ၶၢဝ်းတၢင်းဢမ်ႇထိုင်ဝူင်ႈ သိုၵ်းရၢတ်ႉသျႃးလူႉတၢႆႁဵင်ပၢႆ

မိူဝ်ႈဝၼ်းထီႉ 13 March 2023 (လိူၼ်သီႇလွင်ႈ 8 ၶမ်ႈ ပီႊတႆး 2117 ၼီႈ) ၸွမ်ၸိုင်ႈ ယူႇၶရဵၼ်း ဝူဝ်ႇလူဝ်ႇတီႇမီရ်ႇ သေႇလႅၼ်ႇသၵီႇ လႆႈပိုတ်ႇလၢတ်ႈဝႃႈ ၼႂ်းၶၢဝ်းတၢင်း ဢမ်ႇထိုင်ၼိုင်ႈဝူင်ႈ တပ်ႉသိုၵ်းရၢတ်ႉသျႃး လႆႈတူၵ်းသုမ်းၵူၼ်းၵႂႃႇယဝ်ႉ 1,100 ၵေႃႉ တီႈပၢင်တိုၵ်းၼႂ်းဝဵင်း Bakhmut ပွတ်းတွၼ်ႈ Donetsk ဢၼ်ထုၵ်ႇရၢတ်ႉသျႃး ၶဝ်ႈပိုတ်းယိုဝ်းမႃး ပဵၼ်ၶၢဝ်းတၢင်းႁိုင်လၢႆလိူၼ်ၼၼ်ႉ ဝႃႈၼႆ။

ၼွၵ်ႈလိူဝ်သေၼႆႉ ယင်းမီးသိုၵ်းရၢတ်ႉသျႃးမွၵ်ႈ 1,500 ၵေႃႉ လႆႈတၢင်းမၢတ်ႇၸဵပ်း ႁၢဝ်ႈႁႅင်း ထိုင်တီႈဢမ်ႇၸၢင်ႈၶဝ်ႈပၢင်တိုၵ်းလႆႈၼႆ သေႇလႅၼ်ႇသၵီႇ သိုပ်ႇလၢတ်ႈထႅင်ႈၼင်ႇၼႆ။

ၵဵဝ်ႇလူၺ်ႈလွင်ႈၼႆႉသေ ၽၢႆႇတၢင်းႁွင်ႈၵၢၼ်လူင်ၽၢႆႇၵႅတ်ႇၶႄရၢတ်ႉသျႃး ဢွၵ်ႇမႃး တုမ်ႉတွပ်ႇလၢတ်ႈဝႃႈ တပ်ႉသိုၵ်းရၢတ်ႉသျႃး ပိုတ်းယိုဝ်းၶႃႁႅမ်တၢႆလႆႈ သိုၵ်းယူႇၶရဵၼ်း ၼမ်လိူဝ်သေ 220 ၵေႃႉၼႆႉ ဝႃႈၼႆ။

မိူဝ်ႈဝၼ်းထီႉ 12 March 2023 ပူၼ်ႉမႃးၼၼ်ႉ ၽၢႆႇတၢင်းႁူဝ်ၼႃႈ ၸုမ်းသိုၵ်း ၵိၼ်ၸၢင်ႈ Wagner Group ၶွင်ရၢတ်ႉသျႃး လႆႈလၢတ်ႈဝႃႈ ယၢမ်းၽွင်းတေႃႈလဵဝ် ငဝ်းလၢႆးၼႂ်းဝဵင်း Bakhmut မီးလွင်ႈယၢပ်ႇၽိုတ်ႇႁႅင်းတေႉတေႉလႄႈ မီးလွင်ႈပိုတ်း ယိုဝ်းၵၼ်ယူႇၵူႈၸွၵ်ႉၵူႈၸဵင်ႇ သေဢမ်ႇၵႃး ၼိုင်ႈၶဝ်ႈၸမ်ၵၢင်ဝဵင်းမွၵ်ႈၵႃႈႁိုဝ်ၵေႃႈ လွင်ႈပိုတ်းယိုဝ်းၵၼ်ၼိုင်ႈၶႅၼ်းႁၢႆႉႁႅင်းၶိုၼ်ႈၵႃႈၼၼ်ႉ ဝႃႈၼႆ။

ၽူႈထတ်းသၢင်မိူင်းဝၼ်းတူၵ်းၶဝ် လၢတ်ႈဝႃႈ လွင်ႈယိုတ်းသိမ်းလႆး ဝဵင်း Bakhmut ၼႆႉ တေပဵၼ်လွင်ႈဢွင်ႇပေႉၶွင်ရၢတ်ႉသျႃးပွၵ်ႈဢွၼ်တၢင်းသုတ်း ၼႂ်းႁွပ်ႈလၢႆလိူၼ် ဝၢႆးသေႁဵတ်းၽိတ်းႁဵတ်းပိူင်ႈမႃးတႃႇသေႇ သေဢမ်ႇၵႃး ယင်းတေႁဵတ်းႁႂ်ႈရၢတ်ႉ သျႃး ၶဝ်ႈၸမ်ပဝ်ႉမၢႆ ၵၢၼ်ယိုတ်းသိမ်းဢဝ်ပွတ်းတွၼ်ႈ Donetsk လႆႈတဵမ်ထူၼ်ႈ ဝႃႈၼႆ။

တႆးလွတ်ႈလႅဝ်း

Facebook

ၶၢဝ်ႇလိုၼ်းသုတ်း