ၶႄႇပိုၼ်ၽၢဝ်ႇ တေၶတ်းၸႂ်ႁူမ်ႈၸိူဝ်ႉၸၢတ်ႈထႆႇဝၼ်ႇၵႂႃႇႁႂ်ႈလီ

ၽၢႆႇလူင်ပွင်ၸိုင်ႈၶႄႇ လႆႈဢွၵ်ႇမႃးပိုၼ်ၽၢဝ်ႇ ဢၢၼ်းတေမုင်ႈၼႃႈၶတ်းၸႂ် ႁူမ်ႈၸိူဝ်ႉၸၢတ်ႈၸွမ်းထႆႇဝၼ်ႇၵႂႃႇႁႂ်ႈလီ ၼႆယူႇ။

ၽူႈတၢင်လၢတ်ႈ ႁွင်ႈၵၢၼ်တူင်ႉၼိုင်ၵဵဝ်ႇလူၺ်ႈထႆႇဝၼ်ႇ ၶွင်ၶႄႇၼၼ်ႉ လၢတ်ႈဝႃႈ ၶႄႇတေတင်ႈၸႂ်ႁဵတ်းသၢင်ႈလွမ်ၽွမ်ႉႁူမ်ႈၸိူဝ်ႉၸၢတ်ႈ ဢၢၼ်းၶတ်းၸႂ်ႁႂ်ႈထိုင်တီႈယွတ်ႈ ႁွတ်ႈတီႈပၢႆ ၼင်ႇႁိုဝ်ၵၢၼ်ႁူမ်ႈၸိူဝ်ႉၸၢတ်ႈၸွမ်းထႆႇဝၼ်ႇၼၼ်ႉ မီးမႃးႁႂ်ႈပေႃးလႆႈ ဝၢႆးသေတပ်ႉသိုၵ်းၶႄႇ ၽိုၵ်းၽွၼ်ႉသိုၵ်းပဵၼ်ၶၢဝ်းယၢမ်းႁိုင်လၢႆလၢႆဝူင်ႈ ၸမ်ၸမ်တီႈၵုၼ်ထႆႇဝၼ်ႇၼၼ်ႉ ဝႃႈၼႆ။

သိုပ်ႇလၢတ်ႈထႅင်ႈဝႃႈ ထႆႇဝၼ်ႇ မီးပိူင်ဢုပ်ႉပိူင်ႇဢၼ်ပႅၵ်ႇပိူင်ႈၵၼ်တင်း ၸိုင်ႈမိူင်းၶႄႇၽႅၼ်ႇလိၼ်ယႂ်ႇသေတႃႉ ႁပ်ႉႁွင်းလႆႈဝႃႈ ၵၢၼ်ၸႂ်ႉၸၢတ်ႈပၢၼ် ၶွင်ၵူၼ်းၶိူဝ်းထႆႇဝၼ်ႇၼၼ်ႉ တေလႆႈႁပ်ႉလွင်ႈၼပ်ႉယမ် ႁူမ်ႈပႃးလွင်ႈလွတ်ႈလႅဝ်း ၼႂ်းၵၢၼ်သႃႇသၼႃႇတီႈၵိူဝ်းယမ် ၵူၺ်းၵႃႈ တေလႆႈယူႇၽၢႆႇတႂ်ႈၶေႃႈလႅၵ်ႈလၢႆႈဢွၼ်တၢင်း ၼင်ႇႁိုဝ်တေပဵၼ်ၵၢၼ်ၵမ်ႉထႅမ်တေႃႇပိူင်ဢုပ်ႉပိူင်ႇ၊ လွင်ႈမၼ်ႈၼိမ်သဝ်း၊ ၽွၼ်းလီၶွင်ၸိူဝ်ႉၸၢတ်ႈၼၼ်ႉ ဝႃႈၼႆ။

လႆႈဝႃႈပဵၼ်လွင်ႈဢၼ်လၢတ်ႈဢွၵ်ႇမႃး ဢွၼ်တၢင်းတေၸတ်းပၢင်ၵုမ်လူင် ပႃႇတီႇၶွမ်ႇမိဝ်ႇၼိတ်ႉ ၼႂ်းလိူၼ်ႈၼႃႈၼႆႉလႄႈ ပဵၼ်ပၢင်ၵုမ်ဢၼ်ၸတ်းႁဵတ်း 5 ပီႊ ၼိုင်ႈပွၵ်ႈၼၼ်ႉၼႆၼၼ်ႉယဝ်ႉ။ ၽၢႆႇတၢင်းၶႄႇၵေႃႈ တေမုင်ႈၼႃႈၶတ်းၸႂ်ႁဵတ်းၵႂႃႇ တႃႇႁႂ်ႈၸိူဝ်ႉၸၢတ်ႈမႃးႁူမ်ႈပဵၼ်ဢၼ်လဵဝ် ၼင်ႇႁိုဝ်ပေႃးတေဢွင်ႇမၢၼ်ၵႂႃႇၼၼ်ႉ ဝႃႈၼႆ။

လိူဝ်ၼၼ်ႉ ၶႄႇယင်းယၢမ်ႈၼႄႉၼမ်းပၼ် လွၵ်းလၢႆးတီႈထႆႇဝၼ်ႇဢၼ်ဝႃႈ ၼိုင်ႈၸိုင်ႈမိူင်း သွင်ပိူင်ဢုပ်ႉပိူင်ႇၽွမ်းငမ်း ဢၼ်မိူၼ်ၵၼ်တင်း ပိူင်ဢုပ်ႉပိူင်ႇဢၼ်ၸႂ်ႉတိုဝ်းဝႆႉတီႈ ၵုၼ်ႁွင်ႇၵွင်ႇယၢမ်းလဵဝ်ၼႆႉ ဝၢႆးသေ လႆႈၶိုၼ်းယူႇၽၢႆႇတႂ်ႈၵၢၼ်ဢုပ်ႉပိူင်ႇၶွင်ၶႄႇမႃး မိူဝ်ႈပီႊ 1997 ၼၼ်ႉ ၼႆယူႇ။

ၵူၺ်း လူင်ပွင်ၸိုင်ႈထႆႇဝၼ်ႇ လၢတ်ႈဝႃႈ ထႆႇဝၼ်ႇၼၼ်ႉ ဢမ်ႇလႆႈယူႇၽၢႆႇတႂ်ႈ ၵၢၼ်ဢုပ်ႉပိူင်ႇၽွင်းငမ်းၶွင်ၶႄႇ လႄႈ လွင်ႈဢၼ်ၶႄႇလၢတ်ႈဝႃႈ ထႆႇဝၼ်ႇပဵၼ်သုၼ်ႇၼိုင်ႈ မိူင်းၶႄႇၽႅၼ်ႇလိၼ်ယႂ်ႇၼႆၼၼ်ႉၵေႃႈ ဢမ်ႇထုၵ်ႇမႅၼ်ႈၸွမ်းမၢႆမီႈသင် ၼႆယူႇ။

တႆးလွတ်ႈလႅဝ်း