႉမၢႆ ၼႂ်းပၢင်ႇလၢႆႇ တႃႇၼႄႁႂ်ႈႁၼ်ထိုင်ၼမ်ႉၵတ်ႉ ၼႂ်းၵၢၼ်တုမ်ႉတွပ်ႇၶွင် ၵူဝ်းရီးယႃးႁွင်ႇ မိူဝ်ႈယၢမ်း ဢၼ်ပဵၼ်ပၢင်တိုၵ်းတေႉၼၼ်ႉ ဝႃႈၼႆ။

တႆးလွတ်ႈလႅဝ်း