ၸဝ်ႈၼၢင်းၶေႇမႃႇဝတီႇ မႁႃႇတေႇဝီႇၸဝ်ႈၾႃႉမိူင်းပွၼ် ပႃးလိုၼ်းသုတ်း ၸဝ်ႈသိူဝ်ႁူမ်ႇ လုၵ်ႈၸၢႆး ၸဝ်ႈၾႃႉလူင် ၸဝ်ႈၸၢမ်ႇထုၼ်း (မိူင်းပွၼ်) သဵင်ႈၵၢမ်ႇၼွၼ်းၽႄးၵႂႃႇ တီႈဝဵင်းလူင်သိတ်ႇၼီႇ မိူင်းဢေႃးသတြေးလီးယႃး ၼႆယဝ်ႉ။

ၸဝ်ႈၼၢင်းၶေႇမႃႇဝတီႇ သဵင်ႈၵၢမ်ႇၼွၼ်းၽႄးၵႂႃႇ မိူဝ်ႈဝၼ်းထီႉ 20 December 2021 ယၢမ်းတၢမ်းၶမ်ႈ ၽွင်းဢႃႇယုထူၼ်ႈထိုင် 84 ပီႊသေ ပီႈၼွင်ႉၸိူဝ်ႉၶိူဝ်းၸဝ်ႈၾႃႉၶဝ် ၸတ်းႁဵတ်းပၢင်ၸႃႇပၼၸဝ်ႈၼၢင်းၵႂႃႇ မိူဝ်ႈၼႆႉဝၼ်းထီႉ 29 December 2021 (လိူၼ်ၸဵင်လွင်ႈ 11 ၶမ်ႈ ပီႊတႆး 2116 ၼီႈ) တီႈဝဵင်းလူင်သိတ်ႇၼီႇ ၼႆယဝ်ႉ။

ၸဝ်ႈၼၢင်းၶေႇမႃႇဝတီႇ ၵိူတ်ႇမိူဝ်ႈဝၼ်းထီႉ 5 October 1937 ပဵၼ်လုၵ်ႈယိင်း ၵေႃႉထူၼ်ႈ 2  ၸဝ်ႈၶုၼ်မိူင်း မင်းရၢႆး  လုၵ်ႈၸၢႆး ၸဝ်ႈၾႃႉလူင် ၸဝ်ႈၵွၼ်ၵႅဝ်ႈ ဢိၼ်းထလႅင် ၵဵင်းတုင်၊ ၸဝ်ႈၼၢင်းၶေႇမႃႇဝတီႇ မီးပီႈၼွင်ႉႁူမ်ႈတွင်ႉ 6 ၵေႃႉ၊ မၼ်းၸဝ်ႈပဵၼ်ၵေႃႉထူၼ်ႈသွင် ၶိုၼ်းမႃးၵူပ်ႉၵူႈၵၼ်တင်း ၸဝ်ႈသိူဝ်ႁူမ်ႇ လုၵ်ႈၸၢႆး ၸဝ်ႈၾႃႉလူင်မိူင်းပွၼ် ၸဝ်ႈၸၢမ်ႇထုၼ်း မိူဝ်ႈပီႊ 1959 ဝႃႈၼႆ။

ၼႂ်းပီႊ 1959 ၼၼ်ႉသမ်ႉ မႅၼ်ႈၽွင်းယၢမ်း ၼေႇဝိၼ်းပဵၼ်ၸွမ်ၽွင်းလူင် ယိပ်းဢၢမ်းၼၢတ်ႈ လႅၵ်ႈလၢႆႈပဵၼ် လူင်ပွင်ၸိုင်ႈပႂ်ႉႁိူၼ်းသေ ၸႂ်ႉဢၢမ်းၼၢတ်ႈႁႂ်ႈၸဝ်ႈၾႃႉၶဝ် ၽႃႈဝၢင်းဢႃႇၼႃႇ ၼၼ်ႉယဝ်ႉ။

ၸဝ်ႈၾႃႉမိူင်းပွၼ် ၸဝ်ႈသိူဝ်ႁူမ်ႇၼႆႉ ပဵၼ်လၢၼ်ၸဝ်ႈၶုၼ်ၶဵဝ် (ၸဝ်ႈၾႃႉမိူင်းမိတ်ႈ) မိူဝ်ႈပီႊ 1961 ၼၼ်ႉ ၸဝ်ႈသိူဝ်ႁူမ်ႇ ၶဝ်ႈႁူမ်ႈတူင်ႉၼိုင်ပႃးၼႂ်းၵၢၼ်တူင်ႉၼိုင် ၾႅတ်ႇတရႄႇမိူင်းတႆးယူႇ၊ ဝၢႆးၼၼ်ႉ ၼႂ်းပီႊ 1962 ၼေႇဝိၼ်းယိုတ်းဢၢမ်းၼၢတ်ႈလႄႈ ၸဝ်ႈသိူဝ်ႁူမ်ႇထုၵ်ႇတီႉၺွပ်း သႂ်ႇၶွၵ်ႈၶင်ဝႆႉတၢင်းႁိုင်၊ ဝၢႆးလိုၼ်းမႃး မၼ်းၸဝ်ႈထုၵ်ႇပွႆႇတူဝ်ဢွၵ်ႇမႃးသေ ၸဝ်ႈသိူဝ်ႁူမ်ႇလႄႈ ၸဝ်ႈၼၢင်းၶေႇမႃႇဝတီႇ လႆႈပၢႆႈဢွၵ်ႇမိူင်း ၵႂႃႇယူႇတီႈမိူင်းဢေႃးသတြေးလီးယႃး တေႃႇထိုင်မၼ်းၸဝ်ႈ သဵင်ႈၵၢမ်ႇၼွၼ်းၽႄးၵႂႃႇယူႇယဝ်ႉ။

တႆးလွတ်ႈလႅဝ်း